કુદરત દ્વારા સર્જાયેલા પહાડો, નદીઓ, દરિયા (sea)અને ટાપુઓ (આઇલેન્ડ્સ) ની સુંદરતાની સરખામણી કોઈની સાથે થઈ શકે નહીં. પરંતુ આજના આધુનિક યુગમાં માનવીય ઈજનેરી (Engineering) અને સ્થાપત્યકળાએ એવો ચમત્કાર કરી બતાવ્યો છે કે દરિયાની વચ્ચે માનવસર્જિત ટાપુઓ તૈયાર કરી દીધા છે.
પહેલી નજરે જોતાં જ આ ટાપુઓ કુદરતી રચના જેવા જ નયનરમ્ય લાગે છે, પરંતુ આ તમામ આર્ટિફિશિયલ આઇલેન્ડ્સ (Man-made Islands) છે. આજે આ સ્થળો વિશ્વભરમાં જાણીતા પ્રવાસન ધામ બની ચૂક્યા છે અને દેશ-વિદેશથી લાખો પ્રવાસીઓ તેની મુલાકાતે આવે છે.
પામ જુમેરાહ (Palm Jumeirah) – દુબઈ, યુ.એ.ઈ.
પામ જુમેરાહ આજે દુબઈની વૈશ્વિક ઓળખ બની ચૂક્યું છે. ખજૂરીના વૃક્ષ (Palm Tree) ના આકારમાં આકાર પામેલા આ ટાપુનું નિર્માણ કાર્ય વર્ષ 2001 માં શરૂ થયું હતું અને માત્ર 5 વર્ષના ટૂંકા ગાળામાં એટલે કે 2006 માં પૂર્ણ થયું હતું. રેતી અને ખડકોના મજબૂત આધાર પર બનેલા આ ટાપુ પર વિશ્વની સૌથી વૈભવી અને આલીશાન હોટેલ્સ આવેલી છે. અહીં આશરે 80,000 લોકો એકસાથે રહી શકે તેવી વ્યવસ્થા છે.
ધ વર્લ્ડ આઇલેન્ડ્સ (The World Islands) – દુબઈ, યુ.એ.ઈ.
દુબઈનો આ બીજો એક અત્યંત મહત્વાકાંક્ષી અને અનોખો પ્રોજેક્ટ છે. દરિયાની વચ્ચે વિશ્વના નકશા (World Map) ના આકારમાં આશરે 300 જેટલા ખાનગી ટાપુઓનો સમૂહ તૈયાર કરવામાં આવી રહ્યો છે. અહીંનો દરેક નાનો ટાપુ વિશ્વના કોઈને કોઈ દેશનું પ્રતિનિધિત્વ કરે છે. કેટલાક તૈયાર ટાપુઓ પર પ્રવાસીઓ માટે અલ્ટ્રા-લક્ઝુરિયસ હોટેલ્સ અને રિસોર્ટ્સ શરૂ કરી દેવામાં આવ્યા છે.
ધ પર્લ-કતર (The Pearl-Qatar) – દોહા, કતર
અરબની ખાડીમાં આશરે 4 મિલિયન ચોરસ મીટરમાં ફેલાયેલો આ માનવસર્જિત ટાપુ કતરની રાજધાની દોહાના દરિયાકાંઠે સ્થિત છે.કતરના ઐતિહાસિક મોતી ઉદ્યોગ (Pearling Industry) ને શ્રદ્ધાંજલિ આપવા માટે આ સમગ્ર આઇલેન્ડને ‘મોતીની માળા’ જેવા આકારમાં ડિઝાઈન કરવામાં આવ્યો છે. અહીં હાઈ-એન્ડ શોપિંગ મોલ્સ અને લક્ઝરી રેસિડેન્શિયલ એપાર્ટમેન્ટ્સ આવેલા છે.
હુલહુમાલે (Hulhumale) – માલદીવ
વધતી જતી વસ્તી અને ગ્લોબલ વોર્મિંગને કારણે દરિયાઈ સપાટી વધવાના જોખમને પહોંચી વળવા માલદીવ્સે સમુદ્રમાંથી જમીન પુનઃપ્રાપ્ત (Land Reclamation) કરીને આ અદ્ભુત આઇલેન્ડ બનાવ્યો છે.વર્ષ 2004 માં ખુલ્લો મૂકાયેલો આ આઇલેન્ડ આજે માલદીવ્સ જતાં તમામ પર્યટકો માટે એક પ્રમુખ આકર્ષણનું કેન્દ્ર બની ગયો છે.
કન્સાઈ ઇન્ટરનેશનલ એરપોર્ટ (Kansai International Airport) – જાપાન
ઈજનેરી દુનિયાની સૌથી અદ્ભુત સિદ્ધિઓમાંની એક એટલે જાપાનના ઓસાકા ખાડી (Osaka Bay) માં સમુદ્રની વચ્ચે માનવસર્જિત ટાપુ પર બનેલું કન્સાઈ એરપોર્ટ. 4 સપ્ટેમ્બર 1994ના રોજ શરૂ થયેલું આ એરપોર્ટ વિશ્વનું સૌથી અનોખું અને સાહસિક કન્સ્ટ્રક્શન માનવામાં આવે છે, જે સંપૂર્ણપણે સમુદ્ર પર બનાવેલા આર્ટિફિશિયલ ટાપુ પર ટકેલું છે.
આ પણ વાંચો :કપલ કે બે મિત્રો માટે બાલી ટ્રિપનો કુલ ખર્ચ કેટલો થશે? જુઓ સંપૂર્ણ ગણતરી
આ પણ વાંચો :યુનેસ્કોની વર્લ્ડ હેરિટેજ યાદીમાં વારાણસીના ‘સારનાથ’નો સમાવેશ, જાણો ભારતની 10 શ્રેષ્ઠ ઐતિહાસિક વિરાસતો વિશે
આ પણ વાંચો :શું તમે માનસિક રીતે મજબૂત છો? તમારા વર્તનમાં દેખાતા આ 4 ખાસ બદલાવ આપે છે સંકેત!
