Ahmedabad News : કેડિલા ફાર્માના CMD રાજીવ મોદીની મુશ્કેલીમાં વધારો થયો. બલ્ગેરિયન યુવતીની અરજીમાં જોડાવવા માટે કેડિલાની વધુ એક ભૂતપૂર્વ મહિલા કર્મીએ માગ કરી છે. આ યુવતીએ પણ રાજીવ મોદી સામે જાતીય સતામણીનો આરોપ મૂક્યો છે. આ કેસની શરૂઆત બલ્ગેરિયન યુવતીએ નેશનલ કમિશન ફોર વુમનમાં સેક્સ્યુઅલ હેરેસમેન્ટની ફરિયાદ નોંધાવી હતી, પરંતુ કોઈ પગલાં લેવામાં આવ્યા ન હતા. ત્યારબાદ યુવતીએ ગુજરાત હાઈકોર્ટમાં અરજી કરી હતી, જેમાં નેશનલ કમિશન ઓફ વુમન, અમદાવાદ જિલ્લા કલેક્ટર અને ગુજરાત રાજ્ય સહિતનાને પક્ષકાર બનાવવામાં આવ્યા હતા.
અગાઉ કોર્ટની કાર્યવાહીમાં યુવતીના વકીલે કોર્ટને જણાવ્યું હતું કે, કલેક્ટરની લોકલ કમ્પ્લેઈન કમિટીએ 7 જાન્યુઆરી, 2025ના રોજ બેઠક યોજીને અરજદાર કે સામા પક્ષકારોને બોલાવ્યા વગર જ ફરિયાદ ક્લોઝ કરી નાખી હતી. યુવતીના વકીલનું કહેવું હતું કે, યુવતીને સાંભળ્યા વગર LCC હિયરીંગ ચલાવી શકે નહીં. જોકે, મૂળ અરજી બલ્ગેરિયન યુવતીની હોવાથી તેના વકીલે આ યુવતીની અરજીની કોપી માંગી છે તો રાજીવ મોદી વતી જવાબ રજૂ કરવા સિનિયર એડવોકેટ હાયર કરવામાં આવ્યા છે. જેમને આ કેસમાં જવાબ ફાઈલ કરવા સમય માંગ્યો છે. આજે સરકારી વકીલ અન્ય કેસમાં વ્યસ્ત હોવાથી આ કેસમાં ઉપસ્થિત રહી શક્યા નહોતા.
હવે, કેડિલામાં કામ કરી ચૂકેલી ભારત અને વિદેશની છોકરીઓ POSH એક્ટ હેઠળ ફરિયાદ કરવા વધુ સંખ્યામાં આગામી સમયમાં આવે એવી પૂરી શક્યતાઓ છે. આ અરજીમાં કેડિલામાં અગાઉ કામ કરતી વધુ એક યુવતીએ આ અરજીમાં જોડાવવા માટે માંગ કરી છે. રાજીવ મોદી વિદેશમાં પણ ઘર અને પ્રોપર્ટી ધરાવતા હોવાથી, વિદેશની કોર્ટમાં પણ તેમની સામે સેક્સ્યુઅલ હેરેસમેન્ટના કેસ દાખલ થાય એવી પૂરી શક્યતાઓ છે.
અગાઉ આ અરજીની સુનવણીમાં, બલ્ગેરિયન યુવતીના વકીલે કોર્ટને જણાવ્યું હતું કે, LCCને સિવિલ કોર્ટ જેવા જ પાવર હોય છે, જેથી, LCC દ્વારા ફરીથી અરજી સાંભળવામાં આવે. હાઇકોર્ટે આ મામલે અમદાવાદ કલેક્ટર, રાજ્યના મહિલા અને બાળ વિકાસ વિભાગ, નેશનલ કમિશન ફોર વુમેનને નોટિસ આપી હતી.
ઉલ્લેખનીય છે કે, કેડીલા કંપનીની કર્મચારી બલ્ગેરિયન યુવતીએ કેડિલા ફાર્માના CMD રાજીવ મોદી સામે દુષ્કર્મના આક્ષેપો કર્યા હતા. આ સંદર્ભે મહિલા પોલીસ સ્ટેશન, પોલીસ કમિશનર કચેરી, નેશનલ કમિશન ફોર વુમન વગેરે જગ્યાએ રજૂઆતો કરવા છતાં કોઈ પગલાં લેવામાં આવ્યા ન હતા. ગ્રામ્ય કોર્ટે પોલીસ તપાસ કરાવી હતી પણ તેમાં યોગ્ય તપાસ થઈ નહિ હોવાની અરજી સાથે બલ્ગેરિયન યુવતી ગુજરાત હાઇકોર્ટ પહોંચી હતી. હાઇકોર્ટે સોલા પોલીસને યુવતીની ફરિયાદ નોંધવા આદેશ આપ્યા હતા.
ફરિયાદ નોંધાતા પોલીસે રાજીવ મોદીના ઘરે બલ્ગેરિયન યુવતીને સાથે રાખીને તપાસ કરી હતી. આ સાથે જ સાહેદોના નિવેદન નોંધ્યા હતા. તપાસ બાદ પોલીસે અમદાવાદ ગ્રામ્ય કોર્ટમાં પૂરતા પુરાવા ના હોવાની સમરી ફાઇલ કરી હતી. યુવતીએ આ સમરીને ચેલેન્જ કરી હતી. જેથી, અમદાવાદ ગ્રામ્ય કોર્ટે વધુ તપાસના આદેશ આપ્યા હતા.
આ પણ વાંચો: કેડીલાના રાજીવ મોદી સામે દુષ્કર્મ કેસમાં વિદેશી યુવતીએ હ્યુમન રાઇટ કાઉન્સિલમાં નોંધાવી ફરિયાદ
