Valsad Rain News: દક્ષિણ ગુજરાતમાં સતત વરસી રહેલા અતિભારે વરસાદે જનજીવનને ગંભીર અસર પહોંચાડી છે. વલસાડ જિલ્લાના ઉમરગામ તાલુકામાં ભારે વરસાદ અને ઉપરવાસમાંથી આવેલા પાણીના જોરદાર પ્રવાહને કારણે સંજાણ-હુમારણ ગામોને જોડતા બ્રિજ (Umargam Bridge Collapse)નો એક ભાગ તૂટી પડ્યો છે. આ ઘટનાને પગલે બંને વિસ્તારો વચ્ચેની અવરજવર પ્રભાવિત થઈ છે અને સ્થાનિકોમાં ચિંતાનો માહોલ જોવા મળી રહ્યો છે.
Umargam Bridge Collapse: ઉમરગામમાં ભારે વરસાદથી બ્રિજનો ભાગ ધસી પડ્યો
મળતી માહિતી મુજબ આ ઘટના ભાટી કર્મબેલી નજીક વારોલી નદી પર આવેલા બ્રિજ (Umargam Bridge Collapse) પર બની હતી. ભારે પાણીના પ્રવાહના કારણે પુલનો એક હિસ્સો ધસી પડ્યો અને પાણીમાં વહી ગયો હતો. બ્રિજ (Umargam Bridge Collapse)ને થયેલા નુકસાન બાદ સંબંધિત વિભાગો દ્વારા સ્થળની સ્થિતિનું નિરીક્ષણ કરવામાં આવી રહ્યું છે.
રાજ્યમાં ખાસ કરીને દક્ષિણ ગુજરાતમાં છેલ્લા કેટલાક દિવસોથી સતત ભારે વરસાદ નોંધાઈ રહ્યો છે. વલસાડ જિલ્લામાં અનેક વિસ્તારોમાં પાણી ભરાવા, નદીઓમાં જળસ્તર વધવા અને નીચાણવાળા વિસ્તારોમાં પૂર જેવી સ્થિતિ સર્જાઈ છે. ઔરંગા નદીનું જળસ્તર પણ નોંધપાત્ર રીતે વધતાં અનેક વિસ્તારોમાં સાવચેતીના પગલાં લેવામાં આવ્યા છે.
જિલ્લામાં પોલીસ, સ્થાનિક વહીવટી તંત્ર અને બચાવ ટીમો સતત કામગીરીમાં જોડાયેલી છે. કેટલાક વિસ્તારોમાં લોકોને સલામત સ્થળે ખસેડવાની કામગીરી હાથ ધરવામાં આવી રહી છે. છીપવાડ વિસ્તારમાં બચાવ અભિયાન ચાલુ છે અને કટોકટીની સ્થિતિમાં ફસાયેલા લોકોને સુરક્ષિત સ્થળે પહોંચાડવાના પ્રયાસો થઈ રહ્યા છે. આ દરમિયાન એક ગર્ભવતી મહિલાનું પણ જોખમી પરિસ્થિતિમાં સફળતાપૂર્વક રેસ્ક્યુ કરવામાં આવ્યું હોવાનું જાણવા મળ્યું છે.
બીજી તરફ, દક્ષિણ ગુજરાતના નવસારી જિલ્લામાં પણ ભારે વરસાદના કારણે પૂર જેવી સ્થિતિ સર્જાઈ છે. છેલ્લા 24 કલાક દરમિયાન જિલ્લામાં સરેરાશ આશરે 10 ઇંચ વરસાદ નોંધાતા અનેક વિસ્તારોમાં પાણી ભરાઈ ગયા છે અને જનજીવન પર તેની વ્યાપક અસર જોવા મળી રહી છે. વહીવટી તંત્રે નાગરિકોને નદી, પુલ અને પાણી ભરાયેલા વિસ્તારોની નજીક ન જવા તેમજ સત્તાવાર સૂચનાઓનું પાલન કરવાની અપીલ કરી છે.
આ પણ વાંચો:વલસાડમાં ભારે વરસાદ વચ્ચે STP પ્લાન્ટમાં ફસાયા 3 મજૂરો, NDRFએ બચાવ્યા જીવ
આ પણ વાંચો:દક્ષિણ ગુજરાતમાં ભારે વરસાદ: સુરત-વલસાડમાં જનજીવન ઠપ, 11નાં મોત; CM ભૂપેન્દ્ર પટેલ આજે કરશે મુલાકાત
આ પણ વાંચો:ગુજરાતમાં આજે સાબરકાંઠા, અરવલ્લી, નવસારી, વલસાડમાં ભારે વરસાદની આગાહી
