@વિશાલ મહેતા(અમદાવાદ) : અમદાવાદ સાઇબર ક્રાઇમના ડીસીપી અમિત વસાવાએ જણાવ્યુ હતુ કે, નુપુર શર્માના પ્રકરણ બાદ મલેશીયા અને ઇન્ડોનેશીયાના હેકર દ્વારા વિશ્વના મોટા ભાગના મુસ્લિમ હેકરને ભારત વિરુધ્ધ ઉશ્કેરી એક સાઇબર વોરની ઘોષણા કરી હતી. જેના લીધે ઘણી બધી ભારતીય વેબસાટ્સ અને નેટવર્કને હેક કરવામાં આવ્યા હતા. સાઇબર ક્રાઇમે ઇન્ટર્ન અને એન્જિનિયરિંગના વિદ્યાર્થીઓના માર્ગદર્શન હેઠળ આવી ઇન્ડોનેશીયન 100 અને મલેશીયન 70 વેબસાઇટની ટેકનિકલ ખામીઓ અથવા બગ્સ એથીકલ હેકીંગ દ્વારા શોધી કાઢી હતી. કેન્દ્ર સરકારની મદદથી તેમની સરકારને આ અંગે જાણ કરવામાં આવેલ છે અને પથ્થરનો જવાબ ફુલથી આપેલા છે. બીજી તરફ ભારત સરકારની 80 જેટલી સરકારી વેબસાઇટને પણ સુરક્ષીત કરવા માટે જરુરી સુચનો એનસીઆઇઆઇપીટીને રિપોર્ટ કર્યો હતો.
આમ હેકર દ્વારા વેબસાઇટ નષ્ટ કરવા અથવા ડેટા ચોરી કરવા માટે થઇ શકે છે. આ બગ્સ દેશોની સરકારોની પરવાનગી લીધા બાદ મળી આવ્યા છે અને તેમને પ્રુફ સાથે જાણ કરવામાં આવી છે, કેટલીક ભુલો જટીલ હતી. બગ્સવાળી વેબસાઇટ સરકારના ઘણા મહત્વપૂર્ણ મંત્રાલયો, શૈક્ષણિક સંસ્થા, ઉદ્યોગ વગેરેને આવરી લે છે. જોકે હેકર ગ્રુપ દ્વારા સાઇબર યુધ્ધ માટે મલેશિયન નેશનલ સાઇબર કોઓર્ડિનેશન એન્ડ કમાન્ડ સેન્ટર દ્વારા યોગદાન માટે આભાર વ્યક્ત કર્યો હતો. અમારી ટીમ ડ્રેગન ફોર્સ મલેશિયાના હેકર્સ અને ગરુડા ઇન્ડોનેશિયાના હેકટીવિસ્ટ બંનેની ઓળખ શોધવા માટે તેની તકનીકી ક્ષમતાઓનો પણ ઉપયોગ કરી રહી છે. આઈપી એડ્રેસ જેવી વિગતો તેમની સામે વધુ કાનૂની કાર્યવાહી કરવા માટે ઈન્ટરપોલ સાથે સાઇબર ક્રાઇમે શેર કરી હતી.
ભારતની 80 વેબસાઇટની ખામી પણ સાઇબરે શોધી, પીએમઓને જાણ કરી
સાઇબર ક્રાઇમની ટીમે 80 થી વધુ ભારત સરકારની વેબસાઈટોમાં ઘણી નબળાઈઓ પણ શોધી કાઢી છે અને પીએમઓ હેઠળની નેશનલ ક્રિટિકલ ઈન્ફોર્મેશન ઈન્ફ્રાસ્ટ્રક્ચર પ્રોટેક્શન સેન્ટર (એનસીઆઇઆઇપીસી) ને તેની જાણ કરી છે.
નુપુર શર્મા વિવાદ બાદ હેકરોએ સાઇબર યુધ્ધ શરુ કર્યું
નુપુર શર્માના વિવાદ પછી, મલેશિયાના ડ્રેગન ફોર્સ અને ઇન્ડોનેશિયાના ગરુડાના હેકટીવિસ્ટ, વિશ્વભરના મુસ્લિમ હેકરોને ભારત અને ભારતીય લોકો સામે સાયબર-યુદ્ધ શરૂ કરવા માટે હાકલ કરી હતી. આવા હેકર જૂથો વચ્ચે સાયબર-યુદ્ધ શરૂ કરવા માટેના આવા કોલ સોશિયલ મીડિયા પર વ્યાપક પણે ફેલાયેલા હતા. જેને પણ સાઇબર ક્રાઇમે શોધી કાઢ્યા છે. નુપુર શર્માની વિગતો જેમાં સરનામું, ઈમેલ આઈડી, સંપર્ક નંબર વગેરે કેટલીક સરકારી વેબસાઈટ પરથી લીક થઈ હતી.
મલેશિયા ગ્રુપે 2 હજાર વેબસાઇટ હેક કરી,પાસપોર્ટ, આધાર-પાન કાર્ડ પણ લીક
મલેશિયાના ડ્રેગન ફોર્સીઓ અને ઇન્ડોનેશિયાના ગરુડાના હેક્ટિવિસ્ટોએ 2000થી વધુ ભારતીય વેબસાઇટ્સ હેક કરવાનો દાવો કર્યો છે. જેમાં સરકારી વિભાગ, શૈક્ષણિક સંસ્થાઓ, વ્યવસાયો અને ઉદ્યોગો વગેરેનો સમાવેશ થાય છે. આવી વેબસાઇટ્સમાંથી ગોપનીય ડેટા લીક કરવામાં આવ્યો છે. જેમાં સરકારી ફાઇલો અને ડેટા, અમુક વ્યક્તિઓના આધાર કાર્ડ, કેટલાક નાગરિકોના પાનકાર્ડ અને પાસપોર્ટની વિગતો, આંધ્રપ્રદેશ પોલીસના પોલીસકર્મીઓની વિગતો, ડીસટીવીના ડેટા સહિત અનેક વિગતો લીક કરી દીધી છે.
આ પણ વાંચો : હવે ગમે એટલી મોટી ગણેશ મૂર્તિની સ્થાપના કરી શકો છો : જાણો રાજ્ય સરકારે ક્યાં નિયંત્રણ દૂર કર્યા
