Gir Somnath News:ગુજરાતના પવિત્ર તીર્થસ્થાન પ્રભાસ પાટણ સ્થિત જ્યોતિર્લિંગ સોમનાથ મંદિર ખાતે ચાલી રહેલા પાંચ દિવસીય કાર્તિકી પૂર્ણિમા મહોત્સવના અંતિમ દિવસે જમ્મુ-કાશ્મીરના માનનીય લેફ્ટનન્ટ ગવર્નર મનોજ સિન્હાજીનું આગમન થયું હતું. ઉપ રાજ્યપાલનું ભવ્ય સ્વાગત ગીર સોમનાથ જિલ્લા કલેક્ટર એચ.એસ. પટેલ, સોમનાથ ટ્રસ્ટના જનરલ મેનેજર  સગરભાઈ રબારી તથા ટ્રસ્ટી મંડળના સભ્યો દ્વારા કરવામાં આવ્યું હતું.

કલેક્ટર, સોમનાથ ટ્રસ્ટ જનરલ મેનેજર દ્વારા કરાયું સ્વાગત

મનોજ સિન્હાએ સૌપ્રથમ ભગવાન સોમનાથના (Somnath) દર્શન કરી મહા-આરતીમાં હાજરી આપી અને દેશની સમૃદ્ધિ તેમજ વિશ્વ કલ્યાણ માટે પ્રાર્થના કરી હતી.ત્યારબાદ તેમણે મંદિર પરિસરમાં યોજાયેલા વિશાળ સાંસ્કૃતિક કાર્યક્રમનું ઉદ્ઘાટન કર્યું.લેફ્ટનન્ટ ગવર્નરે પરંપરાગત રીતે દીપ પ્રાગટ્ય કરીને ગુજરાતની (Gujarat) લોકસંસ્કૃતિના પ્રતીક એવા લોકડાયરાનો શુભારંભ કરાવ્યો હતો. આ પ્રસંગે રાજ્યભરમાંથી આવેલા પ્રખ્યાત લોકકલાકારોએ ગરબા, રાસ, ભવાઈ અને લોકગીતોની રંગીન રજૂઆત કરીને ઉપસ્થિત હજારો શ્રદ્ધાળુઓને મંત્રમુગ્ધ કરી દીધા હતા.

સોમનાથના કાર્તિકી પૂર્ણિમાના મેળામાં ઉપ રાજ્યપાલ પહોંચ્યા

કાર્તિકી પૂર્ણિમાના પવિત્ર સ્નાન માટે રવિવારે સવારથી જ અરબી સમુદ્રના દરિયા કિનારે અને સોમનાથ મંદિરમાં લાખો શ્રદ્ધાળુઓની ભીડ ઉમટી પડી હતી.ટ્રસ્ટ તંત્ર દ્વારા જાહેર કરવામાં આવેલા આંકડા મુજબ એક જ દિવસમાં 5 લાખથી વધુ યાત્રાળુઓએ મહાદેવના દર્શન કર્યા હતા.

જિલ્લા વહીવટીતંત્ર અને સોમનાથ ટ્રસ્ટ દ્વારા દર્શન માટે ખાસ કતાર વ્યવસ્થા, પીવાનું પાણી, મેડિકલ કેમ્પ, સીસીટીવી નિગરાની તેમજ સુરક્ષા જવાનોની ગોઠવણ કરવામાં આવી હતી, જેના કારણે એક પણ અનિચ્છનીય બનાવ વિના મેળો સફળતાપૂર્વક પૂર્ણ થયો છે.

મેળાના છેલ્લા દિવસે હજારો લોકોની જનમેદની ઉમટી પડી

આ પ્રસંગે લેફ્ટનન્ટ ગવર્નર મનોજ સિન્હાએ જણાવ્યું હતું કે, “સોમનાથ જ્યોતિર્લિંગ એ ભારતની આસ્થા અને સંસ્કૃતિનું જીવંત પ્રતીક છે. કાર્તિકી પૂર્ણિમાના આ પવિત્ર અવસરે અહીં આવવું એ મારા જીવનની અમૂલ્ય ક્ષણ છે.”પાંચ દિવસ સુધી ચાલેલા આ મહોત્સવમાં કુલ 15 લાખથી વધુ શ્રદ્ધાળુઓએ ભાગ લીધો હતો, જે સોમનાથ ટ્રસ્ટના ઇતિહાસમાં નવો રેકોર્ડ બન્યો છે.

આ પણ વાંચો: ગીર સોમનાથ: ઉના પાલિકા સભ્યના પુત્ર જીવલેણ હુમલો

આ પણ વાંચો: ગીર સોમનાથમાં અજાણ્યા ટ્રક ચાલકે બાઇક ચાલકને કચડી નાખ્યો

આ પણ વાંચો: ગીર સોમનાથમાં રેતીના કાળા ધંધા પર કડક કાર્યવાહી, ઉનામાં બે ટ્રેક્ટર સીઝ