Ahmedabad Krishiv Dani CBSE Result: બોર્ડની પરીક્ષામાં સારા માર્ક્સ લાવવા માટે આજકાલ વાલીઓ અને વિદ્યાર્થીઓ લાખો રૂપિયા ટ્યુશન ક્લાસ પાછળ ખર્ચતા હોય છે. પરંતુ, અમદાવાદના એક તેજસ્વી વિદ્યાર્થીએ સાબિત કરી દીધું છે કે જો સચોટ આયોજન, સેલ્ફ-ડિસિપ્લિન અને સ્વ-અભ્યાસ (Self-Study) હોય તો કોઈ પણ કોચિંગ ક્લાસ વિના બોર્ડની પરીક્ષામાં ડંકો વગાડી શકાય છે. અમદાવાદની એશિયા ઇંગ્લિશ સ્કૂલના ક્રિશિવ અચ્યુત દાણીએ CBSE ધોરણ 12 (કોમર્સ) માં 96.2% મેળવીને શાનદાર સિદ્ધિ હાંસલ કરી છે.
Ahmedabad: કોઈ પણ કોચિંગ વિના 3 વિષયમાં પૂરેપૂરા માર્ક્સ
ગુરુકુળ વિસ્તારમાં આવેલી એશિયા ઇંગ્લિશ સ્કૂલમાં અભ્યાસ કરતા ક્રિશિવ દાણીની આ સિદ્ધિ એટલા માટે મોટી છે કારણ કે તેણે કોઈ પણ ટ્યુશન કે કોચિંગ ઇન્સ્ટિટ્યૂટનો સહારો લીધો નહોતો. શાળાના શિક્ષણ અને પોતાની મહેનતના આધારે તેણે ત્રણ મુખ્ય વિષયોમાં સંપૂર્ણ ગુણ પ્રાપ્ત કર્યા છે.
- એકાઉન્ટન્સી (Accountancy): 100/100
- એન્ટરપ્રેન્યોરશિપ (Entrepreneurship): 100/100
- આર્ટિફિશિયલ ઇન્ટેલિજન્સ (AI): 100/100
- ઇંગ્લિશ કોર (English Core): 98/100
પોતાની આ સફળતા વિશે વાત કરતા ક્રિશિવે જણાવ્યું કે, “મેં કોઈ ટ્યુશન રાખ્યું નહોતું. પહેલેથી જ ચોક્કસ પ્લાનિંગ સાથે તૈયારીઓ કરી હોવાથી પરીક્ષા વખતે મેં કોઈ જ માનસિક ભાર કે ટેન્શન અનુભવ્યું નહોતું.”
માતા-પિતાના પગલે ચાલીને ભવિષ્યમાં બનવું છે CA
ક્રિશિવના પરિવારમાં શિક્ષણનું ખૂબ સારું વાતાવરણ છે. તેના માતા અને પિતા બંને ચાર્ટર્ડ એકાઉન્ટન્ટ (CA) છે. હવે ક્રિશિવની ઈચ્છા પણ તેના માતા-પિતાની જેમ ભવિષ્યમાં સફળ CA બનવાની છે.
ભણતરની સાથે ચેસમાં પણ નેશનલ લેવલનો ખેલાડી
ક્રિશિવ માત્ર પુસ્તકિયું જ્ઞાન જ નથી ધરાવતો, પરંતુ તે એક ઉત્તમ રમતવીર પણ છે. 12માં ધોરણના અભ્યાસની સાથે સાથે તેણે સ્પોર્ટ્સમાં પણ પોતાનું કૌશલ્ય બતાવ્યું છે. વર્ષ 2022-23 માં ક્રિશિવ ચેસ (Chess) ની રમતમાં નેશનલ લેવલ (રાષ્ટ્રીય કક્ષા) સુધી રમી ચૂક્યો છે.
