આંધ્રપ્રદેશના અનાકાપલ્લે જિલ્લાના અચ્યુતાપુરમમાં એક કંપનીમાં શંકાસ્પદ ગેસ લીક થયાની માહિતી સામે આવી છે. જેમાં ઘણી મહિલાઓ બીમાર પડતાં તેમને હોસ્પિટલમાં લઈ જવામાં આવી છે. અનાકાપલ્લી પોલીસના જણાવ્યા અનુસાર, અચ્યુતાપુરમ સ્થિત એક કંપનીમાં ગેસ લીક થયાની જાણ થયા બાદ લગભગ 50 લોકો બીમાર પડ્યા છે. એસપી અનાકપલ્લેએ જણાવ્યું કે કથિત રીતે ગેસ લીક બ્રાન્ડિક્સના પરિસરમાં થયો હતો. 50 લોકોને હોસ્પિટલમાં દાખલ કરવામાં આવ્યા છે, અને પરિસરમાં ખાલી કરાવવાનું કામ ચાલી રહ્યું છે.
હાલમાં પોલીસ એપીપીસીબીના અધિકારીઓ આવે અને પરિસ્થિતિનું મૂલ્યાંકન કરે તેની રાહ જોઈ રહી છે. પરિસરની અંદર કોઈને પ્રવેશ આપવામાં આવતો નથી. આંધ્રપ્રદેશના ઉદ્યોગ મંત્રી ગુડીવાડા અમરનાથે આ ઘટના અંગે અધિકારીઓ સાથે વાત કરી છે. તેમણે અધિકારીઓને પીડિતોને સારી સારવાર આપવા માટે પગલાં ભરવાનો નિર્દેશ આપ્યો છે. એવું કહેવામાં આવી રહ્યું છે કે જ્યાંથી આ ઝેરી ગેસ લીક થયો છે તે કાપડ બનાવતી કંપની છે.
સુત્રો દ્ધારા મળતી માહિતી પ્રમાણે ગેસ લીક થવાને કારણે 50 જેટલી મહિલા કામદારો બીમાર પડી હતી. પહેલા તેને ઉલ્ટી થવા લાગી અને ઉબકા આવવાની ફરિયાદ કરી. આ પછી કંપનીના કર્મચારીઓ બેભાન મહિલા કર્મચારીઓને એમ્બ્યુલન્સ દ્વારા નજીકની ખાનગી હોસ્પિટલમાં લઈ ગયા હતા. હાલ તમામની હોસ્પિટલમાં સારવાર ચાલી રહી છે.
ઉલ્લેખનીય છે કે આ વિસ્તારમાં ગેસ લીક થવાનો આ પહેલો કિસ્સો નથી. બે મહિના પહેલા પણ અચ્યુતપુરમ સેઝમાં ગેસ લીક થયો હતો. ત્યાર બાદ ગેસ લીક થતાં 200 જેટલી મહિલા કર્મચારીઓ બીમાર પડી હતી.