Indian Railways: સૌરાષ્ટ્રથી હરિદ્વાર જવા માટે રેલવે કનેક્ટિવિટી સુધરવાની આશા (Haridwar Train Service) રાખતા મુસાફરોને હજુ રાહ જોવી પડી રહી છે. હરિદ્વાર-વેરાવળ અને હરિદ્વાર-ઓખા વચ્ચે નવી AC એક્સપ્રેસ ટ્રેનો શરૂ કરવાની મંજૂરી મળ્યાના ત્રણ મહિના બાદ પણ ટ્રેનો શરૂ થવાની તારીખ જાહેર થઈ નથી. દિવાળી નજીક આવી હોવા છતાં આ સેવાઓ શરૂ ન થતાં મુસાફરોમાં નિરાશા જોવા મળી રહી છે.

Haridwar Train Service: રેલવે બોર્ડની મંજૂરી છતાં અમલ બાકી

રેલવે બોર્ડની 30 જુલાઈ, 2026ના રોજ યોજાયેલી બેઠકમાં હરિદ્વાર-વેરાવળ (Haridwar Veraval Train) અને હરિદ્વાર-ઓખા (Haridwar Okha Train) વચ્ચે નવી AC એક્સપ્રેસ સેવાઓ શરૂ કરવાની મંજૂરી (New AC Express Train) આપવામાં આવી હતી. આ નિર્ણયથી સૌરાષ્ટ્રના મુસાફરોને સોમનાથ અને દ્વારકા જેવા ધાર્મિક સ્થળોથી હરિદ્વાર સુધીની મુસાફરીમાં સુવિધા મળવાની આશા જાગી હતી.

ટ્રેન નંબર, સંભવિત સમયપત્રક અને સ્ટોપેજની વિગતો પણ જાહેર કરવામાં આવી હતી. જોકે, મંજૂરી મળ્યા બાદ પણ ટ્રેનો કઈ તારીખથી દોડશે તે અંગે સ્પષ્ટતા કરવામાં આવી નથી. રેલવે બોર્ડના પરિપત્ર મુજબ, ટ્રેનો શરૂ કરવાની તારીખ સંબંધિત રેલવે ઝોન દ્વારા જાહેર કરવાની છે.

ટિકિટ બુકિંગ ક્યારે શરૂ થશે?

ટ્રેનો શરૂ થવામાં વિલંબ થતાં મુસાફરોમાં અનેક સવાલો ઊભા થયા છે. મુસાફરોની માગ છે કે રેલવે તંત્રએ ટ્રેનો શરૂ કરવાની તારીખ, ટિકિટ બુકિંગની શરૂઆત અને વિલંબ થતો હોય તો તેનું કારણ જાહેર કરવું જોઈએ. મંજૂરીની જાહેરાત બાદ હવે ટ્રેન સેવા વાસ્તવમાં શરૂ થાય તેની રાહ જોવાઈ રહી છે.

હરિદ્વાર-વેરાવળ ટ્રેનનું પ્રસ્તાવિત સમયપત્રક

રેલવે બોર્ડ દ્વારા મંજૂર કરાયેલા પ્રસ્તાવિત સમયપત્રક મુજબ, ટ્રેન નંબર 14326 હરિદ્વારથી સવારે 4 વાગ્યે ઉપડી બીજા દિવસે સવારે 8:15 વાગ્યે વેરાવળ પહોંચવાની છે. જ્યારે પરત ટ્રેન નંબર 14325 વેરાવળથી સવારે 11:05 વાગ્યે ઉપડી બીજા દિવસે સાંજે 6 વાગ્યે હરિદ્વાર પહોંચવાની યોજના છે.

આ સેવા બંને દિશામાં અઠવાડિયામાં બે દિવસ ચલાવવાની દરખાસ્ત છે.

હરિદ્વાર-ઓખા ટ્રેનની વિગતો

બીજી સેવા હેઠળ ટ્રેન નંબર 14328 હરિદ્વારથી શુક્રવારે સવારે 4 વાગ્યે ઉપડી બીજા દિવસે સવારે 8:15 વાગ્યે ઓખા પહોંચવાની પ્રસ્તાવિત છે. પરત ટ્રેન નંબર 14327 ઓખાથી શનિવારે સવારે 10:20 વાગ્યે ઉપડવાની યોજના છે.

આ સેવા અઠવાડિયામાં એક દિવસ ચલાવવાની દરખાસ્ત છે. જોકે, આ સમયપત્રક મુજબ ટ્રેનો ક્યારથી શરૂ થશે અને ટિકિટ બુકિંગ ક્યારે ખુલશે તે અંગે સત્તાવાર જાહેરાતની રાહ જોવાઈ રહી છે.

આ પણ વાંચો: રેલવે મુસાફરો માટે મોટા સમાચાર; મોદી કેબિનેટે 7 હાઇ-ડેન્સિટી રૂટને ફોર-લેન મંજૂરી આપી

આ પણ વાંચો: યુપીમાં પહેલી બુલેટ ટ્રેન, દિલ્હીથી કાશીનું અંતર માત્ર 3.5 કલાકમાં

આ પણ વાંચો: ખેડા કલેક્ટરની અધ્યક્ષતામાં મહત્ત્વપૂર્ણ સંકલન બેઠક : ધારાસભ્યએ પ્ર્શ્ન કર્યો કે કોરોનાકાળથી બંધ ટ્રેનો શરૂ ક્યારે શરૂ કરાશે?