Tapi News: તાપી જિલ્લાના સોનગઢમાં મકાન અને પારિવારિક સંપત્તિના વિવાદ વચ્ચે દીપક નાયર નામના યુવકના આપઘાતનો (Deepak Nair Suicide Case) મામલો સામે આવ્યો છે. આપઘાત પહેલાં યુવકે રેકોર્ડ કરેલો ઓડિયો-વીડિયો સોશિયલ મીડિયા પર વાયરલ થતાં ચકચાર મચી છે. વીડિયોમાં યુવકે જમીન અને સંપત્તિના (Property Dispute) વિવાદને લઈને કેટલાક લોકો સામે ગંભીર આક્ષેપો કર્યા હતા અને વડાપ્રધાન નરેન્દ્ર મોદી, ગુજરાતના ગૃહ રાજ્યમંત્રી હર્ષ સંઘવી સહિતના નેતાઓ સુધી પોતાનો સંદેશ પહોંચાડવાની અપીલ કરી હતી.
બીજી તરફ, મૃતકની માતા રાધાબેન નાયરની ફરિયાદના આધારે પોલીસે પાંચ શખ્સો સામે ભારતીય ન્યાય સંહિતા (BNS)ની કલમ 108 અને 54 હેઠળ ગુનો નોંધી તપાસ શરૂ કરી છે. પોલીસ તપાસ બાદ જ યુવકના આક્ષેપો અને સમગ્ર વિવાદની હકીકત સ્પષ્ટ થશે.
Deepak Nair Suicide Case: આપઘાત પહેલાં રેકોર્ડ કરેલો ઓડિયો-વીડિયો વાયરલ
વાયરલ ઓડિયોમાં (Viral Audio Video) દીપક નાયરે મકાન અને પારિવારિક સંપત્તિને લગતા વિવાદ અંગે પોતાની વ્યથા વ્યક્ત કરી હતી. યુવકના જણાવ્યા મુજબ, તે છેલ્લા સાતથી આઠ વર્ષથી આ મામલે ન્યાય મેળવવા માટે પ્રયાસ કરી રહ્યો હતો. તેણે એવો પણ આક્ષેપ કર્યો હતો કે આ વિવાદને કારણે તેને અને તેના પરિવારને માનસિક ત્રાસનો સામનો કરવો પડ્યો હતો.
યુવકે ઓડિયોમાં કેટલાક લોકોનાં નામ લઈને તેમની સામે ધમકી આપવા અને ષડયંત્ર રચવાના આક્ષેપો કર્યા હતા. જોકે, આ તમામ આક્ષેપોની સ્વતંત્ર પુષ્ટિ થઈ નથી અને તેની સત્યતા પોલીસ તપાસનો વિષય છે.
‘જીવતા સળગાવી દેવાની ધમકીઓ મળતી હતી’ હોવાનો આક્ષેપ
ઓડિયોમાં દીપક નાયરે સલીમ મુલ્લા, તેમના પુત્ર વસીમ સલીમ મુલ્લા, સાબીર અબ્બાસ પઠાણ, રિયાઝ શેખ અને ઈમ્તિયાઝ શેખનાં નામ લીધાં હતાં. યુવકના આક્ષેપ મુજબ, સંપત્તિના વિવાદમાં તેને ધમકીઓ આપવામાં આવતી હતી. તેણે એવો પણ દાવો કર્યો હતો કે કેટલાક લોકો તેના પરિવારને નુકસાન પહોંચાડવાની વાતો કરતા હતા.
યુવકે દસ્તાવેજો અને પરિવારના નામમાં કથિત ફેરફાર અંગે પણ સવાલો ઉઠાવ્યા હતા. તેના જણાવ્યા મુજબ, લોકડાઉન દરમિયાન તેના દાદાને લઈ જવામાં આવ્યા હતા અને ત્યારબાદ હુકમનામાના આધારે જમીનના રેકોર્ડમાં નામ ચડાવવામાં આવ્યું હતું. આ મુદ્દે તેણે CBI તપાસની માગ કરી હતી.
