Ahmedabad News : અમદાવાદને ફાટકમુક્ત બનાવવાની યોજના સામે મોટો પડકાર ઊભો થયો છે. શહેરનાં 9 રેલવે ક્રોસિંગ (Ahmedabad Railway Crossing)પર ઓવરબ્રિજ કે અંડરબ્રિજ બનાવવા માટે પૂરતી જગ્યા ઉપલબ્ધ ન હોવાથી આ યોજના આગળ વધારવામાં મુશ્કેલીઓ પડી રહી છે. ક્યાંક સાંકડા રસ્તા અને એપ્રોચ રોડની અછત છે, તો ક્યાંક ભૂગર્ભમાં પાણી-ગટરની લાઇનો અને ઉપર મેટ્રો કોરિડોર નડતરરૂપ બની રહ્યાં છે. જોકે, મણિનગર અને વટવા-વિંઝોલ ક્રોસિંગ પર ઓવરબ્રિજ બનાવવાની પ્રક્રિયા રેલવે દ્વારા શરૂ કરવામાં આવી છે.
અમદાવાદના 9 રેલવે ક્રોસિંગ પર બ્રિજ બનાવવાનું મુશ્કેલ
રેલવે ફાટક બંધ થતાં વાહનચાલકોને લાંબા સમય સુધી રાહ જોવી પડે છે. ટ્રાફિકની સમસ્યા વધવાની સાથે અકસ્માતનું જોખમ પણ રહે છે. આ સમસ્યાનો ઉકેલ લાવવા રેલવે દ્વારા વિવિધ ક્રોસિંગ પર ઓવરબ્રિજ અને અંડરબ્રિજ બનાવવાની યોજના તૈયાર કરવામાં આવી છે. જોકે, અમદાવાદમાં 9 જેટલાં ક્રોસિંગ પર આ યોજનાને જમીન પર ઉતારવામાં માળખાકીય અડચણો સામે આવી છે.
રેલવે દ્વારા મ્યુનિસિપલ કોર્પોરેશન અને સંબંધિત સત્તામંડળોને બ્રિજ બનાવવા માટે પ્રસ્તાવ મોકલવામાં આવ્યા છે. પરંતુ કેટલાક સ્થળે બ્રિજ સુધી પહોંચવા માટે જરૂરી એપ્રોચ રોડ બનાવવા પૂરતી જગ્યા નથી. અનેક વિસ્તારોમાં ભૂગર્ભની યુટિલિટી લાઇનો અને મેટ્રો કોરિડોરને કારણે પણ બાંધકામ મુશ્કેલ બન્યું છે.
મણિનગર અને વટવા-વિંઝોલમાં ઓવરબ્રિજની પ્રક્રિયા શરૂ
અમદાવાદ-વડોદરા રેલવે સેક્શન પર આવેલા એલસી-308 મણિનગર અને એલસી-305 વટવા-વિંઝોલ ક્રોસિંગ પર ટ્રેનો તથા વાહનોની અવરજવર વધુ રહે છે. ટ્રેન પસાર થતી વખતે ફાટક બંધ થતાં વાહનચાલકોને મુશ્કેલીનો સામનો કરવો પડે છે.
આ બંને ક્રોસિંગ પર ઓવરબ્રિજની જરૂરિયાત હોવા છતાં સાંકડા રસ્તા અને પૂરતી જગ્યા ન હોવાનો મુદ્દો સામે આવ્યો છે. મ્યુનિસિપલ કોર્પોરેશન દ્વારા બાંધકામમાં મુશ્કેલીઓ દર્શાવવામાં આવી છે. તેમ છતાં, રેલવેના ગતિશક્તિ વિભાગે બંને સ્થળે ઓવરબ્રિજ બનાવવા માટેની પ્રક્રિયા શરૂ કરી છે.
