અફઘાનિસ્તાનના પૂર્વી પક્તિકા પ્રાંતમાં આવેલા શક્તિશાળી ભૂકંપમાં ઓછામાં ઓછા 3,200 લોકોના મોત થયા છે. દેશની સત્તાવાર સમાચાર એજન્સીએ આ માહિતી આપી છે. સરકારી સમાચાર એજન્સી ‘બખ્તર’એ બુધવારે મૃતકોની સંખ્યા અંગે માહિતી આપી અને જણાવ્યું કે બચાવકર્મીઓ હેલિકોપ્ટર દ્વારા ઘટનાસ્થળે પહોંચી રહ્યા છે.
પક્તિકા પ્રાંતમાં 6ની તીવ્રતાના ભૂકંપ અંગે વધુ માહિતી પ્રાપ્ત થઈ નથી. આ આફત એવા સમયે દેશમાં આવી છે જ્યારે અફઘાનિસ્તાનમાંથી અમેરિકી દળોની હકાલપટ્ટી બાદ તાલિબાન દ્વારા દેશ પર કબજો જમાવવાના કારણે આંતરરાષ્ટ્રીય સમુદાયે અફઘાનિસ્તાનથી પોતાને દૂર કરી લીધા છે.
આ સ્થિતિને કારણે, 38 મિલિયનની વસ્તીવાળા દેશમાં બચાવ કામગીરી હાથ ધરવી ખૂબ જટિલ હોવાની અપેક્ષા છે. તાલિબાન સરકારના નાયબ પ્રવક્તા બિલાલ કરીમીએ ટ્વીટ કરીને કહ્યું કે, પક્તિકા પ્રાંતના ચાર જિલ્લામાં આવેલા તીવ્ર ભૂકંપમાં આપણા દેશના સેંકડો લોકો માર્યા ગયા છે અને અનેક મકાનો ધરાશાયી થયા છે.
તેમણે કહ્યું, ‘અમે તમામ સહાય એજન્સીઓને પરિસ્થિતિને સંભાળવા માટે તાત્કાલિક તેમની ટીમોને સ્થળ પર મોકલવા વિનંતી કરીએ છીએ.યુરોપીયન મેડિટેરેનિયન સિસ્મોલોજીકલ સેન્ટર (EMSC) અનુસાર, અફઘાનિસ્તાન, પાકિસ્તાન અને ભારતમાં આંચકા અનુભવાયા હતા. પાકિસ્તાનના હવામાન વિભાગના જણાવ્યા અનુસાર, ભૂકંપનું કેન્દ્ર અફઘાનિસ્તાનના ખોસ્ટથી 44 કિમી દક્ષિણ-પશ્ચિમમાં 50.8 કિમીની ઊંડાઈએ હતું.
