Arvalli News: અરવલ્લીની ગિરિમાળાઓના (Aravalli Hills) સંરક્ષણને લઈને ચાલી રહેલી ચર્ચા વચ્ચે સુપ્રીમ કોર્ટ દ્વારા રચાયેલી હાઈપાવર કમિટીએ (Aravalli High Power Committee) ઈડરના લાલોડા વિસ્તારમાં સ્થળ નિરીક્ષણ કર્યું છે. કમિટીએ ખાણકામ માટેની લીઝમાં પહોંચીને ડુંગરોની હાલની સ્થિતિ અને થયેલા ખોદકામ અંગે સ્થળ પર માહિતી મેળવી હતી.લાલોડા વિસ્તારમાં ડુંગરો પર થયેલા વ્યાપક ખોદકામને લઈને કમિટીએ સમગ્ર વિસ્તારની સ્થિતિનો પ્રત્યક્ષ તાગ મેળવ્યો હતો.
Aravalli High Power Committee: લીઝ વિસ્તારમાં પહોંચી કમિટીએ શું જોયું?
કમિટીની ટીમ લાલોડા વિસ્તારમાં આવેલી ખાણકામની લીઝમાં પહોંચી હતી. અહીં ડુંગરાળ વિસ્તારમાં થયેલા ખોદકામની સ્થિતિનું નિરીક્ષણ કરવામાં આવ્યું હતું.સ્થળ મુલાકાત દરમિયાન કેટલા વિસ્તારમાં ખોદકામ થયું છે, ડુંગરોની હાલની સ્થિતિ કેવી છે અને ખાણકામની પ્રવૃત્તિથી વિસ્તાર પર કેવી અસર થઈ છે તે સહિતની વિગતો મેળવવામાં આવી હતી.
હિંમતનગરમાં કલેક્ટર કચેરી ખાતે બેઠક
લાલોડાની (Laloda) મુલાકાત બાદ હાઈપાવર કમિટી હિંમતનગર પહોંચી હતી. અહીં કલેક્ટર કચેરી ખાતે જિલ્લા કલેક્ટર સહિત વન વિભાગના અધિકારીઓ સાથે બેઠક યોજાઈ હતી.બેઠક દરમિયાન અરવલ્લીની ગિરિમાળાઓની સ્થિતિ, ખાણકામ સાથે જોડાયેલા મુદ્દાઓ અને પર્યાવરણ સંરક્ષણ અંગે ચર્ચા કરવામાં આવી હતી.
પ્રકૃતિપ્રેમીઓ અને સંસ્થાઓની રજૂઆતો
બેઠકમાં માત્ર સરકારી અધિકારીઓની માહિતી જ નહીં, પરંતુ સ્થાનિક પ્રકૃતિપ્રેમીઓ અને સ્વૈચ્છિક સંસ્થાઓના પ્રતિનિધિઓની રજૂઆતો પણ લેવામાં આવી હતી.રજૂઆત દરમિયાન પ્રકૃતિપ્રેમીઓએ અરવલ્લીના પહાડોમાં ખાણકામ અને આડેધડ ખોદકામને કારણે કુદરતી પર્યાવરણને નુકસાન થઈ રહ્યું હોવાની ચિંતા વ્યક્ત કરી હતી. અરવલ્લીની ગિરિમાળાઓને કુદરતી વારસા તરીકે જાળવવા માટે અસરકારક અને કડક પગલાં લેવાની માંગ પણ કરવામાં આવી હતી.
ડુંગરો અને કુદરતી વારસાના સંરક્ષણનો મુદ્દો કેન્દ્રમાં
અરવલ્લીની ગિરિમાળાઓ માત્ર પહાડી વિસ્તાર પૂરતી (Aravalli Mining) મર્યાદિત નથી, પરંતુ તેના પર્યાવરણીય મહત્વને લઈને પણ સતત ચર્ચા થતી રહી છે. ખાણકામના કારણે ડુંગરોના કુદરતી સ્વરૂપમાં ફેરફાર થતો હોવાની રજૂઆતો વિવિધ સ્તરે કરવામાં આવી છે.આ મુદ્દે સ્થાનિક સ્તરે પણ લાંબા સમયથી અવાજ ઉઠાવવામાં આવી રહ્યો છે. ખાસ કરીને ઈડર ગઢ અને આસપાસના ડુંગરાળ વિસ્તારોના સંરક્ષણને લઈને પ્રકૃતિપ્રેમીઓ તથા સ્થાનિક સંગઠનો દ્વારા રજૂઆતો કરવામાં આવી રહી છે.
હવે કમિટીના તારણો પર નજર
લાલોડામાં સ્થળ પર કરાયેલું નિરીક્ષણ અને હિંમતનગરમાં વિવિધ પક્ષો પાસેથી મેળવવામાં આવેલી માહિતી હવે સમગ્ર પ્રક્રિયામાં મહત્વની બની શકે છે.હાઈપાવર કમિટી સ્થળની સ્થિતિ, સરકારી વિભાગોની માહિતી અને સ્થાનિકો તથા પ્રકૃતિપ્રેમીઓની રજૂઆતોનો અભ્યાસ કર્યા બાદ આગળની પ્રક્રિયા હાથ ધરશે.હવે અરવલ્લીની ગિરિમાળાઓના સંરક્ષણ માટે કમિટી શું ભલામણ કરે છે અને ખાણકામ સંબંધિત મુદ્દે આગળ કઈ કાર્યવાહી થાય છે તેના પર સ્થાનિકો તેમજ પર્યાવરણપ્રેમીઓની નજર રહેશે.
@દિપકસિંહ રાઠોડ
આ પણ વાંચો: અરવલ્લી ગિરિમાળાને લઈને સુપ્રીમ કોર્ટની કમિટી મેદાનમાં, સ્થાનિકો અને અધિકારીઓ સાથે કરશે બેઠક
આ પણ વાંચો: સાબરકાંઠામાં 2.30 લાખ વૃક્ષોનું વાવેતર, વન વિભાગ આપશે 10 ફૂટ ઊંચા તૈયાર રોપા
આ પણ વાંચો: ‘અરવલ્લી ગ્રીન વોલ પ્રોજેક્ટ’ : પર્યાવરણ દિન નિમિત્તે વડાપ્રધાન નરેન્દ્રભાઈ મોદીની ગુજરાતને મોટી ભેટ
