વિશ્વના ટોચના અબજોપતિઓની યાદીમાં કમાણીની બાબતમાં ભારતીય ઉદ્યોગપતિ ગૌતમ અદાણી ફરી એકવાર જોરદાર વાપસી કરતા જોવા મળી રહ્યા છે. અદાણી ગ્રુપની કંપનીઓના શેરમાં છેલ્લા ત્રણ ટ્રેડિંગ દિવસથી મજબૂત વૃદ્ધિ જોવા મળી રહી છે. આ કારણે અદાણીની નેટવર્થમાં પણ ઉછાળો જોવા મળી રહ્યો છે. છેલ્લા 24 કલાકમાં ગૌતમ અદાણીની નેટવર્થ $9 બિલિયનથી વધુ વધી છે.
ફોર્બના રિયલ ટાઈમ બિલિયોનેર્સ ઈન્ડેક્સ અનુસાર, ગૌતમ અદાણીએ છેલ્લા 24 કલાકમાં $9.3 બિલિયન અથવા લગભગ રૂ. 77,000 કરોડથી વધુની કમાણી કરી છે. અદાણીના શેરમાં મંગળવારે 23 મેના રોજ સતત ત્રીજા દિવસે શેરબજારમાં તોફાની ઉછાળો નોંધાયો હતો. દરમિયાન, અદાણી પાવર અને અદાણી ગ્રીન સહિતની પાંચ ગ્રૂપ કંપનીઓના શેરમાં અપર સર્કિટ લાગી હતી, જ્યારે અદાણી એન્ટરપ્રાઈઝ 14 ટકા અને અદાણી વિલ્મર 10 ટકા વધ્યા હતા. આ સિવાય ગૌતમ અદાણીના તમામ શેર લીલા નિશાન પર બંધ થયા હતા. આ તેજીના કારણે ગ્રૂપનું માર્કેટ કેપિટલાઇઝેશન 10 લાખ કરોડ રૂપિયાને વટાવી ગયું છે.
ફોર્બ્સ અનુસાર, ગત વર્ષ 2022માં ગૌતમ અદાણી કમાણીના મામલામાં વિશ્વના તમામ અમીરોમાં સૌથી આગળ હતા અને મંગળવારે તેઓ આવી જ કમબેક કરતા જોવા મળ્યા હતા. વાસ્તવમાં, એક દિવસમાં કમાણીની દ્રષ્ટિએ, અદાણીએ વિશ્વના નંબર વન અમીર બર્નાર્ડ આર્નોલ્ટ અને બીજા સૌથી ધનવાન એલોન મસ્ક સહિત ઘણા અનુભવી અબજોપતિઓને પાછળ છોડી દીધા છે. એક તરફ, સમાચાર લખાય છે ત્યાં સુધી, 24 કલાકમાં, ગૌતમ અદાણીએ $ 9.3 બિલિયનનો નફો નોંધાવ્યો છે. તે સમયે, એલોન મસ્કની નેટવર્થ $5.7 બિલિયન વધી હતી, બર્નાર્ડ આર્નોલ્ટની સંપત્તિમાં $5.8 બિલિયનનો વધારો થયો હતો.એટલે કે તે કમાણીમાં આ બંને અબજોપતિઓ કરતાં આગળ હતા. આ સિવાય લેરી પેજ ($1.9 બિલિયન) અને સર્ગેઈ બ્રિન ($1.8 બિલિયન) પણ તેમનાથી ઘણા પાછળ હતા.