Rajkot News: રાજકોટમાં માત્ર ₹60 હજારની લેતીદેતીના વિવાદમાં એક વ્યક્તિનું મોત (Rajkot Murder Case) થતાં પરિવાર પર દુઃખનો પહાડ તૂટી પડ્યો છે. ભાવનગર રોડ પર આવેલા કુબલીયાપરા વિસ્તારમાં ત્રણ સગા ભાણેજોએ પોતાના જ મામા પર હુમલો કર્યો હતો. આ દરમિયાન એક ભાણેજે છરીથી હુમલો કરતાં મામા ગંભીર રીતે ઘાયલ થયા હતા. હોસ્પિટલમાં સારવાર દરમિયાન તેમનું મોત નીપજ્યું હતું. પોલીસે ત્રણેય ભાણેજોની ધરપકડ કરી વધુ તપાસ હાથ ધરી છે.

Rajkot Murder Case: સાત મહિના પહેલાં સારવાર માટે લીધા હતા ₹60 હજાર

મળતી માહિતી મુજબ, કુબલીયાપરા વિસ્તારમાં રહેતા 52 વર્ષીય ચીના જાડેજા શાકભાજીનો વ્યવસાય કરીને પરિવારનું ગુજરાન ચલાવતા હતા. આશરે સાત મહિના પહેલાં હૃદયની બીમારીની સારવાર માટે તેમણે પોતાના ભાણેજ કમલેશ ઉર્ફે યોગો પરમાર પાસેથી ₹60 હજાર ઉછીના લીધા હતા. ધંધામાં મંદી હોવાના કારણે તેઓ સમયસર આ રકમ પરત કરી શક્યા નહોતા. આ મુદ્દે કમલેશ અવારનવાર નાણાંની ઉઘરાણી (₹60000 Dispute) કરતો હતો.

ઉઘરાણી દરમિયાન મામા પર હુમલો

ગત 2 નવેમ્બરના રોજ સાંજે આશરે 7:30 વાગ્યે ચીના જાડેજા કુબલીયાપરા વિસ્તારમાં ચંદ્રિકા પાન પાસે હાજર હતા. ત્યારે તેમના ત્રણ ભાણેજ કમલેશ ઉર્ફે યોગો પરમાર, વિજય પરમાર અને અમિત ઉર્ફે હોજરી પરમાર ત્યાં પહોંચ્યા હતા. ત્રણેયે ₹60 હજાર પરત આપવા મુદ્દે બોલાચાલી શરૂ કરી હતી.

ચીના જાડેજાએ હાલ નાણાંની વ્યવસ્થા ન હોવાનું અને સગવડ થતાં જ રકમ પરત આપી દેવાની વાત કરી હતી. આ દરમિયાન વિવાદ ઉગ્ર બનતાં ત્રણેયે તેમની સાથે મારામારી કરી હતી. આરોપ છે કે કમલેશે પોતાની પાસેથી છરી કાઢીને ચીનાના ડાબા પડખામાં ઘા કર્યો હતો. ત્યારબાદ ત્રણેય ત્યાંથી ફરાર થઈ ગયા (Gujarat Crime News) હતા.

સારવાર દરમિયાન મોત, પરિવાર પર શોક

ઘટનાની જાણ થતાં ચીનાની પુત્રી, પત્ની અને અન્ય પરિવારજનો સ્થળ પર પહોંચ્યા હતા. ગંભીર હાલતમાં તેમને પ્રથમ સિવિલ હોસ્પિટલ અને ત્યારબાદ વધુ સારવાર માટે ખાનગી હોસ્પિટલમાં ખસેડવામાં આવ્યા હતા. જોકે, રાત્રે સારવાર દરમિયાન તેમનું મોત થયું હતું. ચીના જાડેજાને છ પુત્ર અને બે પુત્રી મળી કુલ આઠ સંતાનો છે.

ત્રણેય ભાણેજોની ધરપકડ

પોલીસની પ્રાથમિક તપાસમાં મૃતક ચીના જાડેજા અગાઉ પ્રોહિબિશન અને મારામારી સહિતના ગુનાઓમાં નોંધાયેલા હોવાનું સામે આવ્યું છે. ત્રણેય આરોપીઓનો પણ ગુનાહિત ઇતિહાસ હોવાનું પોલીસ તપાસમાં જાણવા મળ્યું છે. થોરાળા પોલીસે ત્રણેય ભાણેજોની ધરપકડ (Nephews Arrested) કરી છે. સારવાર દરમિયાન ચીના જાડેજાનું મોત થતાં હત્યાની કલમ ઉમેરવા કોર્ટમાં રિપોર્ટ કરવાની કાર્યવાહી પણ હાથ ધરવામાં આવી છે. હાલ સમગ્ર મામલે વધુ તપાસ ચાલી રહી છે.

આ પણ વાંચો: રાજકોટમાં 60 હજારની લેતીદેતીમાં લોહિયાળ ખેલ: કુબલીયાપરામાં ચીનાભાઈ જાડેજાની હત્યા, ત્રણ ઝડપાયા

આ પણ વાંચો: સુરતમાં મળ્યો માથા વગરનો નગ્ન હાલતમાં મૃતદેહ, મિત્રએ જ મિત્રની હત્યા કરી શરીરના બે ટુકડા કર્યા

આ પણ વાંચો: સુરતમાં અમરોલીમાં ઘરકામ અને મોબાઈલ બાબતે પુત્રીએ જ પિતાની કરી હત્યા, આરોપી પુત્રી જ્યુડિશિયલ કસ્ટડીમાં