Mumbai: ઇન્ડિયન પ્રીમિયર લીગની મેચમાં રસ કોને ન હોય, પરંતુ જો તમે ડ્રાઇવર હોવ અને આઇપીએલની મેચ જોતાં-જોતાં બસ ચલાવતા હોવ તો ચેતજો, તમારી નોકરી સુદ્ધા જઈ શકે છે. હા, આઇપીએલની મેચ ડ્રાઇવરની નોકરી છીનવી શકે છે.
મહારાષ્ટ્ર રાજ્ય માર્ગ પરિવહન નિગમ (MSRTC) એ રવિવારે મહારાષ્ટ્રમાં મુંબઈ-પુણે રૂટ પર બસ ચલાવતી વખતે પોતાના મોબાઇલ ફોન પર IPL મેચ જોઈ રહેલા બસ ડ્રાઇવરને નોકરીમાંથી કાઢી મૂક્યો હતો.
વીડિયો વાયરલ થયા બાદ કાર્યવાહી કરવામાં આવી
ન્યૂઝ એજન્સીના અહેવાલ મુજબ, આ મામલો ત્યારે પ્રકાશમાં આવ્યો જ્યારે બસમાં મુસાફરી કરી રહેલા એક મુસાફરે ડ્રાઈવરનો વીડિયો બનાવીને રાજ્યના પરિવહન મંત્રી પ્રતાપ સરનાઈકને મોકલ્યો. મુસાફરે આ વીડિયો સોશિયલ મીડિયા પર પણ શેર કર્યો અને મુખ્યમંત્રી દેવેન્દ્ર ફડણવીસ અને અન્ય મંત્રીઓને ટેગ કર્યા.
વાસ્તવમાં આ ઘટના 22 માર્ચે મુંબઈ અને પુણે વચ્ચે ચાલતી શિવનેરી બસ સેવામાં બની હતી. વીડિયોમાં, ડ્રાઇવર પોતાના મોબાઇલ ફોન પર ક્રિકેટ મેચ જોતી વખતે બસ ચલાવતો જોવા મળ્યો હતો, જેનાથી મુસાફરોની સલામતી જોખમમાં મુકાઈ ગઈ હતી.
પરિવહન મંત્રીએ કડક કાર્યવાહીના આદેશ આપ્યા
મંત્રી પ્રતાપ સરનાઈકને આ બાબતની જાણ થતાં જ તેમણે તાત્કાલિક MSRTCના વરિષ્ઠ અધિકારીઓને કડક કાર્યવાહી કરવા સૂચના આપી. તેમના આદેશ પર, સ્થાનિક અધિકારીઓએ ડ્રાઇવરને નોકરીમાંથી દૂર કર્યા.
બસ સંચાલકને પણ દંડ ફટકારવામાં આવ્યો
આ બસ સેવા એક ખાનગી ઓપરેટર દ્વારા ચલાવવામાં આવી રહી હતી. MSRTC એ માત્ર ડ્રાઇવરને નોકરીમાંથી કાઢી મૂક્યો જ નહીં પરંતુ સંબંધિત ખાનગી કંપની પર 5,000 રૂપિયાનો દંડ પણ ફટકાર્યો.
આ અંગે મંત્રી સરનાઈકે કહ્યું, ‘શિવનેરી સેવા મુંબઈ-પુણે રૂટ પર એક મહત્વપૂર્ણ બસ સેવા છે અને અત્યાર સુધી આ સેવા અકસ્માતમુક્ત રહી છે. મુસાફરોની સલામતી સાથે રમત રમનારા આવા બેદરકાર વાહનચાલકો સામે કડક કાર્યવાહી જરૂરી છે.
તેમણે એમ પણ કહ્યું કે MSRTC હેઠળ કામ કરતી ખાનગી કંપનીઓના ડ્રાઇવરોને નિયમિત તાલીમ આપવામાં આવશે જેથી તેઓ ટ્રાફિક નિયમોનું પાલન કરે.
નવા નિયમો લાગુ કરવાની યોજના
મંત્રીએ એમ પણ કહ્યું કે ઓટો રિક્ષા અને ટેક્સી ડ્રાઇવરો સામે સતત ફરિયાદો મળી રહી છે કે તેઓ મોબાઇલ ફોન પર મેચ અથવા ફિલ્મો જોતી વખતે વાહન ચલાવે છે. આ માટે, પરિવહન વિભાગ ટૂંક સમયમાં નવા નિયમો લાગુ કરશે જેથી માર્ગ સલામતી સુનિશ્ચિત કરી શકાય.
આ પણ વાંચો: IPLમાં SRHનો વિજયી પ્રારંભ, રાજસ્થાનને 44 રને હરાવ્યું, ઇશાન કિશનની સદી
આ પણ વાંચો: MS ધોનીએ IPLમાંથી નિવૃત્તિના સસ્પેન્સનો અંત કર્યો, એવી વાત કહી કે ચાહકો થઈ જશે ખુશ
આ પણ વાંચો: વિરાટ કોહલીની સુરક્ષામાં મોટી ચૂક, પીચ પર પહોંચી ગયો ફેન અને…
