Surat News: બાંદ્રા ટર્મિનસથી ભુજ જઈ રહેલી ટ્રેનના AC કોચમાંથી દારૂ (Liquor Smuggling Train)નો મોટો જથ્થો મળી આવતાં રેલવે સુરક્ષા વ્યવસ્થા સામે સવાલો ઊભા થયા છે. ટ્રેન નંબર 09037 સુપરફાસ્ટ સ્પેશિયલના થર્ડ AC કોચમાં મુસાફરોને સીટ નીચે બિનવારસી બેગો દેખાતાં શંકા ગઈ હતી. બેગ ખોલીને તપાસ કરતાં તેમાં વિદેશી દારૂની બોટલો, બિયરના કેન અને ક્વાર્ટરનો જથ્થો મળી આવ્યો હતો.
મુસાફરોએ સમગ્ર કોચમાં સતર્કતા સાથે તપાસ કરતાં 10થી વધુ પેટીઓ, બેગ અને પ્લાસ્ટિકની કોથળીઓમાંથી દારૂ મળી આવ્યો હતો. આ દરમિયાન ત્રણ શખ્સોને મુસાફરોએ ઘેરીને ઝડપી લીધા હતા, જ્યારે બે શખ્સો ભીડનો લાભ લઈને ફરાર થઈ ગયા હોવાનું સામે આવ્યું છે. સુરત સ્ટેશન પર મુસાફરોએ પકડેલા ત્રણેય શખ્સો અને દારૂનો જથ્થો RPF-GRPને સોંપ્યો હતો.
Liquor Smuggling Train: વાપી બાદ સીટ નીચે બિનવારસી બેગો જોઈ મુસાફરોને શંકા ગઈ
ઘટના 27 ઓગસ્ટ, ગુરુવારના રોજ બની હોવાનું જાણવા મળે છે. બાંદ્રા ટર્મિનસથી ભુજ જઈ રહેલી 09037 સુપરફાસ્ટ સ્પેશિયલ ટ્રેન (Liquor Smuggling Train) વાપી સ્ટેશનથી આગળ વધી રહી હતી. આ દરમિયાન થર્ડ AC કોચમાં કેટલાક મુસાફરોની નજર સીટ નીચે લાંબા સમયથી પડેલી બેગો પર પડી હતી. બેગો લેવા કોઈ મુસાફર ન આવતાં શંકા વધુ ઘેરી બની હતી. ત્યારબાદ મુસાફરોએ બેગોની તપાસ કરી હતી. બેગ ખોલતાં અંદર વિદેશી દારૂની બોટલો, બિયરના કેન અને ક્વાર્ટરનો મોટો જથ્થો મળી આવ્યો હતો.
મુસાફરોએ આખા કોચમાં શરૂ કરી તપાસ
કોચમાં દારૂનો જથ્થો હોવાની જાણ થતાં અન્ય મુસાફરો પણ સતર્ક થઈ ગયા હતા. ત્યારબાદ મુસાફરોએ પોતાના સ્તરે કોચના અન્ય ભાગોમાં પણ તપાસ શરૂ કરી હતી. તપાસ દરમિયાન સીટોની નીચે તેમજ કોચના અલગ-અલગ ખૂણામાંથી 10થી વધુ પેટીઓ, થેલીઓ અને પ્લાસ્ટિકની કોથળીઓ મળી આવી હતી. મુસાફરોએ આ તમામ સામાનને કોચના ટોઇલેટ અને વેસ્ટિબ્યુલ પાસે એકઠો કર્યો હતો. થોડા સમયમાં ત્યાં દારૂનો મોટો જથ્થો જોવા મળ્યો હતો. મુસાફરોએ તરત જ ટ્રેન (Liquor Smuggling Train)ના TTEને જાણ કરી હતી. સાથે જ ટ્રેનમાં આટલો મોટો દારૂનો જથ્થો કેવી રીતે પહોંચ્યો તે મુદ્દે રેલવે સુરક્ષા વ્યવસ્થા સામે સવાલો ઉઠાવ્યા હતા.
