Aravalli News : અરવલ્લી જિલ્લાના શામળાજી વિસ્તારમાં અંધશ્રદ્ધા અને ધાર્મિક વિધિ (Ritual)ના બહાને ઠગાઈ (Fraud)નો ચોંકાવનારો કિસ્સો સામે આવ્યો છે. કિડનીની બીમારી દૂર કરવાની વાત કરી ત્રણ શખ્સોએ એક પરિવારને વિશ્વાસમાં લઈ રૂપિયા 2.06 લાખની ઠગાઈ આચરી હોવાનું બહાર આવ્યું છે.
મળતી માહિતી મુજબ, હિંમતનગર તાલુકાના ઇલોલ ગામના રહેવાસી પરિવારને કેટલાક શખ્સોએ સંપર્ક કરી તેમની તબિયત સંબંધિત સમસ્યાનું ધાર્મિક વિધિ (Ritual)દ્વારા નિરાકરણ લાવવાની ખાતરી આપી હતી. આરોપીઓએ પરિવારને શામળાજી મંદિર નજીક બોલાવી ખાસ વિધિ કરાવવાની વાત કરી હતી.
વિધિ દરમિયાન આરોપીઓએ પરિવાર પાસેથી સોના-ચાંદીના દાગીના તેમજ રોકડ રકમ માંગીને ધાર્મિક ક્રિયા માટે ઉપયોગ થવાનો બહાનો આપ્યો હતો. પરિવાર વિશ્વાસમાં આવી ગયો અને પોતાની કિંમતી વસ્તુઓ આરોપીઓને સોંપી દીધી હતી. જોકે થોડા સમય બાદ આરોપીઓ ત્યાંથી ફરાર થઈ જતા પરિવારને પોતાની સાથે છેતરપિંડી થઈ હોવાની જાણ થઈ હતી.
આ સમગ્ર ઘટનાની ફરિયાદ શામળાજી પોલીસ મથકે નોંધાવવામાં આવી હતી. ફરિયાદના આધારે પોલીસે ગુનો દાખલ કરી તપાસ શરૂ કરી હતી. તપાસ દરમિયાન સ્થાનિક ક્રાઇમ બ્રાન્ચ (LCB)એ કાર્યવાહી હાથ ધરી અને ત્રણેય આરોપીઓને ઝડપી પાડવામાં સફળતા મેળવી હતી.
પોલીસ હાલમાં આરોપીઓની પૂછપરછ કરી રહી છે અને આ પ્રકારની અન્ય કોઈ ઠગાઈ Fraud)માં તેમની સંડોવણી છે કે નહીં તે દિશામાં પણ તપાસ આગળ ધપાવી રહી છે. ઘટનાએ ફરી એકવાર અંધશ્રદ્ધા અને ચમત્કારના નામે લોકોને ઠગતા તત્વો સામે સાવચેત રહેવાની જરૂરિયાત ઉજાગર કરી છે.
