World News : મધ્ય પૂર્વમાં ચાલી રહેલા વધતા તણાવ વચ્ચે હવે સંયુક્ત આરબ અમીરાત (UAE) પર સંભવિત મિસાઈલ હુમલાની ચર્ચાએ આંતરરાષ્ટ્રીય સ્તરે ચિંતા વધારી છે. અમેરિકન અખબાર ધ વોલ સ્ટ્રીટ જર્નલના અહેવાલ અનુસાર, ઈરાને (Iran)સાઉદી અરેબિયા અને ઓમાનને સંકેત આપ્યો છે કે UAE સામે મોટી સૈન્ય કાર્યવાહી થઈ શકે છે. અહેવાલમાં આગામી 24 કલાક દરમિયાન મિસાઈલ હુમલાની આશંકા વ્યક્ત કરવામાં આવી છે. જોકે, આ દાવાની ઈરાન અથવા UAE તરફથી કોઈ સત્તાવાર પુષ્ટિ કરવામાં આવી નથી.
અમેરિકાએ વૈશ્વિક સુરક્ષા ચેતવણી જાહેર કરી
ખાડી વિસ્તારમાં વધી રહેલા તણાવને ધ્યાનમાં રાખીને અમેરિકાના સ્ટેટ ડિપાર્ટમેન્ટે વિશ્વભરના પોતાના નાગરિકો માટે સુરક્ષા એડવાઇઝરી જાહેર કરી છે. ખાસ કરીને મધ્ય પૂર્વમાં રહેતા અથવા ત્યાં પ્રવાસે જનાર લોકોને સતર્ક રહેવા, સ્થાનિક પ્રશાસનની સૂચનાઓનું પાલન કરવા અને બિનજરૂરી મુસાફરી ટાળવા સૂચના આપવામાં આવી છે.
અમેરિકાના ઈરાન પર સતત હુમલા
અમેરિકાએ સતત આઠમા દિવસે ઈરાનના અનેક વ્યૂહાત્મક લક્ષ્યો પર હુમલા ચાલુ રાખ્યા હોવાનું અમેરિકન સેન્ટ્રલ કમાન્ડે જણાવ્યું છે. અમેરિકા મુજબ, આ કાર્યવાહીનો હેતુ હોર્મુઝ સ્ટ્રેટમાં વેપારી જહાજોને જોખમ પહોંચાડવાની ઈરાનની ક્ષમતાને નબળી બનાવવાનો અને ઇસ્લામિક રિવોલ્યુશનરી ગાર્ડ કોર્પ્સ (IRGC)ના માળખાને નુકસાન પહોંચાડવાનો છે.
બીજી તરફ, ઈરાની મીડિયાના અહેવાલોમાં દાવો કરવામાં આવ્યો છે કે શાદેગન, બંદર અબ્બાસ, કેશમ, હાજિયાબાદ અને સિરિક સહિતના વિસ્તારોમાં અમેરિકાએ હવાઈ અને મિસાઈલ હુમલા કર્યા છે. જોકે, આ દાવાઓની સ્વતંત્ર રીતે પુષ્ટિ થઈ નથી.
ઈરાનનો વળતો દાવો અને અમેરિકાને ચેતવણી
ઈરાને દાવો કર્યો છે કે તેણે જોર્ડન અને કુવૈતમાં આવેલા અમેરિકન સૈન્ય મથકોને ડ્રોન અને બેલિસ્ટિક મિસાઈલ દ્વારા નિશાન બનાવ્યા છે. કેટલાક અહેવાલોમાં અમેરિકન સૈનિકોના મોત અને ઈજાના દાવા પણ કરવામાં આવ્યા છે, પરંતુ તેની સ્વતંત્ર પુષ્ટિ હજુ સુધી થઈ નથી.
આ તરફ, ઈરાનના નાયબ વિદેશ પ્રધાન કાઝેમ ઘરીબાદીએ જણાવ્યું છે કે અમેરિકા સાથે નવી વાટાઘાટોની હાલ કોઈ યોજના નથી અને ઈરાન હોર્મુઝ વિસ્તારમાં પોતાના હિતોની રક્ષા કરવા પ્રતિબદ્ધ છે.
સુપ્રીમ લીડરની કડક ચેતવણી
ઈરાનના સર્વોચ્ચ નેતૃત્વે અમેરિકાને કડક સંદેશ આપતા જણાવ્યું છે કે જો હુમલા ચાલુ રહેશે તો તેનો જોરદાર જવાબ આપવામાં આવશે. ઈરાનના વરિષ્ઠ નેતાઓએ એવો પણ આરોપ લગાવ્યો છે કે અમેરિકા અગાઉ થયેલા કરારનું પાલન કરવામાં નિષ્ફળ રહ્યું છે, જેના કારણે બંને દેશો વચ્ચે વિશ્વાસનો સંકટ વધુ ઊંડો બન્યો છે.
પરિસ્થિતિ પર દુનિયાની નજર
હાલમાં UAE પર સંભવિત હુમલાના દાવાની કોઈ સત્તાવાર પુષ્ટિ ઉપલબ્ધ નથી. છતાં, અમેરિકા અને ઈરાન (Iran)વચ્ચે વધતા સૈન્ય તણાવને કારણે સમગ્ર ખાડી વિસ્તારમાં સુરક્ષા ચિંતાઓ વધી રહી છે અને વૈશ્વિક સમુદાય પરિસ્થિતિ પર નજીકથી નજર રાખી રહ્યો છે.