ત્રણ શખ્સોને મુસાફરોએ ઘેરીને ઝડપી લીધા
દારૂનો જથ્થો મળી આવ્યા બાદ કોચમાં હાજર કેટલાક શંકાસ્પદ શખ્સો પણ મુસાફરોના ધ્યાનમાં આવ્યા હતા. ત્રણ શખ્સોએ ત્યાંથી નીકળવાનો પ્રયાસ કર્યો હોવાની માહિતી છે. જોકે, મુસાફરો સતર્ક હોવાથી તેમણે ત્રણેયને ઘેરી લીધા હતા અને પકડી રાખ્યા હતા. પૂછપરછ દરમિયાન ત્રણેયે દારૂનો જથ્થો પોતાનો હોવાનું કબૂલ્યું હોવાનો દાવો કરવામાં આવ્યો છે. આ સમગ્ર મામલામાં કુલ પાંચ શખ્સો દારૂનો જથ્થો લઈ જઈ રહ્યા હોવાની માહિતી સામે આવી છે. જોકે, ભીડ અને હોબાળાનો લાભ લઈને અન્ય બે શખ્સો ટ્રેન (Liquor Smuggling Train)માંથી ફરાર થઈ ગયા હતા.
સુરત પહોંચતા જ RPF અને GRPની ટીમ પહોંચી
ટ્રેન (Liquor Smuggling Train)માં દારૂનો મોટો જથ્થો પકડાયો હોવાની જાણ રેલવે કંટ્રોલ રૂમને કરવામાં આવી હતી. ટ્રેન સુરત સ્ટેશન પર પહોંચતા જ RPF અને GRPની ટીમ પ્લેટફોર્મ પર પહોંચી હતી. મુસાફરોએ પકડી રાખેલા ત્રણેય શખ્સોને પોલીસને સોંપ્યા હતા. સાથે જ કોચના ટોઇલેટ પાસે એકત્ર કરવામાં આવેલો દારૂનો જથ્થો પણ પોલીસને સોંપવામાં આવ્યો હતો. પોલીસે સ્થળ પરથી ત્રણ મોટી ટ્રાવેલ બેગ અને આશરે છ પ્લાસ્ટિક પાર્સલ કબજે કર્યા હતા.
પાંચ સામે અલગ-અલગ FIR, બેની શોધખોળ
આ મામલે રેલવે પોલીસે પાંચેય શખ્સો વિરુદ્ધ પ્રોહિબિશન એક્ટ હેઠળ કુલ પાંચ અલગ-અલગ FIR નોંધી હોવાનું જાણવા મળે છે. ત્રણ આરોપીઓ પોલીસ કસ્ટડીમાં છે, જ્યારે ફરાર થયેલા બે શખ્સોની શોધખોળ હાથ ધરવામાં આવી છે. હવે પોલીસની તપાસનો મુખ્ય મુદ્દો એ છે કે વાપી સ્ટેશનથી ટ્રેન (Liquor Smuggling Train)માં દારૂનો આટલો મોટો જથ્થો સુરક્ષા તપાસમાંથી પસાર થઈને AC કોચ સુધી કેવી રીતે પહોંચ્યો. દારૂની ખેપમાં અન્ય કોઈ વ્યક્તિની સંડોવણી છે કે કેમ અને આ જથ્થો ક્યાંથી લાવવામાં આવ્યો હતો તે સહિતના મુદ્દે તપાસ આગળ ધપાવવામાં આવી રહી છે.
આ પણ વાંચો:‘દવા કે દારુ’ સિવિલમાં દારુ પરમિટ માટે 3 વર્ષમાં 9 હજાર લોકોની અરજી
આ પણ વાંચો:સુરતમાં દારુબંધીના ધજાગરા : નબીરાઓએ ધુળેટી પર જાહેરમાં દારૂની પાર્ટી કરી
આ પણ વાંચો:મહિલા ડોક્ટર હત્યા કેસમાં પોલીસનો દાવો, આરોપીની દારુ અને પોર્નની ખરાબ આદત બની હત્યાનું કારણ
