Bhavnagar News: ભાવનગરની કાળિયાબીડ વિસ્તારમાં આવેલી માધવ બોયઝ હોસ્ટેલ (Madhav Boys Hostel)માં ધોરણ-9ના સગીર વિદ્યાર્થી સાથે રેગિંગ, મારપીટ અને માનસિક-શારીરિક ત્રાસ આપ્યાની ગંભીર ઘટના સામે આવી છે. પીડિત વિદ્યાર્થીના પિતાની ફરિયાદના આધારે ચાર સિનિયર વિદ્યાર્થીઓ અને હોસ્ટેલના બે કર્મચારીઓ મળી કુલ છ સામે પોલીસ ફરિયાદ નોંધાઈ છે. આ ઘટનાને લઈને 24 ઓગસ્ટે ભાવનગર શહેર યુથ કોંગ્રેસ અને NSUI દ્વારા વિરોધ નોંધાવવામાં આવ્યો હતો. સંગઠનોએ હોસ્ટેલ સંચાલકો દ્વારા પણ જવાબદાર લોકો સામે ફરિયાદ નોંધાવી કડક કાર્યવાહી કરવાની માગ કરી છે.

સિનિયર વિદ્યાર્થીઓ પર સગીરને સિગારેટ પીવડાવવાનો આક્ષેપ

પીડિત વિદ્યાર્થીના પિતાએ પોલીસ ફરિયાદમાં આક્ષેપ કર્યો છે કે તેમનો 14 વર્ષીય પુત્ર આશરે ત્રણ મહિના પહેલાં અભ્યાસ માટે માધવ બોયઝ હોસ્ટેલ (Madhav Boys Hostel)માં રહેવા ગયો હતો. ફરિયાદ મુજબ, છેલ્લા કેટલાક સમયથી તેની સાથે રૂમમાં રહેતા ચાર સિનિયર વિદ્યાર્થીઓ દ્વારા તેને શારીરિક અને માનસિક રીતે હેરાન કરવામાં આવતો હતો. સગીરને કથિત રીતે દબાણપૂર્વક સિગારેટ પીવડાવવામાં આવતી હતી અને ઇનકાર કરવા પર માર મારવામાં આવતો હોવાનો આક્ષેપ છે. આ ઉપરાંત સગીર પાસે મસાજ કરાવવી, માથામાં તેલ નાખવા જેવા અંગત કામ કરાવવામાં આવતા હોવાનો પણ ફરિયાદમાં ઉલ્લેખ છે.

રૂમ અને બાથરૂમમાં પૂરી દેતા હોવાનો આક્ષેપ

પિતાના આક્ષેપ મુજબ, સગીરને ક્યારેક રૂમ અથવા બાથરૂમમાં પૂરી દેવામાં આવતો હતો. આ અંગે પરિવારજનોને જાણ કરશે તો જાનથી મારી નાખવાની ધમકી આપવામાં આવતી હોવાનો પણ ફરિયાદમાં ઉલ્લેખ કરવામાં આવ્યો છે. ઘટનાની જાણ થયા બાદ પિતાએ હોસ્ટેલ (Madhav Boys Hostel)ના સંચાલકને સમગ્ર મામલે જાણ કરી હતી.

CCTV ફૂટેજમાં મારપીટના દૃશ્યો દેખાયા હોવાનો દાવો

પીડિતના પિતાના જણાવ્યા મુજબ, તેમણે હોસ્ટેલ (Madhav Boys Hostel)ના CCTV કેમેરાના ફૂટેજ તપાસ્યા હતા. તેમાં સગીર સાથે મારપીટ કરવામાં આવતી અને તેને બાથરૂમમાં પૂરી દેવામાં આવતો હોવાનો દાવો કરવામાં આવ્યો છે. પિતાએ એવો પણ આક્ષેપ કર્યો છે કે હોસ્ટેલના માલિકને જાણ કરવામાં આવ્યા બાદ શરૂઆતમાં મામલો ઠપકો આપીને થાળે પાડવાનો પ્રયાસ થયો હતો. ફરિયાદમાં હોસ્ટેલમાં દેખરેખ રાખતા અંકુર અને જીગર નામના બે કર્મચારીઓ સામે પણ આક્ષેપ કરવામાં આવ્યા છે.

Madhav Boys Hostel: ચાર વિદ્યાર્થીઓ અને બે કર્મચારીઓ સામે ફરિયાદ

પોલીસ ફરિયાદમાં ચાર સિનિયર વિદ્યાર્થીઓ તથા હોસ્ટેલના બે કર્મચારીઓના નામનો ઉલ્લેખ કરવામાં આવ્યો છે. ફરિયાદમાં નામજોગ કરાયેલા સિનિયર વિદ્યાર્થીઓમાં સાબીર મહમદઅલી સોદાગર, ગોપાલ દિનેશભાઈ રાઠોડ, વિનીત વાઘજીભાઈ મિંજારા (જીંજાળા) અને યાજ્ઞીક બળવંતભાઈ રજતનો સમાવેશ થાય છે. આ ઉપરાંત હોસ્ટેલ કર્મચારી અંકુર અને જીગર સામે પણ ફરિયાદ નોંધાવવામાં આવી છે.

