Ahmedabad News:શિયાળાના ઠંડા મોસમમાં અમદાવાદ શહેરમાં વહેલી સવારથી ગાઢ ધુમ્મસ (dense fog) છવાઈ ગયો છે, જેના કારણે સરદાર વલ્લભભાઈ પટેલ આંતરરાષ્ટ્રીય એરપોર્ટ (SVPI Airport) પર હવાઈ સેવાઓ પર વ્યાપક અસર પડી છે. ઓછી વિઝિબિલિટીને કારણે અંદાજે 30 જેટલી ફ્લાઇટ્સ (Flight) પર અસર જોવા મળી છે, જેમાં કેટલીક ફ્લાઇટ્સ રદ્દ થઈ છે તો કેટલીકમાં લાંબો વિલંબ થયો છે.એરપોર્ટ સૂત્રો અને હવામાન વિભાગના જણાવ્યા અનુસાર, આજે સવારે વિઝિબિલિટી ખૂબ ઓછી રહી હતી, જેના કારણે ઉત્તર ભારતના વિવિધ શહેરોમાંથી આવતી-જતી ફ્લાઇટ્સ (Flight) સૌથી વધુ પ્રભાવિત થઈ છે. ખાસ કરીને દિલ્હી, શિમલા અને શ્રીનગર જેવા ઠંડા વિસ્તારોમાં તાજેતરમાં થયેલી હિમવર્ષા અને ગાઢ ધુમ્મસને કારણે કેટલીક ફ્લાઇટ્સ (Flight)ને રદ્દ કરવાની ફરજ પડી છે.
ફ્લાઇટ્સ (Flight) રદ્દ થતાં મુસાફરોની મુશ્કેલી વધી
આ ઉપરાંત પટના, જયપુર સહિતના અન્ય શહેરોમાંથી આવતી-જતી અનેક ફ્લાઇટ્સ (Flight) 2થી 5 કલાક સુધી મોડી થઈ છે.આ ઘટનાઓથી મુસાફરોને ભારે મુશ્કેલીનો સામનો કરવો પડ્યો છે. ફ્લાઇટ્સના અચાનક રદ્દ થવા અને લાંબા વિલંબને કારણે એરપોર્ટ પર અફરાતફરીનો માહોલ જોવા મળ્યો હતો. મુસાફરો લાંબા સમય સુધી વેઇટિંગ એરિયામાં રાહ જોતા રહ્યા, જ્યારે કેટલાકને અન્ય વિકલ્પો શોધવા પડ્યા. એરલાઇન્સના સ્ટાફ દ્વારા મુસાફરોને માહિતી આપવાના પ્રયાસો કરવામાં આવ્યા હતા, પરંતુ ધુમ્મસની અણધારી સ્થિતિને કારણે પરિસ્થિતિ નિયંત્રણમાં રાખવી મુશ્કેલ બની હતી.
હવામાન વિભાગના અહેવાલ મુજબ, આગામી કેટલાક દિવસો સુધી ઉત્તર અને પશ્ચિમ ભારતના ભાગોમાં ગાઢ ધુમ્મસ અને ઠંડીની સ્થિતિ યથાવત રહેવાની શક્યતા છે. આવી સ્થિતિમાં અમદાવાદ એરપોર્ટ સહિત અનેક એરપોર્ટ પર હવાઈ સેવાઓ પર અસર ચાલુ રહી શકે છે. હવામાન વિભાગે ચેતવણી આપી છે કે સવારના સમયે વિઝિબિલિટી 50થી 200 મીટર સુધી ઘટી શકે છે, જે ફ્લાઇટ ઓપરેશન્સ માટે પડકારરૂપ બની રહેશે.
