Delhi News : દિલ્હી (Delhi)ના બુરાડી વિસ્તારમાંથી એક ચોંકાવનારો હત્યા કેસ (Delhi Murder Case)સામે આવ્યો છે. 17 વર્ષની સગીર યુવતીની તેના જ પિતરાઈ ભાઈએ કથિત રીતે હત્યા (Cousin Murder) કરી હતી. ત્યારબાદ મૃતદેહને સુટકેસમાં ભરીને બુરાડીના અજિત વિહાર વિસ્તારમાં આવેલા નિર્જન સ્થળે ફેંકી દેવામાં આવ્યો હતો. પોલીસે બાતમીના આધારે આરોપીની ધરપકડ કરી સમગ્ર ઘટનાનો પર્દાફાશ કર્યો છે.
બાતમી મળતાં પોલીસ એક્શનમાં
ડેપ્યુટી કમિશનર ઓફ પોલીસ શોભિત ડી. સક્સેનાના જણાવ્યા મુજબ, જિલ્લા પોલીસના સ્પેશિયલ સ્ટાફને એક વ્યક્તિ શંકાસ્પદ રીતે સુટકેસ લઈને બુરાડી તરફ જઈ રહ્યો હોવાની માહિતી મળી હતી. પોલીસે શંકાસ્પદ વ્યક્તિને અટકાવી પૂછપરછ કરતાં તેણે યુવતીની હત્યા કરી હોવાની કબૂલાત કરી હતી.
આરોપીની ઓળખ બિહારના રહેવાસી અને દિલ્હીના મુકુંદપુર વિસ્તારમાં રહેતા એક કડિયાકામ કરતા યુવક તરીકે થઈ છે. પોલીસ પૂછપરછ દરમિયાન આરોપીએ મૃતદેહનો નિકાલ કર્યો હોવાનું જણાવ્યું હતું.
સુટકેસમાંથી યુવતીનો મૃતદેહ મળ્યો
આરોપીની કબૂલાત બાદ પોલીસ ટીમ બુરાડીના અજિત વિહાર વિસ્તારમાં પહોંચી હતી. ત્યાંથી યુવતીનો મૃતદેહ ભરેલો સુટકેસ (Suitcase Body)કબજે કરવામાં આવ્યો હતો. મૃતદેહને પોસ્ટમોર્ટમ માટે મોકલી દેવામાં આવ્યો છે.
પોસ્ટમોર્ટમ રિપોર્ટ આવ્યા બાદ યુવતીના મૃત્યુનું ચોક્કસ કારણ અને મોતની રીત અંગે વધુ સ્પષ્ટતા થઈ શકે છે.
કૌટુંબિક વિવાદ હત્યાનું કારણ?
પ્રાથમિક પૂછપરછમાં આરોપીએ પોલીસને જણાવ્યું કે કૌટુંબિક વિવાદના કારણે તેણે આ હત્યા કરી હતી. જોકે, પોલીસ અન્ય સંભાવનાઓની પણ તપાસ કરી રહી છે.
પોલીસ સૂત્રોના જણાવ્યા અનુસાર, યુવતીના કોઈની સાથે પ્રેમસંબંધ હોવાની શંકા સહિતના એંગલની પણ તપાસ કરવામાં આવી રહી છે. હાલ પોલીસ આરોપીની પૂછપરછ કરીને હત્યા પાછળનું ચોક્કસ કારણ શોધવાનો પ્રયાસ કરી રહી છે.
પોલીસની વધુ તપાસ ચાલુ
આ મામલે બુરાડી પોલીસને જાણ કરવામાં આવી છે અને સમગ્ર ઘટનાની તપાસ હાથ ધરવામાં આવી છે. પોલીસ યુવતી અને આરોપી વચ્ચેના સંબંધો, કૌટુંબિક વિવાદ તથા હત્યા પહેલાં અને ત્યારબાદની સમગ્ર ઘટનાઓ અંગે માહિતી એકત્ર કરી રહી છે.
