ભારતીય ટીમના સ્ટાર સ્પિનર રવિચંદ્રન અશ્વિનને ‘ICC મેન્સ ટેસ્ટ પ્લેયર ઓફ ધ એવોર્ડ’ માટે નોમિનેટ કરવામાં આવ્યો છે. આ વર્ષે અશ્વિને ટેસ્ટ ક્રિકેટમાં સૌથી વધુ વિકેટ લઈને ખળભળાટ મચાવ્યો છે. આઈસીસીના જણાવ્યા અનુસાર આ એવોર્ડ માટે કુલ 4 ખેલાડીઓને નોમિનેટ કરવામાં આવ્યા છે. આ ચારેય ખેલાડીઓએ આ વર્ષે ટેસ્ટ ક્રિકેટમાં શાનદાર પ્રદર્શન કરીને હેડલાઇન્સ બનાવી છે.
ભારતના સ્પિનર રવિચંદ્રન અશ્વિન, ઈંગ્લેન્ડના કેપ્ટન જો રૂટ, ન્યુઝીલેન્ડના ઓલરાઉન્ડર કાઈલી જેમીસન અને શ્રીલંકાના ટેસ્ટ સુકાની દિમુથ કરુણારત્નેને ICC મેન્સ ટેસ્ટ પ્લેયર ઓફ ધ યર 2021 એવોર્ડ માટે નામાંકિત કરવામાં આવ્યા છે. સૌથી લાંબા ફોર્મેટમાં ભારતના સૌથી મહાન મેચ-વિનર્સમાંના એક, આર અશ્વિને, 2021 માં ફરીથી વિશ્વના શ્રેષ્ઠ સ્પિનરોમાંના એક તરીકે પોતાની સત્તાનો દાવો કર્યો. બોલ સાથેની તેની જાદુગરી ઉપરાંત, અશ્વિને બેટથી પણ અમૂલ્ય યોગદાન આપ્યું.
આ પણ વાંચો:ગુજરાત / કોરોનાના ભય વચ્ચે શાળાઓમાં ઘટી વિદ્યાર્થીઓની સંખ્યા
આ ICC એવોર્ડ એવા ખેલાડીઓને આપવામાં આવે છે જેમણે એક વર્ષમાં ટેસ્ટ ક્રિકેટમાં સારું પ્રદર્શન કર્યું હોય. રવિચંદ્રન અશ્વિન, જો રૂટ, કાયલ જેમિસન અને દિમુથ કરુણારત્નેએ આ વર્ષે સારો દેખાવ કર્યો છે. આવો એક નજર કરીએ આ ખેલાડીઓના પ્રદર્શન પર.
રવિચંદ્રન અશ્વિન આ વર્ષે ટેસ્ટ ક્રિકેટમાં સૌથી વધુ વિકેટ લેનાર બોલર છે. તેણે અત્યાર સુધી આઠ મેચમાં 52 વિકેટ ઝડપી છે. જ્યારે તેણે 337 રનનું યોગદાન પણ આપ્યું છે જેમાં એક સદી સામેલ છે. અશ્વિને ન્યૂઝીલેન્ડ સામેની અગાઉની શ્રેણીમાં 2 મેચમાં 14 વિકેટ ઝડપી હતી. આશા છે કે તેઓ દક્ષિણ આફ્રિકામાં પણ સારો દેખાવ કરશે.
ઈંગ્લેન્ડના કેપ્ટન જો રૂટ આ વર્ષે ટેસ્ટ ક્રિકેટમાં સૌથી વધુ રન બનાવનાર બેટ્સમેન છે. તેણે અત્યાર સુધી 15 ટેસ્ટ મેચમાં 6 સદીની મદદથી 1708 રન બનાવ્યા છે. એક કેલેન્ડર વર્ષમાં 1700 થી વધુ રન બનાવનાર તે ત્રીજો ખેલાડી છે. મોહમ્મદ યુસુફ નંબર વન અને વિવિયન રિચર્ડ્સ બીજા નંબર પર છે.
આ પણ વાંચો:ગુજરાત / અંધ મહિલાએ અવાજથી બળાત્કારના આરોપીને ઓળખી કાઢ્યો અને પછી….
આ વર્ષે ટેસ્ટ ક્રિકેટમાં ન્યૂઝીલેન્ડના ખેલાડી કાયલ જેમિસનનું પ્રદર્શન પણ ઘણું સારું રહ્યું છે. તેણે પાંચ મેચમાં 27 વિકેટ લીધી છે. જ્યારે 105 રનનું યોગદાન પણ રહ્યું છે.
શ્રીલંકાના ખેલાડી દિમુથ કરુણારત્ને માટે પણ વર્ષ 2021 ઘણું સારું રહ્યું છે. અત્યાર સુધી સાત મેચમાં કરુણારત્નેના બેટથી 902 રન બન્યા છે. આ દરમિયાન તેણે ચાર સદી પણ ફટકારી છે.
