Gujarat News : બ્રિટિશ એરવેઝની ફ્લાઈટમાં મૂળ ગુજરાતની એક પ્રેગ્નેન્ટ મહિલા પર હુમલો થયો હોવાની ઘટના સામે આવી છે. આ મહિલાએ દાવો કર્યો છે કે બ્રિટિશ એરવેઝની ફ્લાઈટમાં અન્ય એક પેસેન્જર દ્વારા તેના પર હુમલો કરવામાં આવ્યો હતો. જોકે, તેના માટે વધુ આઘાતજનક વાત એ હતી કે એરલાઈન્સે તેની માફી તરીકે એક શેમ્પેઈનની બોટલ ઓફર કરી હતી. પારૂલ પટેલ નામની 35 વર્ષીય પ્રેગ્નેન્ટ મહિલા એમ્સ્ટર્ડેમ ગઈ હતી અને ત્યાંથી તે લંડન પરત ફરી રહી હતી અને તેની ફ્લાઈટ હિથ્રો એરપોર્ટ પર લેન્ડ થવાની હતી. તેનું કહેવું છે કે તે જ્યારે પ્લેનમાંથી ઉતરવાની રાહ જોઈ રહી હતી ત્યારે એક શખસે તેને ધક્કો માર્યો હતો.
પોતાના ઉપર થયેલા હુમલાથી મહિલા અઘાત પામી હતી પરંતુ તેણે શક્ય તેટલી ઝડપથી એરલાઈનના સ્ટાફના સભ્યનો સંપર્ક કર્યો હતો. જોકે, ત્યાં તેને વધુ મોટો આઘાત લાગ્યો હતો કેમ કે તેમણે મહિલાને માફી તરીકે શેમ્પેઈનની બોટલ આપવામાં આવી હતી. પારુલ પટેલ હર્ટફોર્ડશાયરના વોટફોર્ડમાં રહે છે અને તે એક બિઝનેસ એનાલિસ્ટ છે. તે પોતાના પાર્ટનર ધીરેન રાઘવાણી સાથે હતી. જોકે, ધીરેન આગળ જતો રહ્યો હતો. પારુલ પટેલે જણાવ્યું હતું કે, મને લાગ્યું હતું કે આ વ્યક્તિ મને નુકસાન પહોંચાડશે. તેણે મને ધક્કો માર્યો હતો.પારુલ અને ધીરેન તેમના મિત્રને મળવા માટે એમ્સ્ટર્ડેમ ગયા હતા અને 19 ઓગસ્ટના રોજ લંડન પરત ફરી રહ્યા હતા ત્યારે આ ઘટના બની હતી. પારુલનું કહેવું છે કે તેમની ટ્રિપ ઘણી આનંદદાયક રહી હતી પરંતુ તેનો અંત દુઃસ્વપ્ન જેવો આવ્યો. પારુલ પટેલનું કહેવું છે તે સાંજે લગભગ ચાર વાગ્યાની આસપાસ પ્લેન છોડવાની રાહ જોઈ રહી હતી ત્યારે એક શખસ આવ્યો હતો અને તેણે તેને ધક્કો માર્યો હતો.
તેણે બહાર જવા માટે મને રસ્તામાંથી હટાવવા માટે ધક્કો માર્યો હતો. પારૂલે તે પણ કહ્યું હતું કે, તે શખશે તેને એવું પણ કહ્યું હતું કે તે તેના મોઢા પર મુક્કો પણ મારી શકે છે. આ ઘટનાથી પારુલને મોટો આઘાત લાગ્યો હતો. એટલું જ નહીં તે શખશે પારુલ પર શાબ્દિક પ્રહારો પણ કર્યા હતા અને ગાળો બોલીને તેને ધમકીઓ પણ આપી હતી.કેબિન ક્રુની એક સભ્યએ પારુલને સાંત્વના આપવાનો પ્રયાસ કર્યો હતો પરંતુ આ ઘટનાથી પારુલને ડરી ગઈ હતી અને આઘાતમાં હતી. પારુલે કેબિન ક્રુને સિક્યોરિટીને બોલાવવાનું કહ્યું હતું. તેણે કહ્યું હતું કે, હું આઘાતમાં હતી અને રડી રહી હતી અને માંડમાંડ બોલી શકતી હતી. મને તે નહતું સમજાયું કે તેણીએ મને શેમ્પેઈનની બોલટ શા માટે આપી હતી. જો ખરાબ કસ્ટમર સર્વિસ વિશે વાત કરી હોત અને તેણીએ મને બોટલ આપી હોત તો સમજી શકાય તેમ હતું. પરંતુ અહીં તો મારા પર હુમલો થયો હતો.પારુલનું કહેવું છે કે સ્ટાફને આ ઘટનાની જાણ કરવામાં આવી હોવા છતાં તેમણે તેને ગંભીરતાથી લીધી ન હતી.
જ્યારે તેણીએ એરલાઈન સાથે ફોલોઅપ કર્યું ત્યારે તેની 50 પાઉન્ડનું વાઉચર ઓફર કરવામાં આવ્યું હતું. પારુલનું કહેવું છે કે આ કોઈ ફ્લાઈડ મોડી થઈ હોય કે પછી લગેજ ખોવાઈ ગયો હોય તેવી ઘટના ન હતી. આ એક ગંભીર હુમલો હતો. તે હજી આ આઘાતમાંથી બહાર ન હતી આવી ત્યાં અરાઈવલ્સ હોલમાં પણ તે શખસ પારુલ સામે આવી ગયો હતો. તેણીએ કહ્યું હતું કે, ત્યારે મારો પાર્ટનર પણ મારી સાથે હતો. હું ગભરાઈ ગઈ હતી અને મને ખરેખર લાગ્યું કે આ માણસ મને અને મારા બાળકને નુકસાન પહોંચાડશે. તે શખસે ત્યારે પણ મને ધમકી આપી હતી.જોકે, પોલીસે પણ પારુલને વધારે મદદ કરી ન હતી. તે શખસે વારંવાર ધમકીઓ આપી હોવા છતાં અને તેનું આક્રમક વલણ હોવા છતાં પોલીસે પારુલને કહ્યું હતું કે પોલીસ તે શખસ સામે પગલાં લેવા સક્ષમ નથી. પારુલે દાવો કર્યો હતો કે પોલીસે તેને કહ્યું હતું કે તેમને નથી લાગતું કે તેણે કંઈ કર્યું છે. આ ઘટના બાદ પોતાની મનોસ્થિતિ ઘણી ખરાબ થઈ ગઈ હતી અને તે એક સપ્તાહ સુધી બરાબર ઊંઘી શકી ન હતી. પારુલ હવે કોઈની પણ સાથે તકરાર કરવામાં ડર અનુભવી રહી છે અને તે મહિલાઓની સુરક્ષાને લઈને પણ ચિંતિત છે.
આ પણ વાંચો: ફૂડ એન્ડ ડ્રગ ઇન્સ્પેક્ટર મહેશ બક્ષીની લાંચના આરોપમાં ધરપકડ
આ પણ વાંચો: ACBની સફળ ટ્રેપ, બહુમાળી ફલેટના વેચાણમાં લેવાતી લાંચનો ભાંડો ફૂટયો
