National News: સામાન્ય રીતે વધતી વસ્તીને નિયંત્રણમાં રાખવા માટે ‘હમ દો, હમારે દો’ જેવા નારા આપવામાં આવે છે, ત્યારે મધ્યપ્રદેશના એક કોંગ્રેસી ધારાસભ્યના (Congress MLA) નિવેદને નવી ચર્ચા જગાવી છે. અનુપપુર જિલ્લાના પુષ્પરાજગઢના ધારાસભ્ય ફુંડેલાલાલ સિંહ માર્કોએ (Fundelal Singh Marko) આદિવાસી પરિવારોને ઓછામાં ઓછાં પાંચ બાળકો પેદા કરવાની અપીલ કરી છે. બિરસા મુંડાની જન્મજયંતિ નિમિત્તે યોજાયેલા એક કાર્યક્રમમાં તેમણે આ નિવેદન આપ્યું હતું.
Fundelal Singh Marko: બૈગા, સહરિયા અને ભૂમિયા જાતિઓની ઘટતી વસ્તી પર ચિંતા
અનુપપુર જિલ્લાના પુષ્પરાજગઢ વિધાનસભા મતવિસ્તાર હેઠળના ગ્રામ પંચાયત દૂધીના હરા ગામમાં બિરસા મુંડાની જન્મજયંતિ નિમિત્તે કાર્યક્રમ યોજાયો હતો. તેમાં હાજરી આપવા પહોંચેલા ધારાસભ્ય ફુંડેલાલાલ માર્કોએ સભાને સંબોધતાં બૈગા, સહરિયા અને ભૂમિયા સહિતની આદિવાસી જાતિઓની ઘટતી વસ્તી અંગે ચિંતા વ્યક્ત કરી હતી.
તેમણે જણાવ્યું હતું કે આ જાતિઓની વસ્તીમાં સતત ઘટાડો થઈ રહ્યો છે, જે સમાજ માટે ચિંતાનો વિષય છે. આગામી વસ્તી ગણતરીના આંકડા જાહેર થશે ત્યારે આદિવાસી સમુદાયની વસ્તીનું વાસ્તવિક ચિત્ર સામે આવશે.
સરકારી નસબંધી યોજનાઓ અંગે પણ સવાલ ઉઠાવ્યા
ધારાસભ્યએ પોતાના સંબોધનમાં સરકારી નસબંધી યોજનાઓ અંગે પણ સવાલો ઉઠાવ્યા હતા. તેમના જણાવ્યા મુજબ, સરકારના નસબંધીના લક્ષ્યાંકો મુખ્યત્વે આદિવાસી સમુદાયના લોકો દ્વારા જ પૂર્ણ કરવામાં આવે છે, જ્યારે અન્ય સમુદાયોના લોકો આ યોજનાઓનું એટલું પાલન કરતા નથી. તેમણે કહ્યું કે હાલ આદિવાસી સમુદાયે પોતાની ઘટતી વસ્તી અંગે ગંભીરતાથી વિચારવાની જરૂર છે.
‘ઓછામાં ઓછાં પાંચ બાળકો પેદા કરો’
ધારાસભ્ય માર્કોએ ભવિષ્યમાં લગ્ન કરનારા યુવાનો અને આદિવાસી પરિવારોને ઓછામાં ઓછાં પાંચ બાળકો પેદા કરવાની અપીલ (Five Children Appeal) કરી હતી. જોકે, આ દરમિયાન તેમને પોતાને માત્ર બે બાળકો હોવા અંગે સવાલ કરવામાં આવ્યો હતો. તેના જવાબમાં તેમણે કહ્યું હતું કે જ્યારે તેમણે પોતાનો પરિવાર વધાર્યો હતો ત્યારે આદિવાસી વસ્તીની સ્થિતિ અલગ હતી, પરંતુ હવે વસ્તી દર સતત ઘટી રહ્યો છે. તેમણે સ્પષ્ટતા કરી હતી કે તેમનો યુગ અલગ હતો અને હાલનો સમય અલગ છે.
વસ્તી ઘટવાથી અનામત અને રાજકીય ભાગીદારી પર અસરની ચિંતા
ધારાસભ્યએ આદિવાસી સમુદાયની ઘટતી વસ્તીથી (Tribal Population) ભવિષ્યમાં ઊભા થઈ શકે તેવા પડકારો અંગે પણ ચિંતા વ્યક્ત કરી હતી. તેમના મતે, વસ્તીમાં ઘટાડો ચાલુ રહેશે તો ભવિષ્યમાં સમુદાયને મળતા અનામત અને સામાજિક-રાજકીય ભાગીદારી પર અસર થઈ શકે છે.
તેમણે આશંકા વ્યક્ત કરી હતી કે આ જ સ્થિતિ રહી તો આદિવાસી સમુદાયો પોતાના જ વિસ્તારોમાં લઘુમતી બની શકે છે. આથી સમુદાયે અત્યારથી જ પોતાના ભવિષ્ય અંગે જાગૃત થવાની જરૂર હોવાનું તેમણે જણાવ્યું હતું.
આ પણ વાંચો: ગુજરાતમાં 2027નું રાજકારણ આદિવાસી પટ્ટા પર કેન્દ્રિત, 46 બેઠકો માટે ત્રણ પક્ષો સક્રિય
આ પણ વાંચો: આદિવાસી વિસ્તારોમાં જમીનના પ્રશ્નોનો આવશે ઉકેલ? સરકાર નવી SOP લાવવાની દિશામાં
આ પણ વાંચો: ઝારખંડમાં આદિવાસી મહિલાની ક્રૂર હત્યા, શરીરના અંગો કઢાઈમાં રાંધ્યાનો આરોપ