અસારવા અને નરોડામાં પણ યોજના અટવાઈ
અમદાવાદ-હિંમતનગર રેલવે સેક્શન પર આવેલા એલસી-1 અસારવા ક્રોસિંગ પર ઓવરબ્રિજ બનાવવાનો પ્રસ્તાવ મૂકવામાં આવ્યો છે. જોકે, અહીં ટીપી રોડ સાંકડો હોવાથી અને એપ્રોચ રોડ માટે પૂરતી જગ્યા ન મળતી હોવાથી યોજના આગળ વધારવામાં મુશ્કેલી છે.
બીજી તરફ, એલસી-10 નરોડા જીઆઇડીસી ક્રોસિંગ પર ઓવરબ્રિજ બનાવવાની દરખાસ્ત પણ આગળ વધી શકી નથી. જીઆઇડીસી દ્વારા પ્રસ્તાવ સ્વીકારવામાં ન આવતાં આ સ્થળે બ્રિજ બનાવવાની યોજના અટવાઈ છે.
પાંચ ક્રોસિંગ પર મેટ્રો કોરિડોર અને ભૂગર્ભ લાઇનોનું નડતર
સાબરમતી-બોટાદ રેલવે સેક્શન પર અમદાવાદના પાંચ ક્રોસિંગ પણ બ્રિજ નિર્માણ માટે પડકારરૂપ બન્યા છે. તેમાં એલસી-8 વિજયનગર, એલસી-9 સંઘવી હાઈસ્કૂલ, એલસી-10 નારણપુરા, એલસી-12 નવરંગપુરા અને એલસી-18 ભુદરપુરા ક્રોસિંગનો સમાવેશ થાય છે.
આ સ્થળોએ ઓવરબ્રિજ કે અંડરબ્રિજ બનાવવા માટે પ્રસ્તાવ મોકલવામાં આવ્યા છે, પરંતુ પૂરતી જગ્યા અને સંબંધિત સત્તામંડળોની મંજૂરીના અભાવે કામગીરી આગળ વધી શકી નથી. ભૂગર્ભમાં પાણી અને ગટરની લાઇનો હોવાથી અંડરબ્રિજ બનાવવો મુશ્કેલ છે. જ્યારે ઉપર મેટ્રો કોરિડોર હોવાથી ઓવરબ્રિજના બાંધકામમાં પણ અડચણો છે.
અમદાવાદ ફાટકમુક્ત ક્યારે બનશે?
અમદાવાદને ફાટકમુક્ત બનાવવાનો મુખ્ય હેતુ ટ્રાફિકની સમસ્યા ઘટાડવાનો, વાહનચાલકોનો સમય બચાવવાનો અને રેલવે ક્રોસિંગ પર સુરક્ષા વધારવાનો છે. પરંતુ શહેરનાં નવ ક્રોસિંગ પર જગ્યા અને માળખાકીય મર્યાદાઓને કારણે યોજના સામે પ્રશ્નો ઊભા થયા છે.
મણિનગર અને વટવા-વિંઝોલમાં બ્રિજની પ્રક્રિયા શરૂ થઈ છે, જ્યારે અન્ય સ્થળોએ સંબંધિત સત્તામંડળોની સંમતિ અને વ્યવહારુ ઉકેલ જરૂરી બનશે. હવે સાંકડા રસ્તા, મેટ્રો કોરિડોર અને ભૂગર્ભની લાઇનો વચ્ચે અમદાવાદના રેલવે ક્રોસિંગ પર ટ્રાફિકની સમસ્યાનો ઉકેલ કેવી રીતે લાવવામાં આવે છે તે જોવાનું રહેશે.
આ પણ વાંચો: ફાટકમુક્ત ગુજરાત’ માટે રેલવે મંત્રાલયનો આભાર વ્યક્ત કરતા મુખ્યમંત્રી
આ પણ વાંચો: ફાટકમુકત ગુજરાત અભિયાને પકડી સ્પીડ : આ શહેરો થશે હવે રેલ્વેફાટક વગરનાં
આ પણ વાંચો: વિવિધ રેલ્વે ફાટકની મુલાકાત લેતા મ્યુનિ.કમિશનર અમિત અરોરા
