CNG Price Hike: દિલ્હી-એનસીઆર સહિત અનેક શહેરોમાં CNG અને PNG સપ્લાય કરતી ઇન્દ્રપ્રસ્થ ગેસ લિમિટેડ (IGL)એ CNGના ભાવમાં વધારો કર્યો છે. કંપનીએ પ્રતિ કિલો ₹3.89નો વધારો જાહેર કર્યો છે, જે 29 ઓગસ્ટ, 2026થી લાગુ થઈ ગયો છે. ભાવ વધારાની સીધી અસર CNG વાહનચાલકોના માસિક ખર્ચ પર પડશે.

દિલ્હીમાં CNG હવે ₹86.98 પ્રતિ કિલો

ભાવ વધારા બાદ દિલ્હીમાં CNGનો નવો ભાવ ₹86.98 પ્રતિ કિલો થઈ ગયો છે. અગાઉ CNG ₹83.09 પ્રતિ કિલો મળતું હતું.

દિલ્હી-NCRના અન્ય વિસ્તારોમાં પણ ભાવ વધ્યા છે. નોઈડા અને ગાઝિયાબાદમાં CNGનો નવો ભાવ ₹95.59 પ્રતિ કિલો થયો છે.

કયા શહેરમાં CNG કેટલું મોંઘું થયું?

ભાવ વધારા બાદ વિવિધ શહેરોમાં CNGના નવા દર આ પ્રમાણે છે:

દિલ્હી: ₹86.98 પ્રતિ કિલો
નોઈડા અને ગાઝિયાબાદ: ₹95.59 પ્રતિ કિલો
મેરઠ: ₹95.47 પ્રતિ કિલો
ગુરુગ્રામ: ₹92.01 પ્રતિ કિલો
રેવાડી: ₹91.59 પ્રતિ કિલો
શામલી: ₹95.47 પ્રતિ કિલો
કાનપુર: ₹98.31 પ્રતિ કિલો
શહેર અને રાજ્ય પ્રમાણે CNGના ભાવમાં તફાવત રહે છે. તેનું મુખ્ય કારણ અલગ-અલગ રાજ્યોમાં લાગુ પડતા VATના દર તેમજ પરિવહન ખર્ચ છે.

આ વર્ષે પાંચમી વખત CNGના ભાવમાં વધારો

IGL દ્વારા આ વર્ષે CNGના ભાવમાં આ પાંચમો વધારો છે. મે મહિનામાં થયેલા વધારા બાદ હવે ફરી ભાવ વધારવામાં આવ્યા છે.

આ અગાઉ IGLએ માત્ર 10 દિવસના સમયગાળામાં ચાર તબક્કામાં CNGના ભાવમાં કુલ ₹6 પ્રતિ કિલોનો વધારો કર્યો હતો. હવે વધુ ₹3.89નો વધારો થતા CNG વાહનચાલકો માટે ઇંધણ ખર્ચ વધુ વધી શકે છે.

પશ્ચિમ એશિયાના સંકટની અસર ગેસના ભાવ પર

પેટ્રોલિયમ કંપનીઓ સાથે જોડાયેલા સૂત્રોના જણાવ્યા પ્રમાણે પશ્ચિમ એશિયામાં સર્જાયેલી ભૌગોલિક-રાજકીય અસ્થિરતાની અસર માત્ર ક્રૂડ ઓઇલ સુધી મર્યાદિત રહી નથી. કુદરતી ગેસ અને LNGના ભાવમાં પણ નોંધપાત્ર વધારો થયો છે.

આ વર્ષે ફેબ્રુઆરીમાં એશિયન બેન્ચમાર્ક JKM LNG નો ભાવ લગભગ $11 પ્રતિ MMBTU હતો, જે ઓગસ્ટમાં વધીને આશરે $23.4 પ્રતિ MMBTU થયો છે.

તેવી જ રીતે યુરોપિયન TTF ગેસ બેન્ચમાર્ક પણ આશરે $11.3 પ્રતિ MMBTUથી વધીને હાલમાં $23.3 પ્રતિ MMBTUની આસપાસ પહોંચ્યો છે.

CNG મોંઘું થતાં વાહનચાલકોના ખર્ચમાં વધારો

કુદરતી ગેસના આંતરરાષ્ટ્રીય ભાવમાં વધારા અને અન્ય ખર્ચને કારણે CNGના ભાવમાં વધારો કરવામાં આવ્યો છે. હવે CNGથી કાર, ઓટો કે અન્ય વાહનો ચલાવતા લોકોને અગાઉની સરખામણીમાં વધુ ખર્ચ કરવો પડશે.

પેટ્રોલ અને ડીઝલના ભાવની જેમ જ CNGના ભાવ પણ શહેર અને રાજ્ય પ્રમાણે અલગ હોય છે. VAT, ગેસની ખરીદી કિંમત અને પરિવહન ખર્ચ જેવા પરિબળો અંતિમ ભાવ નક્કી કરવામાં મહત્વની ભૂમિકા ભજવે છે.

આ પણ વાંચો: સોનાની આયાત ડ્યુટીમાં મોટો ઘટાડો થવાની શક્યતા, ભાવમાં આવી શકે મોટો ફેરફાર

આ પણ વાંચો: Stock Market Today: શેરબજારમાં જોરદાર વાપસી, સેન્સેક્સ 213 પોઈન્ટ ઉછળ્યો; IT શેરોમાં તેજી

આ પણ વાંચો: Stock Market Today 27 August 2026: શેરબજારમાં તેજી યથાવત, સેન્સેક્સ 166 પોઈન્ટ ઉછળ્યો