ભારતીય ક્રિકેટ (cricket)કંટ્રોલ બોર્ડ (BCCI) આગામી હોમ સીઝનથી દેશની તમામ સ્થાનિક ક્રિકેટ ટૂર્નામેન્ટ્સમાં ક્રાંતિકારી બદલાવ લાવવા જઈ રહ્યું છે. મેરીલેબોન ક્રિકેટ ક્લબ (MCC) દ્વારા સૂચવવામાં આવેલા રમતના નવા નિયમોને હવે રણજી ટ્રોફી, વિજય હજારે ટ્રોફી અને સૈયદ મુશ્તાક અલી ટ્રોફી જેવી પ્રમુખ ટૂર્નામેન્ટ્સમાં લાગુ કરવામાં આવશે. આ ફેરફારોમાં ફર્સ્ટ ક્લાસ મેચોમાં દિવસની અંતિમ ઓવર પૂર્ણ કરવાથી લઈને વિકેટકીપરના ગ્લોવ્ઝ અને હેડ કોચની મેદાન પર હાજરી સંબંધિત મહત્વપૂર્ણ નિર્ણયો સામેલ છે.
દિવસની છેલ્લી ઓવર પૂરી કરવી ફરજિયાત
નવા નિયમ અનુસાર, રેડ બોલ (ફર્સ્ટ ક્લાસ) ક્રિકેટમાં દિવસના અંતિમ તબક્કામાં જો વિકેટ પડે છે, તો રમત ત્યાં જ સ્થગિત નહીં થાય. અંતિમ ઓવરના તમામ બોલ ફેંકવા અનિવાર્ય રહેશે, જેથી નવા બેટ્સમેને દિવસનો છેલ્લો બોલ રમીને જ પેવેલિયન પરત ફરવું પડશે.
વન ડે મેચમાં હેડ કોચની મેદાનમાં એન્ટ્રી
સિમિત ઓવરોની વનડે ક્રિકેટમાં હવે વ્યૂહાત્મક ફેરફારો માટે હેડ કોચને ડ્રિંક્સ બ્રેક દરમિયાન મેદાન પર જઈને ખેલાડીઓ સાથે ચર્ચા કરવાની સત્તાવાર મંજૂરી આપવામાં આવશે.
શોર્ટ રન પર વિરોધી કેપ્ટનનો પાવર
જો કોઈ બેટ્સમેન જાણી જોઈને શોર્ટ રન લેતો જણાશે, તો ફિલ્ડિંગ કરી રહેલી ટીમના કેપ્ટનને એ નક્કી કરવાનો અધિકાર મળશે કે હવે પછીના બોલનો સામનો કયો બેટ્સમેન કરશે.
ડેડ બોલની વ્યાખ્યામાં બદલાવ
હવે બોલને ‘ડેડ’ જાહેર કરવા માટે તેનું બોલર કે વિકેટકીપરના હાથમાં હોવું જરૂરી નથી. જો બોલ કોઈ પણ ફિલ્ડરના નિયંત્રણમાં હોય અથવા જમીન પર સ્થિર પડ્યો હોય, તો તેને ડેડ બોલ ગણવામાં આવશે.
લેગ સાઈડ વાઈડ માટે નવી સ્પષ્ટતા
વનડે અને T20 ફોર્મેટમાં બેટ્સમેનની મુવમેન્ટ અને લેગ સાઈડના વાઈડ બોલને લઈને વધુ પારદર્શક ગાઈડલાઈન્સ જારી કરવામાં આવશે, જેથી અમ્પાયરિંગના નિર્ણયોમાં સમાનતા જળવાઈ રહે.
બાઉન્ડ્રી લાઈન પર ફિલ્ડરોનું સ્થાન
બોલર રન-અપ શરૂ કરે અને બોલ ડિલિવર કરે તે સમયે તમામ ફિલ્ડિંગ ખેલાડીઓએ બાઉન્ડ્રી લાઈનની અંદર જ રહેવું ફરજિયાત બનશે.
વિકેટકીપરના ગ્લોવ્ઝ પરથી પેનલ્ટી હટાવાઈ
બોલરના રન-અપ દરમિયાન વિકેટકીપર દ્વારા પોતાના ગ્લોવ્ઝ સહેજ આગળ રાખવા બદલ જે પેનલ્ટી કે દંડ ફટકારવામાં આવતો હતો, તે નિયમ હવે રદ્દ કરવામાં આવ્યો છે.
આ પણ વાંચો: રોહિત શર્માનો ઐતિહાસિક રેકોર્ડ, ઇંગ્લેન્ડમાં 8મી ODI સદી સાથે રચ્યો વિશ્વ રેકોર્ડ
આ પણ વાંચો: રોહિત શર્માના કરિયર પર BCCI ના નિવેદનથી સસ્પેન્સ વધ્યું; 2027 ના વર્લ્ડ કપ પ્લાનમાંથી હિટમેન આઉટ?
આ પણ વાંચો: રોહિત શર્મા વનડે ક્રિકેટમાંથી નિવૃત્ત થશે? લોર્ડ્સ વનડે પહેલા BCCIએ અફવાઓ પર આપ્યો સણસણતો જવાબ
