New Delhi News : ભારત સરકાર દેશની ઊર્જા સુરક્ષાને વધુ મજબૂત બનાવવા માટે LPG (લિક્વિફાઈડ પેટ્રોલિયમ ગેસ) આયાત (LPG Import)ની વ્યૂહરચનામાં મોટો ફેરફાર કરવાની તૈયારીમાં છે. અત્યાર સુધી ભારત પોતાની મોટાભાગની LPG જરૂરિયાતો માટે મિડલ ઈસ્ટ પર નિર્ભર રહ્યું છે, પરંતુ હવે સરકાર અમેરિકા (USA)થી આયાતમાં નોંધપાત્ર વધારો કરવાની દિશામાં આગળ વધી રહી છે.
25 ટકા LPG અમેરિકાથી આયાત (LPG Import)કરવાનું લક્ષ્ય
સરકારી સૂત્રોના જણાવ્યા અનુસાર, વર્ષ 2027 સુધીમાં ભારત પોતાની કુલ LPG જરૂરિયાતમાંથી લગભગ 25 ટકા LPG અમેરિકાથી આયાત કરવાનો લક્ષ્ય ધરાવે છે. આ પગલાનો મુખ્ય હેતુ માત્ર રસોઈ ગેસની સતત ઉપલબ્ધતા જ નહીં, પરંતુ વૈશ્વિક સંકટની સ્થિતિમાં પણ દેશની સપ્લાય ચેઇનને સુરક્ષિત રાખવાનો છે.
મિડલ ઈસ્ટ પર નિર્ભરતા ઘટાડવાનો પ્રયાસ
હાલમાં ભારત પોતાની લગભગ 90 ટકા LPG જરૂરિયાત મિડલ ઈસ્ટમાંથી પૂરી કરે છે. પરંતુ છેલ્લા કેટલાક વર્ષોમાં સ્ટ્રેટ ઓફ હોર્મુઝ (Strait of Hormuz)માં વધતા ભૂરાજકીય તણાવને ધ્યાનમાં રાખીને સરકારે વૈકલ્પિક સપ્લાય સોર્સ વિકસાવવાનો નિર્ણય લીધો છે.
અંદાજ મુજબ વર્ષ 2027 સુધી દેશમાં LPGની કુલ માંગ આશરે 31 મિલિયન ટન સુધી પહોંચી શકે છે. તેમાં લગભગ 20 મિલિયન ટન LPG આયાત કરવાની જરૂર પડશે. જો તેમાંથી 25 ટકા અમેરિકા પાસેથી આવે, તો દર વર્ષે આશરે 5 મિલિયન ટન LPG અમેરિકાથી ખરીદવામાં આવશે.
ટૂંક સમયમાં બહાર પડશે ટેન્ડર
માહિતી મુજબ ઈન્ડિયન ઓઈલ, ભારત પેટ્રોલિયમ અને હિન્દુસ્તાન પેટ્રોલિયમ આગામી એકથી બે મહિનામાં અમેરિકી LPG ખરીદી માટે ટેન્ડર જાહેર કરી શકે છે. ઉપરાંત જાહેર ક્ષેત્રની તેલ કંપનીઓનું પ્રતિનિધિમંડળ પણ અમેરિકા જઈને લાંબા ગાળાના સપ્લાય કરારો અંગે ચર્ચા કરશે.
ઊર્જા સુરક્ષા સાથે વેપારી સંબંધો પણ મજબૂત થશે
અમેરિકાથી LPG અને ક્રૂડ ઓઈલની ખરીદીમાં વધારો ભારત અને અમેરિકા વચ્ચેના ઊર્જા સહયોગને નવી દિશા આપી શકે છે. સાથે જ બંને દેશો વચ્ચેના વેપાર સંબંધો વધુ મજબૂત બનવાની શક્યતા પણ છે.
અમેરિકા લાંબા સમયથી ભારત સાથેના વેપાર અસંતુલન અંગે ચિંતા વ્યક્ત કરતું રહ્યું છે. ભારત દ્વારા ઊર્જા ઉત્પાદનોની આયાતમાં વધારો થવાથી વેપાર સંતુલન સુધરી શકે છે અને બંને દેશો વચ્ચે ચાલી રહેલી વ્યાપક ટ્રેડ ડીલની ચર્ચાઓને પણ વેગ મળી શકે છે.
હોર્મુઝ સંકટમાં પણ ગેસ સપ્લાય સુરક્ષિત રાખવાનો પ્રયાસ
સરકારની નવી વ્યૂહરચનાનો સૌથી મોટો ફાયદો એ રહેશે કે જો ભવિષ્યમાં સ્ટ્રેટ ઓફ હોર્મુઝ (Strait of Hormuz)માં અવરોધ સર્જાય અથવા મિડલ ઈસ્ટમાંથી સપ્લાય પ્રભાવિત થાય, તો પણ દેશમાં રસોઈ ગેસની ઉપલબ્ધતા જાળવી રાખવામાં મદદ મળશે. આ પગલું ભારતની ઊર્જા સુરક્ષા, સપ્લાય ચેઇનની સ્થિરતા અને વ્યૂહાત્મક ભાગીદારી માટે મહત્વપૂર્ણ માનવામાં આવી રહ્યું છે.
