New Delhi News: સંરક્ષણ મંત્રાલયની મંજૂરી મળ્યા બાદ 34 એડવાન્સ લાઇટ હેલિકોપ્ટર (ALH)-ધ્રુવ ટૂંક સમયમાં ભારતીય સેનામાં જોડાવા જઈ રહ્યા છે. સંરક્ષણ મંત્રાલયે તેમાંથી ભારતીય સેના માટે 25 હેલિકોપ્ટર (ALH) ધ્રુવ MK III અને ભારતીય કોસ્ટ ગાર્ડ માટે 09 હેલિકોપ્ટર (ALH)ના સંપાદન માટે રૂ. 8073.17 કરોડના સંયુક્ત મૂલ્યના બે કરાર પર હસ્તાક્ષર કર્યા છે. તેનાથી ભારતીય સેનાની તાકાત અનેક ગણી વધી જશે. આ હેલિકોપ્ટર તમામ પ્રકારની આધુનિક ટેક્નોલોજીથી સજ્જ છે અને તમામ હવામાન પરિસ્થિતિઓમાં કામગીરી કરવા સક્ષમ છે.
જાણો તેની વિશેષતા
ALH-ધ્રુવને હિન્દુસ્તાન એરોનોટિક્સ લિમિટેડ દ્વારા સ્વદેશી ટેક્નોલોજીનો ઉપયોગ કરીને વિકસાવવામાં આવ્યું છે. તેમાં 2 એન્જિન છે. તેનો વિકાસ 1984માં જ શરૂ થયો હતો. પરંતુ તેના લશ્કરી સંસ્કરણને 2002 માં પ્રમાણપત્ર મળ્યું. વર્ષ 2022 સુધીમાં HAL દ્વારા 336 ધ્રુવ હેલિકોપ્ટરનું ઉત્પાદન કરવામાં આવ્યું છે. તે શરૂઆતમાં જર્મનીની મેસેરશ્મિટ-બોલ્કો-બ્લોહમ (MBB) કંપની સાથે ડિઝાઇન કરવામાં આવ્યું હતું. તેના મુખ્ય પ્રકારો ધ્રુવ MK-I, MK-II, MK-III અને MK-IV છે. ALH-ધ્રુવનું ઉત્પાદન લશ્કરી સેવાઓને ધ્યાનમાં રાખીને તૈયાર કરવામાં આવ્યું છે અને તેને પરિવહન, જાસૂસી અને તબીબી સ્થળાંતર જેવા કાર્યો માટે ડિઝાઇન કરવામાં આવ્યું છે.
તેનો ઉપયોગ કોઈપણ સિઝનમાં કરી શકાય છે. તેમાં ફીટ કરેલ પાવર એન્જીન મહત્તમ ઉંચાઈ પર કામ કરવા અને વધારાની પેલોડ ક્ષમતા પૂરી પાડવાના ઉદ્દેશ્યો પૂરા કરે છે. તેને ડુંગરાળ અને દુર્ગમ અને કઠોર વિસ્તારોમાં પણ તૈનાત કરી શકાય છે. આ હેલિકોપ્ટર શોધ અને બચાવ, સૈન્ય પરિવહન, આંતરિક કાર્ગો, જાસૂસી કે જાનહાનિ થતાં લોકોનું સ્થળાંતર માટે રચાયેલ છે. સંરક્ષણ મંત્રાલયના અધિકારીઓએ કહ્યું છે કે આ હેલિકોપ્ટરે સિયાચીન ગ્લેશિયર અને લદ્દાખ જેવા ઊંચાઈવાળા વિસ્તારોમાં પોતાનું શ્રેષ્ઠ પ્રદર્શન સાબિત કર્યું છે.
આ હેલિકોપ્ટરની ખાસિયત એ છે કે તે રાત્રે પણ ખૂબ જ સરળતાથી સૈન્ય ઓપરેશન કરી શકે છે. આ માટે હેલિકોપ્ટરને ગ્લોસ કોકપિટ અને એડવાન્સ એવિઓનિક્સથી સજ્જ કરવામાં આવ્યું છે. દરિયાની સપાટીથી હિમાલયની ઊંચાઈઓ સુધીની વિવિધ ઊંચાઈએ અને અતિશય તાપમાનમાં રણ વિસ્તારો સહિત વાતાવરણમાં કામ કરવા માટે કાર્ક્ષમ હેલિકોપ્ટર છે.
આ હેલિકોપ્ટરના એડવાન્સ વર્ઝનમાં પણ હથિયારોનો ઉપયોગ કરી શકાય છે. તેનું અપગ્રેડેડ વર્ઝન ALH-રુદ્ર છે, જે હેલ્મેટ પોઈન્ટિંગ સિસ્ટમ (HPS), ઈલેક્ટ્રો ઓપ્ટિક પોડ અને ઈલેક્ટ્રોનિક વોરફેર સૂટ સાથે જોડાયેલ સેલ્ફ-પ્રોટેક્શન સિસ્ટમ જેવી મિશન સિસ્ટમ્સ સાથે ફીટ છે. રુદ્રમાં 20 એમએમ ટરેટ ગન, 70 એમએમ રોકેટ, એર-ટુ-એર મિસાઇલ અને એન્ટિ-ટેન્ક ગાઇડેડ મિસાઇલો લગાવવામાં આવી છે. આ ડિજિટલ મૂવિંગ મેપ ઓન બોર્ડ ઇનર્ટ ગેસ જનરેશન સિસ્ટમથી પણ સજ્જ છે.
ધ્રુવ હેલિકોપ્ટરની વિશેષતા એ છે કે લેટિન અમેરિકાથી લઈને આફ્રિકા, પશ્ચિમ અને દક્ષિણ – પૂર્વ એશિયાના લગભગ 35 દેશોએ તેમાં રસ દાખવ્યો છે. ઘણા દેશોએ તેને ખરીદવાની ઈચ્છા પણ વ્યક્ત કરી છે. ઘણા દેશોએ તેનું પ્રદર્શન જોવા માટે પણ વિનંતી કરી છે.
આ પણ વાંચો:લોકસભા ચૂંટણી માટે બીજેપીની બીજી યાદી જાહેર, જાણો ગુજરાતમાં કોને મળી તક
આ પણ વાંચો:અક્ષરધામ મંદિર હુમલાના માસ્ટરમાઇન્ડનો 22 વર્ષ બાદ સામે આવ્યો વીડિયો
આ પણ વાંચો:2019 થી અત્યાર સુધી ખરીદ્યા 22,217 ઈલેક્ટોરલ બોન્ડ, 22,030 રોકડ: SCમાં SBIનું એફિડેવિટ
