Mumbai News: મુંબઈ ક્રિકેટ એસોસિએશન (MCA)ની રસોઈમાં વંદા, માખીઓ અને અન્ય જીવાતો મળવાના મામલે બોમ્બે હાઈકોર્ટે
કડક ટિપ્પણી કરી છે. અદાલતે રમૂજી અંદાજમાં સવાલ કર્યો કે શું ખેલાડીઓને ખબર હતી કે તેઓ ‘નોન-વેજ ચા’ પી રહ્યા છે? સાથે જ
મહારાષ્ટ્રના ખાદ્ય અને ઔષધ વહીવટીતંત્ર (FDA)ને ફરીથી સ્થળનું નિરીક્ષણ કરવાનો આદેશ આપવામાં આવ્યો છે.
નિયમોના ભંગ બદલ 5 રેસ્ટોરન્ટના MCA લાઇસન્સ સસ્પેન્ડ
કાર્યકારી મુખ્ય ન્યાયાધીશ રવીન્દ્ર ઘુગે અને ન્યાયમૂર્તિ ગૌતમ અનખડની ખંડપીઠ મુંબઈ ક્રિકેટ એસોસિએશન દ્વારા દાખલ કરવામાં આવેલી અરજીઓની સુનાવણી કરી રહી હતી. આ અરજીઓમાં બાંદ્રા-કુર્લા કોમ્પ્લેક્સ સ્થિત એમસીએ પરિસરમાં ચાલતા પાંચ રેસ્ટોરન્ટના લાઇસન્સ સસ્પેન્ડ (Licenses of five restaurants suspended) કરવાના FDAના નિર્ણયને પડકારવામાં આવ્યો હતો.
FDAના જણાવ્યા મુજબ, ફૂડ લાઇસન્સ એમસીએના નામે આપવામાં આવ્યા હતા, પરંતુ તેનું સંચાલન અન્ય ખાનગી કંપની દ્વારા કરવામાં આવતું હતું. નિરીક્ષણ દરમિયાન ખાદ્ય સુરક્ષા અને સ્વચ્છતાના નિયમોનું ગંભીર ઉલ્લંઘન પણ સામે આવ્યું હતું.
રસોઈમાં વંદા અને માખીઓ મળતા કોર્ટની કડક ટિપ્પણી
સુનાવણી દરમિયાન એમસીએ તરફથી દલીલ કરવામાં આવી હતી કે FDAએ સીધા લાઇસન્સ સસ્પેન્ડ કરવાને બદલે પહેલાં સુધારણા માટે નોટિસ આપવી જોઈતી હતી. આ અંગે કોર્ટે (Bombay High Court)જણાવ્યું કે નિરીક્ષણ દરમિયાન ગંભીર ખામીઓ સામે આવે તો દરેક વખતે અગાઉથી નોટિસ આપવી ફરજિયાત નથી.
અદાલતમાં રજૂ થયેલી FDAની તપાસ રિપોર્ટ મુજબ, રસોઈમાં વંદા અને માખીઓ જોવા મળ્યા હતા, જ્યારે ફ્લોર પણ અત્યંત ગંદો અને લપસણો હોવાનું જણાવાયું હતું. આવી સ્થિતિમાં FDAને તાત્કાલિક કાર્યવાહી કરવાનો અધિકાર હોવાનું અદાલતે નોંધ્યું હતું.
‘નોન-વેજ ચા’ અંગે હાઈકોર્ટનો રમૂજી સવાલ
એમસીએના વકીલે અદાલતમાં રજૂઆત કરી હતી કે રેસ્ટોરન્ટ બંધ થતાં મેદાનમાં રમવા આવતા ક્રિકેટરોને ચા પણ મળી રહી નથી.
આ દલીલ પર કાર્યકારી મુખ્ય ન્યાયાધીશે રમૂજી ટિપ્પણી કરતાં કહ્યું કે રસોઈમાં માખીઓ અને વંદા છે, તો આ તો ‘નોન-વેજ ચા’ કહેવાય. શું ક્રિકેટરોને ખબર હતી કે તેઓ આવી ચા પી રહ્યા છે? અદાલતની આ ટિપ્પણી બાદ સમગ્ર મામલો વધુ ચર્ચામાં આવ્યો છે.
ચા-કોફી માટે વેન્ડિંગ મશીનને મંજૂરી
ખેલાડીઓની મુશ્કેલીને ધ્યાનમાં રાખીને હાઈકોર્ટે એમસીએને ચા અને કોફી માટે વેન્ડિંગ મશીન લગાવવાની મંજૂરી આપી છે. સાથે જ એમસીએને તમામ પાંચ ભોજનાલયો અને રસોઈ વિસ્તારની સંપૂર્ણ સફાઈ કરવાની સૂચના આપવામાં આવી છે. ત્યારબાદ FDA દ્વારા ફરીથી નિરીક્ષણ કરવામાં આવશે.
29 ઓગસ્ટે થશે આગામી સુનાવણી
કોર્ટે FDAની કાર્યવાહી અંગે નોંધ કરતાં જણાવ્યું કે ખાદ્ય સુરક્ષા (Food Safety) અને સ્વચ્છતા જાળવવા માટે લેવામાં આવતાં પગલાં મહત્વપૂર્ણ છે. જોકે, જો કોઈ સંસ્થા ખામીઓ દૂર કરી દે તો સસ્પેન્શન અંગે યોગ્ય નિર્ણય પણ સમયસર લેવો જોઈએ.
કોર્ટે એમસીએ અને ખાનગી સંચાલક વચ્ચેના કરાર અંગે પણ FDAને વ્યવહારુ અભિગમ અપનાવવાની સૂચના આપી છે. આ કેસની આગામી સુનાવણી 29 ઓગસ્ટે યોજાવાની છે.
