Tarun Tejpal 10 Years Sentenced Bombay High Court: વર્ષ 2013ના ચર્ચિત યૌન શોષણ કેસમાં ‘તેહલકા’ના સ્થાપક અને પૂર્વ સંપાદક તરુણ તેજપાલને (Tarun Tejpal) બોમ્બે હાઈકોર્ટની ગોવા બેન્ચે 10 વર્ષની કઠોર કેદ (Rigorous Imprisonment)ની સજા ફટકારી છે. અગાઉ હાઈકોર્ટે તેમને કેસમાં દોષિત જાહેર કર્યા બાદ હવે સજાની પણ જાહેરાત કરી છે. આ કેસ તેમની એક પૂર્વ મહિલા સહકર્મચારીએ નોંધાવ્યો હતો, જેમાં ગોવાના એક હોટલમાં યૌન શોષણના ગંભીર આરોપો લગાવવામાં આવ્યા હતા.
સજા અંગે બંને પક્ષની દલીલો સાંભળી
સજા જાહેર કરતા પહેલાં હાઈકોર્ટે બચાવ પક્ષ અને સરકાર બંનેની દલીલો સાંભળી હતી. બચાવ પક્ષે દલીલ કરી હતી કે આ ઘટના વર્ષ 2013ની છે અને ત્યારથી તેજપાલ વિરુદ્ધ કોઈ અન્ય ફોજદારી કેસ નોંધાયો નથી. ઉપરાંત તેઓ જામીનની તમામ શરતોનું પાલન કરતા રહ્યા છે અને તેમનો પાસપોર્ટ પણ સત્તાવાળાઓ પાસે જમા છે. તેથી તેમને ઓછામાં ઓછી સજા આપવામાં આવે તેવી માંગ કરવામાં આવી હતી.
સરકારની મહત્તમ સજાની માંગ
સરકાર તરફથી રજૂઆત કરવામાં આવી હતી કે આરોપી પીડિતાના વરિષ્ઠ અને વિશ્વાસપાત્ર સ્થાને હતા, તેથી તેમના ગુનાને વધુ ગંભીરતાથી જોવો જોઈએ. સરકારી પક્ષે એવો પણ દાવો કર્યો કે આરોપીએ પોતાના કૃત્ય અંગે કોઈ પસ્તાવો વ્યક્ત કર્યો નહોતો અને પીડિતાએ સ્પષ્ટ વિરોધ કર્યો હોવા છતાં કથિત રીતે ગુનો ફરી કર્યો હતો. તેથી તેમને મહત્તમ સજા આપવામાં આવે તેવી માંગ કરવામાં આવી હતી.
Tarun Tejpalને કોર્ટે ફટકારી 10 વર્ષની કઠોર કેદ
હાઈકોર્ટે પોતાના આદેશમાં જણાવ્યું કે ઘટના ઘણા વર્ષો જૂની હોવા છતાં તે ગંભીર સ્વરૂપની હતી. કોર્ટે ભારતીય દંડ સંહિતાની સંબંધિત જોગવાઈઓ હેઠળ તરુણ તેજપાલને 10 વર્ષની કઠોર કેદની સજા સંભળાવી છે. સાથે જ અલગ-અલગ કલમો હેઠળ દંડ પણ ફટકારવામાં આવ્યો છે.
સરેન્ડર માટે સમય માંગ્યો
ચુકાદા બાદ તરુણ તેજપાલે(Tarun Tejpal) કોર્ટ સમક્ષ આત્મસમર્પણ કરવા માટે થોડો સમય આપવાની વિનંતી કરી હતી. તેમણે દાવો કર્યો હતો કે તેઓ રાજકીય બદલાનો ભોગ બન્યા છે. જોકે, હાઈકોર્ટના આ નિર્ણય સાથે વર્ષોથી ચર્ચામાં રહેલા આ કેસમાં કાનૂની પ્રક્રિયાનો મહત્વપૂર્ણ તબક્કો પૂર્ણ થયો છે.
આ પણ વાંચો : સુપ્રિમ કોર્ટે તરુણ તેજપાલની અરજીને ફગાવી, હવે ચાલશે યૌન શોષણનો કેસ
આ પણ વાંચો : તહલકા પત્રિકાનાં પૂર્વ એડિટર ઇન ચીફ તરૂણ તેજપાલને કોર્ટે આપી મોટી રાહત
આ પણ વાંચો : તરુણ તેજપાલ દોષિત જાહેર; બોમ્બે હાઈકોર્ટે યૌન ઉત્પીડન કેસમાં ટ્રાયલ કોર્ટનો આદેશ પલટ્યો
