ઓસ્ટ્રેલિયાએ લાહોરમાં રમાયેલી ત્રીજી ટેસ્ટ મેચમાં પાકિસ્તાનને 115 રને હરાવીને ટેસ્ટ શ્રેણી પર કબજો કર્યો હતો. આ જીત સાથે પેટ કમિન્સની આગેવાની હેઠળની ઓસ્ટ્રેલિયન ટીમે ICC વર્લ્ડ ટેસ્ટ ચેમ્પિયનશિપ પોઈન્ટ ટેબલમાં ટોચનું સ્થાન જાળવી રાખ્યું છે. બીજી તરફ બાબર આઝમની પાકિસ્તાની ટીમ આ હાર બાદ ચોથા નંબરે સરકી ગઈ છે.
હાલમાં ઓસ્ટ્રેલિયા પાસે 75 ટકા છે જ્યારે પાકિસ્તાન પાસે 52.38 ટકા છે. ઓસ્ટ્રેલિયા આ એડિશનમાં અત્યાર સુધી એક પણ મેચ હારી નથી. રેન્કિંગમાં ભારત અને દક્ષિણ આફ્રિકાને સૌથી મોટો ફાયદો મળ્યો છે. ભારતીય ટીમ 58.33 ટકા માર્ક્સ સાથે ત્રીજા સ્થાને પહોંચી છે. ટીમ ઈન્ડિયાએ અત્યાર સુધી અગિયારમાંથી છ મેચ જીતી છે અને તેના 77 પોઈન્ટ છે. હવે દક્ષિણ આફ્રિકાની ટીમ બીજા નંબરે છે.
વર્લ્ડ ટેસ્ટ ચેમ્પિયનશિપની આ આવૃતિ 2021 થી 2023 સુધી ચાલશે. ટીમને ટેસ્ટ મેચ જીતવા પર 12 પોઈન્ટ, મેચ ડ્રો થવા પર 4 પોઈન્ટ અને મેચ ટાઈ થવા પર 6 પોઈન્ટ મળશે. તે જ સમયે, મેચ જીતવા માટે 100 ટકા માર્ક્સ ઉમેરવામાં આવશે, ટાઈના કિસ્સામાં 50 ટકા, ડ્રોના કિસ્સામાં 33.33 ટકા અને હાર પર શૂન્ય ટકા. બે મેચની સીરીઝમાં કુલ 24 પોઈન્ટ અને પાંચ મેચની સીરીઝમાં 60 પોઈન્ટ્સ મળશે.
વર્તમાન ટેસ્ટ ચેમ્પિયનશિપમાં, ભારતે હવે જુલાઈ મહિનામાં અંગ્રેજી ધરતી પર ટેસ્ટ મેચમાં ભાગ લેવો પડશે. ત્યારબાદ નવેમ્બર-ડિસેમ્બરમાં બાંગ્લાદેશ પ્રવાસ પર બે મેચ રમવાની રહેશે. ત્યારે આગામી વર્ષે ટીમ ઈન્ડિયા ઘરઆંગણે ઓસ્ટ્રેલિયા સામે ચાર મેચ રમવા જઈ રહી છે.
પાકિસ્તાનની ધરતી પર ઓસ્ટ્રેલિયાની આ માત્ર ત્રીજી ટેસ્ટ શ્રેણી જીત છે. પાકિસ્તાનને ચોથી ઇનિંગમાં જીતવા માટે 351 રન બનાવવાના હતા. પરંતુ અંતિમ દિવસે તેની આખી ટીમ 235 રનમાં ઓલઆઉટ થઈ ગઈ હતી. ઈમામ-ઉલ-હકે 70 અને બાબર આઝમે 55 રનનું યોગદાન આપ્યું હતું. ઓસ્ટ્રેલિયા તરફથી નાથન લિયોને 5 અને પેટ કમિન્સે ત્રણ વિકેટ ઝડપી હતી.