Sushant Singh Rajput કેસ:મોતના 6 વર્ષ બાદ શ્વેતા સિંહ કીર્તિનો દાવો

Mumbai News : બોલિવૂડ અભિનેતા સુશાંત સિંહ રાજપૂત (Sushant Singh Rajput)ના મોતના છ વર્ષ બાદ તેમનો કેસ ફરી ચર્ચામાં આવ્યો છે. અભિનેતાની બહેન શ્વેતા સિંહ કીર્તિએ પોસ્ટમોર્ટમ સાથે જોડાયેલો ગંભીર દાવો કર્યો છે. જોકે તેમણે આ દાવા સાથે કોઈ પુરાવા રજૂ કર્યા નથી.

શ્વેતાએ શું દાવો કર્યો?

શ્વેતા સિંહ કીર્તિ (Shweta Singh Kirti)એ પોતાના સત્તાવાર સોશિયલ મીડિયા એકાઉન્ટ પરથી એક વીડિયો જાહેર કર્યો છે. તેમાં તેમણે કહ્યું કે સુશાંતનું પોસ્ટમોર્ટમ કરનાર વ્યક્તિએ જણાવ્યું છે કે શરીર પર ઈજાના નિશાન હતા અને બળપ્રયોગ કરાયો હતો. તેમના દાવા મુજબ પગનું હાડકું તૂટેલું હતું, આંખ પાસે ઈજા હતી અને સ્ટન ગનનો ઉપયોગ થયો હતો.

વીડિયોમાં શ્વેતાએ કહ્યું, “અમને થોડા સમય પહેલાં જ જાણવા મળ્યું છે કે ભાઈનું પોસ્ટમોર્ટમ કરનાર વ્યક્તિએ કહ્યું છે કે તેમના પર સ્ટન ગનનો ઉપયોગ કરવામાં આવ્યો હતો.”

ચાહકોને અપીલ

વીડિયોના અંતે શ્વેતાએ ચાહકો (Fans)ને નફરત કે બદલાની ભાવના ન રાખવા અપીલ કરી અને ભગવાન પર વિશ્વાસ રાખવા કહ્યું. કૅપ્શનમાં તેમણે લખ્યું કે તેઓ ન્યાય અને સત્ય માટે લડવાની ના પાડતા નથી, પરંતુ આ લડાઈ પ્રેમની ભાવનાથી લડવી જોઈએ. તેમણે ‘જસ્ટિસ ફોર સુશાંત’ હૅશટૅગનો પણ ઉપયોગ કર્યો છે.

પુરાવા અંગે સ્પષ્ટતા નથી

શ્વેતાએ એ સ્પષ્ટ કર્યું નથી કે પોસ્ટમોર્ટમ કરનાર વ્યક્તિએ તેમની સાથે કે કોઈ સત્તાધિકારી સાથે વાત કરી છે કે નહીં. આ દાવાઓની સ્વતંત્ર રીતે પુષ્ટિ થઈ શકી નથી.

CBIનો ક્લોઝર રિપોર્ટ

સુશાંત 14 જૂન 2020ના રોજ મુંબઈ (Mumbai)ના બાંદ્રા સ્થિત પોતાના ઘરે મૃત હાલતમાં મળી આવ્યા હતા. પોલીસની પ્રાથમિક તપાસમાં ઘટના આત્મહત્યાની હોવાનું જણાયું હતું, પરંતુ પરિવારે તેને હત્યા ગણાવી હતી. પરિવારની ફરિયાદ બાદ તપાસ CBIને સોંપવામાં આવી હતી અને 6 ઑગસ્ટ 2020ના રોજ FIR નોંધાઈ હતી.

લગભગ સાડા ચાર વર્ષ બાદ, માર્ચ 2025માં CBIએ અંતિમ ક્લોઝર રિપોર્ટ દાખલ કર્યો. તેમાં મોતનું કારણ આત્મહત્યા જણાવાયું અને સુશાંતને આત્મહત્યા માટે ઉશ્કેરવામાં આવ્યા હોવાનો કોઈ પુરાવો ન મળ્યાનું નોંધાયું. રિયા ચક્રવર્તી સહિતના લોકોને ક્લીનચિટ આપવામાં આવી.

દિશા સાલિયાન કેસથી ફરી ચર્ચા

સુશાંતના નિધનના છ દિવસ પહેલાં, 8 જૂન 2020ના રોજ, તેમની પૂર્વ મેનેજર દિશા સાલિયાનનું મલાડમાં ઇમારતના 14મા માળેથી પડતાં મૃત્યુ થયું હતું. દિશાના પિતાની માંગ પર આ કેસની તપાસ CBIને સોંપાતાં સુશાંતનો મામલો ફરી ચર્ચામાં આવ્યો છે.