વડાપ્રધાન મોદી અને હર્ષ સંઘવી સુધી વીડિયો પહોંચાડવાની અપીલ
દીપક નાયરે પોતાના અંતિમ સંદેશમાં વડાપ્રધાન નરેન્દ્ર મોદી, ગુજરાતના ગૃહ રાજ્યમંત્રી હર્ષ સંઘવી, રાજ્યના અન્ય મંત્રી અને જયરામભાઈ ગામીત સુધી વીડિયો પહોંચાડવાની અપીલ કરી હતી. તેણે જમીન-મકાનના વિવાદ અને દસ્તાવેજોમાં કથિત ફેરફાર અંગે CBI તપાસ કરાવવાની માગ કરી હતી.
યુવકે ઓડિયોમાં પોતાના ઘર અંગેની ઇચ્છા વ્યક્ત કરી હતી અને પરિવારના સભ્યોની ચિંતા પણ દર્શાવી હતી. તેણે ન્યાય મેળવવા માટે વર્ષોથી પ્રયાસો કર્યા હોવા છતાં ન્યાય ન મળ્યો હોવાની વ્યથા વ્યક્ત કરી હતી.
માતાની ફરિયાદના આધારે પાંચ શખ્સો સામે ગુનો
મૃતકની માતા રાધાબેન નાયરની ફરિયાદના આધારે પોલીસે (Gujarat Police Investigation) પાંચ વ્યક્તિઓ સામે ગુનો નોંધ્યો છે. ફરિયાદમાં સોનગઢના સલીમ મુલ્લા, વસીમ ઉર્ફે દાદુ, રિયાઝ શેખ, ઈમ્તિયાઝ શેખ અને ઉકાઈના ભીમપુરા વિસ્તારમાં રહેતા બિપીન રતનભાઈ ગામીતનાં નામનો સમાવેશ થાય છે.
પોલીસે ભારતીય ન્યાય સંહિતા (BNS)ની કલમ 108 અને 54 હેઠળ ગુનો નોંધી આગળની કાર્યવાહી હાથ ધરી છે. આ મામલે શંકાસ્પદ આરોપીઓને રાઉન્ડઅપ કરવામાં આવ્યા હોવાની માહિતી પણ સામે આવી છે.
પોલીસ તપાસમાં શું બહાર આવશે?
હાલમાં દીપક નાયરના આપઘાત પાછળનાં ચોક્કસ કારણો, સંપત્તિ વિવાદની હકીકત, દસ્તાવેજોમાં કથિત ફેરફાર અને વાયરલ ઓડિયોમાં કરવામાં આવેલા આક્ષેપોની તપાસ કરવામાં આવી રહી છે. ફરિયાદમાં જણાવેલી વિગતો, સંબંધિત દસ્તાવેજો અને અન્ય પુરાવાઓના આધારે પોલીસ તપાસ આગળ વધશે. આ મામલે આરોપો સાબિત થયા છે એવું હાલ કહી શકાય નહીં. તપાસ પૂર્ણ થયા બાદ જ સમગ્ર ઘટનાની વાસ્તવિક હકીકત અને જવાબદારી અંગે સ્પષ્ટતા થશે.
આ પણ વાંચો: વૃંદાવનમાં પ્રેમાનંદજીના શિષ્યનો આપઘાત, ગુપ્તાંગ કાપી 4થા માળેથી પડતુ મુક્યુ
આ પણ વાંચો: પાડોશી સાથેના ઝઘડા બાદ યુવકનો આપઘાત, બાપુનગર પોલીસે દુષ્પ્રેરણાનો ગુનો નોંધ્યો
આ પણ વાંચો: ડો. હર્ષ પંડ્યા આપઘાત કેસમાં વધુ એક ડોક્ટરની ધરપકડ: ડો. અનુજ મહેશ્વરી પોલીસના સકંજામાં, ડો. નિરાલી હજુ ફરાર
