Gujarat News: દક્ષિણ ગુજરાત અને સૌરાષ્ટ્રમાં છેલ્લા બે દિવસથી વરસી રહેલા મુશળધાર વરસાદે ભારે તારાજી સર્જી છે. સુરત, વલસાડ, નવસારી સહિત અનેક વિસ્તારોમાં જનજીવન અસ્તવ્યસ્ત બન્યું છે. પૂર જેવી સ્થિતિ વચ્ચે અત્યાર સુધીમાં 11 લોકોનાં મોત નોંધાયા છે, જ્યારે કરોડો રૂપિયાનું નુકસાન થયું છે. પરિસ્થિતિની સમીક્ષા માટે મુખ્યમંત્રી ભૂપેન્દ્ર પટેલ આજે સુરત અને વલસાડની મુલાકાત લેશે.

દક્ષિણ ગુજરાતમાં ભારે વરસાદ | Heavy rain in South Gujarat

દક્ષિણ ગુજરાતના સુરત, વલસાડ, નવસારી તેમજ સૌરાષ્ટ્રના અનેક વિસ્તારોમાં સતત વરસી રહેલા ભારે વરસાદે જનજીવનને ગંભીર અસર પહોંચાડી છે. અનેક વિસ્તારોમાં પાણી ભરાતા લોકોના દૈનિક જીવન પર અસર પડી છે, જ્યારે કાપડ, જરી અને હીરા ઉદ્યોગને કરોડો રૂપિયાનું નુકસાન થયું હોવાનું સામે આવ્યું છે.

સુરતમાં અનેક વિસ્તારો પાણીમાં ગરકાવ

સુરત (Surat Rain)ના ઉધના, સરથાણા અને લસકાણા સહિતના નીચાણવાળા વિસ્તારોમાં સોસાયટીઓમાં કમર સુધી પાણી ભરાઈ જતાં લોકો ઘરોમાં જ ફસાઈ ગયા હતા. રેલવે સ્ટેશન નજીક આવેલા મોબાઈલ માર્કેટના બેઝમેન્ટમાં પણ પાણી ઘૂસી જતાં વેપારીઓને ભારે નુકસાન વેઠવું પડ્યું.

કાપડ અને જરી ઉદ્યોગને મોટો ફટકો

ભારે વરસાદને કારણે કાપડ અને જરીની ફેક્ટરીઓમાં પાણી ભરાઈ જતાં કરોડો રૂપિયાનું નુકસાન થયું છે. હીરા અને ટેક્સટાઈલ માર્કેટમાં વેપાર પણ ઠપ થઈ ગયો છે. અનેક વિસ્તારોમાં દૂધ સહિતની આવશ્યક સેવાઓ પણ અસરગ્રસ્ત બની છે.

રાહત અને બચાવ કામગીરી તેજ

પરિસ્થિતિને ધ્યાનમાં રાખીને જિલ્લા વહીવટીતંત્ર, પોલીસ, NDRF અને SDRFની ટીમો બચાવ અને રાહત કામગીરીમાં જોડાઈ છે. સુરત પોલીસે 100થી વધુ લોકોને સુરક્ષિત સ્થળે ખસેડ્યા છે. અસરગ્રસ્ત વિસ્તારોમાં સતત રેસ્ક્યૂ કામગીરી ચાલુ છે.

11 લોકોના મોત, CM કરશે સ્થળ મુલાકાત

વરસાદ સંબંધિત વિવિધ અકસ્માતોમાં અત્યાર સુધીમાં 11 લોકોનાં મોત થયા છે. રાજ્ય સરકાર દ્વારા અસરગ્રસ્ત જિલ્લાઓની સ્થિતિની સમીક્ષા કરવામાં આવી છે. મુખ્યમંત્રી ભૂપેન્દ્ર પટેલ (Bhupendra Patel)આજે સુરત અને વલસાડની મુલાકાત લઈને અધિકારીઓ સાથે પરિસ્થિતિની સમીક્ષા કરશે અને રાહત કામગીરીનું નિરીક્ષણ કરશે.

હજુ બે દિવસ ભારે વરસાદની આગાહી

હવામાન વિભાગે (Meteorological Department)આગામી બે દિવસ સુધી સુરત અને દક્ષિણ ગુજરાતમાં ભારે વરસાદની આગાહી કરી છે. લોકોને બિનજરૂરી બહાર ન નીકળવાની અને વહીવટીતંત્રની સૂચનાઓનું પાલન કરવાની અપીલ કરવામાં આવી છે.

આ પણ વાંચો:ગુજરાતમાં વરસાદનું જોર ઘટશે, દક્ષિણ ગુજરાતમાં આજે પણ ભારે વરસાદની આગાહી

આ પણ વાંચો:ઉત્તર ભારતથી ગુજરાત સુધી ભારે વરસાદનો કહેર, અનેક રાજ્યોમાં વરસાદી આફત, રસ્તા-રેલવે સેવા પર અસર

આ પણ વાંચો:ગુજરાતમાં એકસાથે 5 વરસાદી સિસ્ટમ સક્રિય, અનેક જિલ્લાઓમાં ભારેથી અતિભારે વરસાદની આગાહી