શુક્રવારે દિવસનું મહત્તમ તાપમાન 49 ડિગ્રી સેલ્સિયસ રહ્યા બાદ દિલ્હીના લોકોએ વરસાદ અને ધૂળની ડમરીઓથી રાહતનો શ્વાસ લીધો હતો. હવામાનની આગાહી મુજબ, રાષ્ટ્રીય રાજધાનીની જેમ, ઉત્તર ભારતના ઘણા ભાગોમાં આવતા અઠવાડિયે કાળઝાળ ગરમીમાંથી રાહત મળવાની ધારણા છે.
હવામાન આગાહી એજન્સી સ્કાયમેટના વાઇસ પ્રેસિડેન્ટ મહેશ પલાવતે જણાવ્યું હતું કે, “એક પછી એક વેસ્ટર્ન ડિસ્ટર્બન્સ ગરમીમાંથી તૂટક તૂટક રાહત આપશે. એક સપ્તાહ સુધી ગરમીની લહેર આવવાની કોઈ શક્યતા નથી.” આગામી થોડા દિવસોમાં ઉત્તર ભારતના ઘણા ભાગોમાં કરા અને મધ્યમ વરસાદની આગાહી કરવામાં આવી છે.
1. છૂટાછવાયા વરસાદ, ધૂળની ડમરીઓ અને વાદળછાયું વાતાવરણને કારણે શનિવારે દિલ્હીમાં તાપમાનમાં થોડીક ડિગ્રીનો ઘટાડો થવાની સંભાવના છે.
2. દિલ્હીના પ્રાથમિક વેધર સ્ટેશન સફદરજંગ ઓબ્ઝર્વેટરીમાં મહત્તમ તાપમાન 44.4 ડિગ્રી સેલ્સિયસ નોંધાયું હતું, જે સામાન્ય કરતાં પાંચ ડિગ્રી વધારે હતું.
3. હરિયાણાના કેટલાક ભાગોમાં ધૂળના તોફાન અને જોરદાર પવન સાથે હળવા વરસાદે પારો નીચે લાવી દીધો. રાજસ્થાનના મોટાભાગના વિસ્તારોમાં હીટ વેવની સ્થિતિ યથાવત છે, જોકે રાજ્યને આખરે શનિવારથી આકરી ગરમીમાંથી થોડી રાહત મળી શકે છે.
4. હવામાન વિભાગે દિલ્હી, પંજાબ, હરિયાણા, હિમાચલ પ્રદેશ, ઉત્તરાખંડ અને ઉત્તર પ્રદેશમાં કરા અને વાવાઝોડા માટે ‘ઓરેન્જ એલર્ટ’ પણ જારી કર્યું છે.
5. આગામી પાંચ દિવસ દરમિયાન પશ્ચિમ હિમાલયના પ્રદેશમાં ગાજવીજ સાથે હળવાથી મધ્યમ વરસાદની આગાહી કરવામાં આવી છે.
6. હિમાચલ પ્રદેશમાં 23 મે સુધી છૂટાછવાયા કરા પડવાની સંભાવના છે. પહાડી રાજ્ય ઉત્તરાખંડમાં પણ આગામી પાંચ દિવસમાં કરા પડી શકે છે.
7. આવતા સોમવારે પંજાબ, હરિયાણા અને ઉત્તર પ્રદેશના પશ્ચિમ ભાગમાં કરા પડવાની સંભાવના છે. સોમવાર અને મંગળવારે પૂર્વી યુપીમાં કરા પડવાની સંભાવના છે.
8. આગામી પાંચ દિવસ દરમિયાન આંદામાન અને નિકોબાર ટાપુઓ પર ગાજવીજ સાથે ભારેથી અતિ ભારે વરસાદની સંભાવના છે.
