Bangladesh Mecca Defense Agreement: સાઉદી અરેબિયા, પાકિસ્તાન અને તુર્કી વચ્ચે થયેલા મક્કા જૉઇન્ટ ડિફેન્સ એગ્રીમેન્ટમાં જોડાવા અંગે બાંગ્લાદેશે સકારાત્મક વલણ દર્શાવ્યું છે. બાંગ્લાદેશના અધિકારીઓનું કહેવું છે કે આ કરારમાં જોડાવાથી અન્ય દેશો સાથેના તેના સંબંધો પર કોઈ નકારાત્મક અસર નહીં પડે. જોકે, હજુ સુધી બાંગ્લાદેશને આ કરારમાં જોડાવા માટે ઔપચારિક આમંત્રણ મળ્યું નથી.

બાંગ્લાદેશે કરારને લઈને શું કહ્યું?

બાંગ્લાદેશના વિદેશ બાબતોના રાજ્યમંત્રી હુમાયુન કબીરે જણાવ્યું કે મક્કા ડિફેન્સ એગ્રીમેન્ટમાં જોડાવાથી દેશને કોઈ મોટું જોખમ દેખાતું નથી. તેમના જણાવ્યા અનુસાર આ કરાર બાંગ્લાદેશ માટે નવી તકો ઊભી કરી શકે છે. તેમણે કહ્યું કે આંતરરાષ્ટ્રીય પરિસ્થિતિને ધ્યાનમાં રાખીને બાંગ્લાદેશે પોતાની વિદેશ નીતિ અને સુરક્ષા સહયોગને વધુ લવચીક રીતે આગળ વધારવાની જરૂર છે.

મક્કા ડિફેન્સ એગ્રીમેન્ટમાં શું છે?

સાઉદી અરેબિયા, પાકિસ્તાન અને તુર્કીએ 7 ઓગસ્ટે મક્કામાં જૉઇન્ટ ડિફેન્સ એગ્રીમેન્ટ પર હસ્તાક્ષર કર્યા હતા. આ કરારનો મુખ્ય ઉદ્દેશ ત્રણેય દેશો વચ્ચે સામૂહિક સુરક્ષા અને સૈન્ય સહયોગને મજબૂત કરવાનો છે. કરારમાં એક મહત્વપૂર્ણ જોગવાઈ એવી છે કે ત્રણમાંથી કોઈ એક દેશ પર સશસ્ત્ર હુમલો થાય તો તેને ત્રણેય દેશો સામેનો હુમલો માનવામાં આવશે.

બાંગ્લાદેશને હજુ સુધી ઔપચારિક આમંત્રણ નથી

Bangladeshના વિદેશ મંત્રી ખલીલુર રહેમાને અગાઉ સંસદમાં કહ્યું હતું કે જો દેશને આ કરારમાં જોડાવા માટે આમંત્રણ મળે તો સરકાર તેના પર સકારાત્મક રીતે વિચાર કરશે. જોકે, હાલની સ્થિતિમાં બાંગ્લાદેશને ઔપચારિક આમંત્રણ મળ્યું નથી. રાજ્યમંત્રી હુમાયુન કબીરે સાઉદી અધિકારીઓ સાથે આ મુદ્દે ચર્ચા થઈ હોવાનું જણાવ્યું છે અને વાતચીતને સકારાત્મક ગણાવી છે.

Bangladeshની સંતુલિત વિદેશ નીતિ પર ભાર

Bangladeshનું કહેવું છે કે કોઈ એક દેશ અથવા ગઠબંધન સાથે સુરક્ષા સહયોગ કરવાનો અર્થ અન્ય દેશો સાથેના સંબંધો મર્યાદિત કરવા એવો નથી. ઢાકા પોતાની વિદેશ નીતિમાં સંતુલન જાળવીને અલગ-અલગ દેશો અને સંગઠનો સાથે સંબંધો આગળ વધારવા માંગે છે. બાંગ્લાદેશના આ વલણ પર ભારતની પણ નજર છે. ભારતીય વિદેશ મંત્રાલયે સ્પષ્ટ કર્યું છે કે ભારત પોતાની સુરક્ષા પર અસર કરી શકે તેવા તમામ આંતરરાષ્ટ્રીય ઘટનાક્રમ પર નજર રાખે છે અને રાષ્ટ્રીય હિત મુજબ જરૂરી પગલાં લે છે.

નિષ્ણાતોમાં મતભેદ

Bangladeshના કેટલાક પૂર્વ રાજદ્વારીઓ અને વિદેશ નીતિના નિષ્ણાતો આ કરારમાં જોડાવાના મુદ્દે અલગ-અલગ મત ધરાવે છે. કેટલાકનું માનવું છે કે સામૂહિક સુરક્ષા કરારથી બાંગ્લાદેશની વ્યૂહાત્મક ક્ષમતા મજબૂત થઈ શકે છે. બીજી તરફ, કેટલાક નિષ્ણાતો ચેતવણી આપી રહ્યા છે કે આવા સૈન્ય કરારમાં જોડાવાથી બાંગ્લાદેશ એવા સંઘર્ષમાં પણ ખેંચાઈ શકે છે, જેમાં તેનો સીધો હિત ન હોય. હાલમાં બાંગ્લાદેશ ઔપચારિક આમંત્રણની રાહ જોઈ રહ્યું છે, પરંતુ તેના નેતાઓના સકારાત્મક નિવેદનોને કારણે મક્કા ડિફેન્સ એગ્રીમેન્ટમાં તેની સંભવિત એન્ટ્રી અંગે ચર્ચા તેજ બની છે.

આ પણ વાંચો:હોર્મુઝ સ્ટ્રેટ નજીક અમેરિકાનો ઈરાન પર ફરી હુમલો, લારક ટાપુ પર રોકેટ લોન્ચર્સ નિશાન પર

આ પણ વાંચો:PM મોદીને ઉઝબેકિસ્તાનનું સર્વોચ્ચ સન્માન, ભારત-ઉઝબેકિસ્તાન વચ્ચે સહયોગ વધારવા નિર્ણયો

આ પણ વાંચો: નાઇજરમાં સૈન્ય બળવો; રાજધાની નિયામેમાં એરપોર્ટ અને સરકારી ભવન પાસે ફાયરિંગ