Deesa Fake Ghee Raid: બનાસકાંઠાના ડીસા શહેરમાં લોકોના આરોગ્ય સાથે ચેડાં કરતા ભેળસેળિયાઓ પર ફૂડ એન્ડ ડ્રગ્સ વિભાગે (Food and Drugs Department) સર્જિકલ સ્ટ્રાઈક કરી છે. શહેરના હીરા બજાર વિસ્તારમાં આવેલી એક દુકાનમાં દરોડો પાડીને અધિકારીઓએ લાખો રૂપિયાની કિંમતનો શંકાસ્પદ નકલી ઘીનો જથ્થો ઝડપી પાડ્યો છે. આ કાર્યવાહીથી સમગ્ર પંથકના વેપારી આલમમાં ફફડાટ વ્યાપી ગયો છે.

Deesaમાં જાણીતી બ્રાન્ડના નામે ચાલતો હતો ખેલ

ફૂડ વિભાગને મળેલી ચોક્કસ બાતમીના આધારે હીરા બજારમાં તપાસ હાથ ધરવામાં આવી હતી. આ દરોડા દરમિયાન દુકાનમાંથી એવી બ્રાન્ડનું ઘી મળી આવ્યું હતું જે સામાન્ય રીતે બજારમાં ગ્રાહકો ખરીદતા હોય છે, જેમાં ‘હાસ્ય’ (Hasya), ‘ગૌરસ’ (Gauras) અને ‘જયમુલ’ (Jaymul) જેવા નામે વેચાતા ઘીના ડબ્બા અને પેકેટ મળી આવ્યા હતા. પ્રાથમિક દ્રષ્ટિએ આ ઘી નકલી અથવા ભારે ભેળસેળયુક્ત હોવાની શંકા સેવાઈ રહી છે.

6 લાખથી વધુનો મુદ્દામાલ જપ્ત

અધિકારીઓએ સ્થળ પરથી કુલ 929 લિટર શંકાસ્પદ ઘીનો જથ્થો ઝડપ્યો છે. બજાર કિંમત મુજબ આ જથ્થાની કિંમત અંદાજે ₹6,14,995 જેટલી થવા જાય છે. વિભાગ દ્વારા આ તમામ જથ્થો સીલ (Seal) કરી દેવામાં આવ્યો છે અને તેના નમૂના લઈ પૃથ્થકરણ માટે લેબોરેટરીમાં મોકલી આપવામાં આવ્યા છે.

રિપોર્ટ બાદ થશે કડક કાર્યવાહી

ડીસામાં ઝડપાયેલા આ ઘીમાં કયા પ્રકારની ભેળસેળ છે તે લેબોરેટરી રિપોર્ટ આવ્યા બાદ જ સ્પષ્ટ થશે. જો રિપોર્ટ નેગેટિવ આવશે તો દુકાનદાર અને આ નેટવર્ક સાથે જોડાયેલા લોકો સામે કાયદેસરની કડક કાર્યવાહી કરવામાં આવશે. ફૂડ વિભાગે આ મામલે ઊંડી તપાસ શરૂ કરી છે કે આ ઘી ક્યાં બનાવવામાં આવતું હતું અને અન્ય કયા શહેરોમાં સપ્લાય કરવામાં આવ્યું છે.

ગ્રાહકો માટે લાલબત્તી સમાન કિસ્સો

તહેવારો કે સામાન્ય દિવસોમાં ઘીની ખરીદી કરતી વખતે ગ્રાહકોએ સાવધ રહેવાની જરૂર છે. સસ્તું અથવા અજાણી બ્રાન્ડનું ઘી ખરીદતા પહેલા તેની વિશ્વસનીયતા ચકાસવી જોઈએ, કારણ કે આવું નકલી ઘી કેન્સર જેવી ગંભીર બીમારીઓ નોતરી શકે છે.

આ પણ વાંચો: અમદાવાદના નરોડા વિસ્તારમાં શંકાસ્પદ ઘી નો જથ્થો ઝડપાયો

આ પણ વાંચો: સુરતમાં જોળવા ગામની ફેક્ટરીના ગોડાઉનમાં દરોડા : વધુ 14 લાખનું શંકાસ્પદ ઘી મળ્યું

આ પણ વાંચો: પાલનપુરમાં ફૂડ એન્ડ ડ્રગ્સ વિભાગનાં દરોડા, 443 લીટર શંકાસ્પદ ઘી જપ્ત