Gujarat News : ગુજરાતમાં ચોમાસા (Monsoon)ની ધીમી ગતિ વચ્ચે ખેડૂતો (Farmers) માટે રાહતના સમાચાર સામે આવ્યા છે. રાજ્યમાં સત્તાવાર રીતે 26 જૂને ચોમાસું (Monsoon)બેસવાની શક્યતા વ્યક્ત કરવામાં આવી રહી છે. બીજી તરફ વરસાદમાં વિલંબ અને સિંચાઈની વધતી જરૂરિયાતને ધ્યાનમાં રાખીને રાજ્યના ઊર્જા વિભાગે ખેડૂતોને વધુ વીજળી આપવાનો મહત્વપૂર્ણ નિર્ણય લીધો છે.
નવી વ્યવસ્થા મુજબ હવે ખેડૂતો (Farmers)ને ખેતી અને સિંચાઈ માટે અગાઉ મળતા 8 કલાકના બદલે દરરોજ 10 કલાક વીજ પુરવઠો આપવામાં આવશે. રાજ્યની તમામ વીજ વિતરણ કંપનીઓને આ નિર્ણયનો તાત્કાલિક અમલ કરવા માટે સૂચના આપવામાં આવી છે.
રાજ્યના અનેક જિલ્લાઓમાં સામાન્ય કરતાં ઓછો વરસાદ નોંધાતા ખેડૂતોમાં ચિંતા વધી રહી હતી. વરસાદની અછતને કારણે ખેડૂતો બોરવેલ અને અન્ય સિંચાઈ સાધનો પર વધુ નિર્ભર બન્યા છે. આવી સ્થિતિમાં વધારાના બે કલાક વીજ પુરવઠો મળવાથી સિંચાઈનું આયોજન વધુ સરળ બનશે અને પાકને નુકસાન થવાની સંભાવના ઘટશે.
ઊર્જા વિભાગે સ્પષ્ટ સૂચના આપી છે કે કૃષિ ફીડર પરથી ખેડૂતો (Farmers)ને નિયમિત અને પૂરતો વીજ પુરવઠો મળે તે માટે તમામ વીજ કંપનીઓએ જરૂરી આયોજન કરવું પડશે. સાથે જ વીજ પુરવઠાની સ્થિતિ પર સતત નજર રાખવા પણ જણાવાયું છે.
ખેડૂતોના સંગઠનો અને કિસાન સંઘ દ્વારા લાંબા સમયથી વધારાની વીજળીની માંગ કરવામાં આવી રહી હતી. ચોમાસું મોડું પડતાં ઉભી થયેલી પરિસ્થિતિમાં સરકારના આ નિર્ણયને કૃષિ ક્ષેત્ર માટે મહત્વપૂર્ણ પગલું માનવામાં આવી રહ્યું છે.
હવામાન વિભાગના અનુમાન મુજબ આગામી દિવસોમાં ચોમાસું વધુ સક્રિય બનવાની શક્યતા છે અને 26 જૂન આસપાસ ગુજરાતમાં સત્તાવાર રીતે ચોમાસું બેસી શકે છે. જો વરસાદની ગતિ વધશે તો ખેડૂતોને સિંચાઈ માટે વધારાના ખર્ચ અને મહેનતમાંથી પણ રાહત મળશે.
