Ahmedabad News: અમદાવાદ જિલ્લાના ધોળકામાં ભારે વરસાદ વચ્ચે પીપળી-વટામણ જૂના હાઇવે પર આવેલું નાળું અચાનક (Dholka Canal Collapse) તૂટી પડતાં (Infrastructure Damage) વાહનવ્યવહાર પર મોટી અસર પડી છે. સુરક્ષાને ધ્યાનમાં રાખીને તંત્રએ હાઇવેનો આ માર્ગ તાત્કાલિક બંધ કરી દીધો છે. ઘટનાના પગલે સ્થાનિક લોકોમાં ભારે રોષ જોવા મળી રહ્યો છે.
Infrastructure Damage: ભોગાવો નદીના પ્રવાહે પહોંચાડ્યું નુકસાન
પ્રાથમિક માહિતી મુજબ, ભોગાવો નદીમાં પાણીનો પ્રવાહ વધતાં નાળાનું સ્ટ્રક્ચર નુકસાન પામ્યું અને તે તૂટી પડ્યું. માર્ગ બંધ થતાં બંને તરફ વાહનોની લાંબી કતારો લાગી હતી અને મુસાફરોને વૈકલ્પિક માર્ગનો ઉપયોગ કરવાની ફરજ પડી હતી.
માત્ર બે મહિના પહેલાં બન્યું હતું નાળું
સ્થાનિકોના જણાવ્યા અનુસાર, આ નાળાનું નિર્માણ માત્ર બે મહિના પહેલાં જ કરવામાં આવ્યું હતું. આટલા ઓછા સમયમાં જ નાળું તૂટી જતાં કામની ગુણવત્તા સામે ગંભીર સવાલો ઊભા થયા છે. લોકો દ્વારા સમગ્ર મામલે જવાબદારી નક્કી કરી તપાસ કરવાની માંગ કરવામાં આવી રહી છે.
ચીમનલાલ પટેલ બ્રિજમાં પણ ખામી સામે આવી
બીજી તરફ અમદાવાદ શહેરમાં ચીમનલાલ પટેલ બ્રિજની (Chimanlal Patel Bridge) સ્થિતિને લઈને પણ ચિંતા વધી છે. બ્રિજના ફૂટપાથનો એક ભાગ લગભગ 10 ઇંચથી વધુ બહાર નીકળી ગયો હોવાનું સામે આવ્યું છે. ઉપરાંત બ્રિજના સ્પાનમાં પણ તિરાડો જોવા મળતાં સુરક્ષા અંગે પ્રશ્નો ઊભા થયા છે.
નિરીક્ષણ છતાં કેમ દેખાઈ ખામી?
તાજેતરમાં સુભાષ બ્રિજની ઘટનાના બાદ શહેરના બ્રિજોની તપાસ કરવામાં આવી હતી. તે દરમિયાન ચીમનલાલ પટેલ બ્રિજનું પણ નિરીક્ષણ કરાયું હતું. તેમ છતાં હવે બ્રિજમાં ખામીઓ સામે આવતાં કોર્પોરેશનની નિરીક્ષણ પ્રક્રિયા અને જાળવણી પર સવાલો ઊભા થયા છે.
કોન્ટ્રાક્ટર એજન્સી સામે તપાસની માંગ
સ્થાનિકો અને નાગરિકોમાં માંગ ઉઠી રહી છે કે નાળું અને બ્રિજ બંનેના બાંધકામ તથા જાળવણીમાં કોઈ બેદરકારી રહી છે કે કેમ તેની ઉચ્ચસ્તરીય તપાસ થવી જોઈએ. ખાસ કરીને લાખો વાહનોની અવરજવર ધરાવતા ચીમનલાલ પટેલ બ્રિજની સલામતીને ધ્યાનમાં રાખીને તાત્કાલિક જરૂરી મરામત અને ટેકનિકલ ઓડિટ કરવાની જરૂરિયાત વ્યક્ત કરવામાં આવી રહી છે.
ઈન્ફ્રાસ્ટ્રક્ચરની ગુણવત્તા પર ફરી સવાલ
એક તરફ માત્ર બે મહિના જૂનું નાળું તૂટી પડવું અને બીજી તરફ શહેરના મહત્વના બ્રિજમાં તિરાડો તથા ફૂટપાથ ખસી જવાની ઘટના સામે આવતાં અમદાવાદ જિલ્લામાં જાહેર ઈન્ફ્રાસ્ટ્રક્ચરની ગુણવત્તા ફરી ચર્ચામાં આવી છે. હવે લોકોની નજર તંત્રની કાર્યવાહી અને તપાસના પરિણામો પર ટકેલી છે.
આ પણ વાંચો: અમદાવાદનો 53 વર્ષ જૂનો સુભાષબ્રિજ તોડાશે, તેની જગ્યાએ બનશે અદ્યતન નવો બ્રિજ
આ પણ વાંચો: પાણી ઓસર્યા છતાં અમદાવાદમાં ટ્રાફિક ઠપ: બ્રિજ અને મુખ્ય માર્ગો પર બંધ પડેલા વાહનોથી કિલોમીટર લાંબો જામ
આ પણ વાંચો: અમદાવાદના સુભાષ બ્રિજના સંપૂર્ણ ડિમોલીશન પર આજે નિર્ણય શક્ય, એપ્રિલ 2027 સુધી લંબાઈ શકે પ્રોજેક્ટ
