Dwarka News: વિક્રમ સંવતના નૂતન વર્ષની શરૂઆત સાથે જ સુપ્રસિદ્ધ યાત્રાધામ દ્વારકામાં ભક્તિનો માહોલ છવાઈ (Dwarka Temple Crowd) ગયો છે. નવા વર્ષના પ્રથમ દિવસે રાજાધિરાજ શ્રી દ્વારકાધીશનાં દર્શન કરવા દેશભરમાંથી હજારોની સંખ્યામાં ભાવિકો જગત મંદિરે ઉમટી પડ્યા હતા. ‘જય દ્વારકાધીશ’ના જયઘોષથી મંદિર પરિસર ગુંજી ઊઠ્યું હતું. બીજી તરફ, દિવાળી વેકેશન અને પ્રવાસીઓના ધસારાને પગલે શહેરના હોટલ, રેસ્ટોરન્ટ અને સ્થાનિક વેપાર-ધંધામાં પણ નવી રોનક જોવા મળી રહી છે.
Dwarka Temple Crowd: મંગળા આરતીથી જ દર્શન માટે લાંબી કતારો
નવા વર્ષના (New Year Devotees) પ્રથમ દિવસે વહેલી સવારની મંગળા આરતીથી જ જગત મંદિરમાં (Dwarkadhish Temple) દર્શન માટે ભક્તોની લાંબી કતારો જોવા મળી હતી. પોતાના પરિવારની સુખ, શાંતિ અને સમૃદ્ધિ માટે પ્રાર્થના કરવા આવેલા શ્રદ્ધાળુઓથી મંદિર તરફ જતા મુખ્ય માર્ગો, ગોમતી ઘાટ અને ઐતિહાસિક બજારો ધમધમી ઊઠ્યાં હતાં. ભક્તોની વધતી અવરજવરને ધ્યાનમાં રાખીને શહેરમાં ટ્રાફિક અને સુરક્ષા વ્યવસ્થા પણ ચુસ્ત રાખવામાં આવી હતી.
દિવાળી વેકેશનમાં આસપાસનાં પ્રવાસન સ્થળોએ પણ ધસારો રહેવાની શક્યતા
શાળા-કોલેજોના દિવાળી વેકેશન અને નવા વર્ષની રજાઓને કારણે દ્વારકામાં પ્રવાસીઓની સંખ્યામાં વધારો થવાની સંભાવના છે. જગત મંદિર ઉપરાંત બેટ દ્વારકા, શિવરાજપુર બીચ (Shivrajpur Beach) , નાગેશ્વર જ્યોતિર્લિંગ અને રૂક્ષ્મણી મંદિર જેવા ધાર્મિક તથા પ્રવાસન સ્થળોએ પણ આગામી દિવસોમાં મોટી સંખ્યામાં પ્રવાસીઓ પહોંચે તેવી શક્યતા છે.
સ્થાનિક વેપારીઓને વેકેશન સીઝનથી આશા
પ્રવાસીઓની (Diwali Vacation Tourism) વધતી સંખ્યા દ્વારકાના સ્થાનિક અર્થતંત્ર માટે આશાસ્પદ બની રહી છે. હોટલ, ગેસ્ટહાઉસ અને ધર્મશાળાઓમાં બુકિંગનો ધસારો જોવા મળી રહ્યો છે. રેસ્ટોરન્ટ અને સ્થાનિક ખાણીપીણીનાં સ્થળો પર પણ પ્રવાસીઓની અવરજવર વધી છે. આ ઉપરાંત પ્રસાદી, પૂજાસામગ્રી, હસ્તકળાની વસ્તુઓ અને સ્મૃતિચિહ્નો વેચતા વેપારીઓ તેમજ ટેક્સી અને ઓટોરિક્ષા જેવા ખાનગી વાહનવ્યવસાય સાથે સંકળાયેલા લોકોને પણ પ્રવાસનથી લાભ થવાની આશા છે. લાંબા સમયથી ધીમી ગતિએ ચાલતા વેપાર-ધંધાને દિવાળી વેકેશન દરમિયાન વેગ મળશે તેવી સ્થાનિક વેપારી વર્ગને અપેક્ષા છે.
આ પણ વાંચો: ‘જય અંબે’, ‘હર હર મહાદેવ’ના નાદ સાથે નવા વર્ષની શરૂઆત: ચાર યાત્રાધામોમાં ભક્તોની ભીડ
આ પણ વાંચો: વલસાડનાં શ્રીનાથજી અને ગાદીજી મંદિરમાં અન્નકૂટ સખડી ઉત્સવ
આ પણ વાંચો: દિવાળીની રજામાં સરથાણા નેચરલ પાર્ક હાઉસફુલ: એક જ દિવસમાં 16 હજારથી વધુ પ્રવાસીઓ
