2023 ODI વર્લ્ડ કપ અફઘાનિસ્તાન માટે અત્યાર સુધી ઘણો ઐતિહાસિક રહ્યો છે. ટીમે લખનૌના એકાના ક્રિકેટ સ્ટેડિયમમાં નેધરલેન્ડને 7 વિકેટે હરાવીને ટુર્નામેન્ટની ચોથી જીત મેળવી હતી.
આ જીત સાથે અફઘાનિસ્તાન પોઈન્ટ ટેબલમાં અપસેટ સર્જી પાંચમા સ્થાને આવી ગયું છે, જ્યાં અગાઉ પાકિસ્તાન હાજર હતું. 4 જીત બાદ અફઘાન ટીમના ન્યૂઝીલેન્ડ અને ઓસ્ટ્રેલિયાની બરાબરી પર 8 પોઈન્ટ છે. જ્યારે ડિફેન્ડિંગ ચેમ્પિયન ઈંગ્લેન્ડ 10માં નંબર પર યથાવત છે.
અફઘાનિસ્તાન ટૂર્નામેન્ટમાં 7 મેચ રમ્યું છે, જેમાં ટીમે 4માં જીત મેળવી છે. જ્યારે અફઘાનિસ્તાનથી નીચે છઠ્ઠા ક્રમે રહેલા પાકિસ્તાને સાતમાંથી ત્રણ મેચ જીતી છે. આવી સ્થિતિમાં અફઘાન ટીમ આગામી મેચ જીતીને સેમીફાઈનલમાં જવાની પ્રબળ દાવેદાર બની શકે છે અને પાકિસ્તાનનું પત્તું સંપૂર્ણપણે કપાઈ શકે છે.
ટોપ-4માં કોઈ ફેરફાર નથી
ટોપ-4માં યજમાન ભારત 14 પોઈન્ટ સાથે પ્રથમ સેમીફાઈનલ બનીને ટોચના સ્થાને છે. આ પછી દક્ષિણ આફ્રિકા 12 પોઈન્ટ સાથે બીજા સ્થાને છે. ત્યારબાદ ઓસ્ટ્રેલિયા અને ન્યુઝીલેન્ડ 8-8 પોઈન્ટ સાથે અનુક્રમે ત્રીજા અને ચોથા સ્થાને છે. ઓસ્ટ્રેલિયાનો નેટ રન રેટ ન્યુઝીલેન્ડ કરતા સારો છે, જેના કારણે તે કિવી ટીમથી ઉપર છે. ચોથા ક્રમે રહેલી ન્યૂઝીલેન્ડ તેની આગામી મેચ છઠ્ઠા ક્રમે રહેલા પાકિસ્તાન સામે રમશે.
બીજી ટીમોની પણ આ જ હાલત
ટોપ-4થી આગળ, અફઘાનિસ્તાન 8 પોઈન્ટ અને નેગેટિવ -0.330ના નેટ રન રેટ સાથે પાંચમા સ્થાને દેખાય છે. આ પછી, પાકિસ્તાન 6 પોઈન્ટ અને નેગેટીવ -0.024ના નેટ રનરેટ સાથે છઠ્ઠા, શ્રીલંકા 4 પોઈન્ટ અને નેટ રનરેટ -1.162 સાથે સાતમા ક્રમે, નેધરલેન્ડ 4 પોઈન્ટ અને નેટ રનરેટ -1.398 સાથે આઠમા ક્રમે છે, બાંગ્લાદેશ નવમા ક્રમે છે. અને ડિફેન્ડિંગ ચેમ્પિયન ઈંગ્લેન્ડ 2 પોઈન્ટ સાથે 10મા સ્થાને છે.