ઘટનાની જાણ થતાં ચાર વિદ્યાર્થીઓને રસ્ટિકેટ કરાયા

ઘટના સામે આવ્યા બાદ હોસ્ટેલ સંચાલન દ્વારા સંડોવાયેલા ચાર વિદ્યાર્થીઓના વાલીઓને બોલાવવામાં આવ્યા હતા અને તેમને વિદ્યાર્થીઓ સોંપી દેવામાં આવ્યા હોવાનું સંચાલકે જણાવ્યું છે. હવે પોલીસ ફરિયાદ બાદ સમગ્ર મામલે તપાસ આગળ વધી રહી છે.

યુથ કોંગ્રેસ અને NSUIનો વિરોધ

ઘટનાને લઈને ભાવનગર શહેર યુથ કોંગ્રેસ અને NSUIએ ઉગ્ર વિરોધ નોંધાવ્યો છે. યુથ કોંગ્રેસના શહેર ઉપપ્રમુખ ગિરીરાજસિંહ વાળાએ જણાવ્યું હતું કે માતા-પિતા મહેનત કરીને બાળકોની ફી ભરીને તેમને હોસ્ટેલ (Madhav Boys Hostel)માં અભ્યાસ માટે મોકલે છે. આવા સંજોગોમાં સિનિયર વિદ્યાર્થીઓ દ્વારા સગીર સાથે કરવામાં આવતું કથિત વર્તન ગંભીર બાબત છે. સંગઠન દ્વારા હોસ્ટેલ સંચાલકો અને જવાબદાર લોકો સામે કડક કાર્યવાહી કરવાની માગ કરવામાં આવી છે. સાથે જ હોસ્ટેલના સંચાલકો પોતે ફરિયાદી બને તેવી પણ માગ ઉઠાવવામાં આવી છે.

‘સ્ટાફ સંડોવાયેલો હશે તો કડક પગલાં લઈશું’: સંચાલક

માધવ બોયઝ હોસ્ટેલ (Madhav Boys Hostel)ના સંચાલક નીલેશ બલદાણિયાએ જણાવ્યું હતું કે ઘટનામાં સંડોવાયેલા વિદ્યાર્થીઓના વાલીઓને બોલાવી વિદ્યાર્થીઓને તેમના હવાલે કરવામાં આવ્યા છે. તેમણે વધુમાં કહ્યું કે જો તપાસમાં સંસ્થાનો કોઈ સ્ટાફ અથવા રેક્ટર સંડોવાયેલો હોવાનું સામે આવશે તો તેમની સામે પણ કડક કાર્યવાહી કરવામાં આવશે. ભવિષ્યમાં આવી ઘટના ન બને તે માટે રાત્રિના સમયે CCTV કેમેરાની સામે જ સુરક્ષા કર્મચારી હાજર રહે તેવી વ્યવસ્થા કરવામાં આવી હોવાનું અને સ્ટાફમાં વધારો કરાયો હોવાનું પણ સંચાલકે જણાવ્યું છે.

રાત્રિના 12થી 2 વચ્ચે ઘટના બની હોવાનો દાવો

સંચાલકના જણાવ્યા પ્રમાણે, આ ઘટના રાત્રિના આશરે 12થી 2 વાગ્યાના સમયગાળા દરમિયાન બની હોવાનું સામે આવ્યું છે. માધવ બોયઝ હોસ્ટેલ (Madhav Boys Hostel)માં ધોરણ 8થી 12 સુધીના આશરે 80 વિદ્યાર્થીઓ રહે છે. જ્યારે હોસ્ટેલના અલગ વિભાગમાં છ જેટલા કોલેજિયન વિદ્યાર્થીઓ પણ રહેતા હોવાનું સંચાલકે જણાવ્યું છે. હવે પોલીસ દ્વારા ફરિયાદમાં કરાયેલા આક્ષેપો, CCTV ફૂટેજ અને હોસ્ટેલના સ્ટાફની ભૂમિકા સહિતના મુદ્દાઓની તપાસ કરવામાં આવી રહી છે.

આ પણ વાંચો:ભાવનગર હોસ્ટેલમાં ધોરણ 9ના વિદ્યાર્થી સાથે રેગિંગનો આક્ષેપ, સમગ્ર મામલે પોલીસે શરૂ કરી તપાસ

આ પણ વાંચો:રેગિંગ મુદ્દે ભાવનગરમાં સરકારનો મોટો એક્શન! સર.ટી. હોસ્પિટલમાં અધિકારીઓ બદલાયા, HOD સસ્પેન્ડ

આ પણ વાંચો:ભાવનગર સર ટી હોસ્પિટલ રેગિંગ કેસ: 6 મેડિકલ વિદ્યાર્થીઓ સસ્પેન્ડ, પોલીસ ફરિયાદની તૈયારી