Ahmedabad News : ગુજરાતમાં રિન્યુએબલ એનર્જી ક્ષેત્રને લઈને વધુ એક મહત્વપૂર્ણ વિકાસ થયો છે. અમદાવાદમાં Envision Energyનો નવો વિન્ડ બ્લેડ પ્લાન્ટ (Wind Blade Plant) શરૂ કરવામાં આવ્યો છે. રાજ્યના મંત્રી ઋષિકેશ પટેલે આ અત્યાધુનિક મેન્યુફેક્ચરિંગ પ્લાન્ટનું ઉદ્ઘાટન કર્યું હતું. કંપનીના જણાવ્યા મુજબ આ સુવિધા ગુજરાતના ક્લીન એનર્જી મેન્યુફેક્ચરિંગ ઇકોસિસ્ટમને વધુ મજબૂત બનાવવામાં મહત્વની ભૂમિકા ભજવશે.
અમદાવાદમાં Envision Energyનો 2.66 GW પ્લાન્ટ
અમદાવાદ પ્લાન્ટ (Ahmedabad Plant) ભારતમાં Envision Energyની ત્રીજી વિન્ડ ટર્બાઇન બ્લેડ મેન્યુફેક્ચરિંગ સુવિધા છે. પ્લાન્ટની સ્થાપિત મેન્યુફેક્ચરિંગ ક્ષમતા 2.66 GW છે. અહીં હાઇ-પરફોર્મન્સ વિન્ડ ટર્બાઇન માટેના મોટા કદના બ્લેડ તૈયાર કરવામાં આવશે.
કંપનીના જણાવ્યા પ્રમાણે આ પ્લાન્ટમાં 100 મીટર સુધીના બ્લેડના ઉત્પાદન માટેની ક્ષમતા વિકસાવવામાં આવી છે. 75 એકરમાં ફેલાયેલા આ કેમ્પસમાં આશરે 6.5 લાખ ચોરસ ફૂટનું બિલ્ટ-અપ એરિયા છે.
4,000થી વધુ લોકોને રોજગારીની શક્યતા
આ પ્રોજેક્ટથી સ્થાનિક સ્તરે રોજગારી અને ઔદ્યોગિક પ્રવૃત્તિ વધવાની શક્યતા છે. કંપની અનુસાર પ્લાન્ટમાંથી સીધી અને પરોક્ષ રીતે 4,000થી વધુ લોકોને રોજગારી મળી શકે છે.
ગ્રીન એનર્જી (Green Energy) ક્ષેત્રના વિસ્તરણ સાથે વિન્ડ ટર્બાઇન, બ્લેડ અને અન્ય સાધનોના સ્થાનિક ઉત્પાદનને પણ વેગ મળવાની અપેક્ષા છે. આ પ્રકારની મેન્યુફેક્ચરિંગ સુવિધાઓ રિન્યુએબલ એનર્જી (Renewable Energy) સપ્લાય ચેઇનને સ્થાનિક સ્તરે મજબૂત કરવામાં મદદરૂપ બની શકે છે.
ભારતમાં ₹500 કરોડના વધારાના રોકાણની જાહેરાત
Envision Energyના જણાવ્યા મુજબ કંપનીએ ભારતમાં અત્યાર સુધીમાં આશરે ₹500 કરોડનું રોકાણ કર્યું છે અને 3,000થી વધુ રોજગારીની તકો ઊભી કરી છે. કંપનીએ વાર્ષિક આશરે 3 GWની મેન્યુફેક્ચરિંગ ક્ષમતા પણ વિકસાવી છે.
આગામી તબક્કામાં કંપની ભારતમાં વધુ ₹500 કરોડનું રોકાણ કરવાની યોજના ધરાવે છે. આ રોકાણ બાદ દેશની કુલ મેન્યુફેક્ચરિંગ ક્ષમતા આશરે 5 GW પ્રતિ વર્ષ સુધી પહોંચાડવાનું લક્ષ્ય છે. કંપનીના જણાવ્યા પ્રમાણે આ વિસ્તરણથી દેશમાં વધુ 3,000 જેટલી રોજગારીની તકો ઊભી થઈ શકે છે.
મંત્રી ઋષિકેશ પટેલે જણાવ્યું હતું કે ગુજરાતનું રોકાણલક્ષી વાતાવરણ, મજબૂત ઈન્ફ્રાસ્ટ્રક્ચર, વિશ્વસનીય વીજ વ્યવસ્થા અને પ્રગતિશીલ નીતિઓ અદ્યતન મેન્યુફેક્ચરિંગ તથા ગ્રીન એનર્જી ક્ષેત્રના રોકાણ માટે અનુકૂળ માહોલ ઊભો કરી રહી છે.
રાજ્ય સરકારના જણાવ્યા મુજબ Integrated Renewable Energy Policy-2025 અંતર્ગત ગ્રીન-ટેક મેન્યુફેક્ચરિંગ, ગ્રિડ સ્ટેબિલિટી અને રિન્યુએબલ એનર્જી પ્રોજેક્ટ્સને પ્રોત્સાહન આપવામાં આવી રહ્યું છે. અમદાવાદમાં શરૂ થયેલી આ સુવિધાને ગુજરાતમાં સ્વચ્છ ઊર્જા સંબંધિત મેન્યુફેક્ચરિંગ ક્ષમતાના વિસ્તરણ સાથે જોડવામાં આવી રહી છે.
