Gujarat News: ગુજરાતમાં ચોમાસાના અંતિમ તબક્કામાં મેઘરાજાએ ફરી જોર પકડ્યું છે. માત્ર 6 કલાકમાં રાજ્યના 126 તાલુકામાં વરસાદ (Farmers Crop Loss) નોંધાયો છે. દક્ષિણ ગુજરાતમાં ભારે વરસાદ વચ્ચે નવસારી અને વલસાડમાં રેડ એલર્ટ જાહેર કરાયું છે. વાંસદામાં ત્રણ ઈંચ સુધી વરસાદ નોંધાયો છે, જ્યારે તાપીના ઉકાઈમાં 24 કલાકમાં 11 ઈંચથી વધુ વરસાદ ખાબક્યો છે. એટલે સવાલ હવે માત્ર એટલો નથી કે ગુજરાતમાં કેટલો વરસાદ પડ્યો? સવાલ એ છે કે આ વરસાદથી ખેડૂતોને ખરેખર કેટલો ફાયદો થશે?
કારણ કે આ વરસાદ આવે એ પહેલાં ખેડૂતે લાંબો સંઘર્ષ કર્યો છે. લાંબો વરસાદી વિરામ પડતાં અનેક વિસ્તારોમાં ખેતરોમાં ભેજ ઘટ્યો, પાક સુકાવા લાગ્યો અને ખેડૂતોને ઉભો પાક બચાવવા (Gujarat Farmer Crisis) બોરવેલ, કૂવા અને સિંચાઈના પાણીનો સહારો લેવો પડ્યો. સ્થિતિ એવી બની કે કેટલાક વિસ્તારોમાં પાણીના અભાવે ખેડૂતોને પાક ઉખાડી નાખવાની અથવા પશુઓને ચરાવી દેવાની ફરજ પડી હોવાના અહેવાલો સામે આવ્યા છે. અમરેલીના ધારીમાં કપાસના પાકને નુકસાન થતાં એક ખેડૂતે 20 વીઘાના પાકમાં પશુઓ ચરાવીને ટ્રેક્ટર ફેરવી દીધું હોવાનો અહેવાલ પણ સામે આવ્યો છે. બગસરા અને ગીર સોમનાથ વિસ્તારમાં પણ મગફળી, કપાસ અને સોયાબીનના પાક પર વરસાદની અછતની અસર નોંધાઈ હતી.
Farmers Crop Loss: ગુજરાતમાં ફરી ભારે વરસાદનો રાઉન્ડ શરૂ
આ મુશ્કેલી એટલી ગંભીર બની કે વાત ગુજરાત વિધાનસભા સુધી પહોંચી. ચોમાસાની બેઠક દરમિયાન ઓછા વરસાદ અને ખેડૂતોની સ્થિતિને લઈને દુષ્કાળ જાહેર કરવાની માંગ ઉઠી. સરકારે સ્પષ્ટ કર્યું કે માત્ર વરસાદની ઘટના આધારે દુષ્કાળ જાહેર કરી શકાય નહીં અને ખરીફ સિઝનના અંતે સર્વે બાદ નિર્ણય લેવામાં આવશે. બીજી તરફ પાક નિષ્ફળ ગયેલા વિસ્તારોમાં ખેડૂતોની લોન માફ કરવાની માંગ પણ ઉઠી હતી. સરકારે કહ્યું કે પાક નિષ્ફળતાની સ્થિતિ અંગે યોગ્ય નિર્ણય લેવામાં આવશે. એટલે એક વાત સ્પષ્ટ છે. ખેડૂત માટે આ માત્ર વરસાદનો મુદ્દો નથી, પરંતુ પાક, ખર્ચ, દેવું અને આવકનો સવાલ બની ગયો છે.
ખેડૂતનો સંઘર્ષ અહીં જ અટક્યો નથી. લાંબા વરસાદી વિરામ વચ્ચે ઉભા પાકને બચાવવા માટે સરકારે 21 જિલ્લાઓમાં ખેતી માટેનો વીજ પુરવઠો 8 કલાકથી વધારીને 10 કલાક કર્યો હતો, જેથી ખેડૂતો બોરવેલમાંથી પાણી ખેંચીને પાક બચાવી શકે. એટલે જ્યાં આકાશમાંથી પાણી મળતું નહોતું ત્યાં ખેડૂતે જમીનમાંથી પાણી ખેંચીને પાક જીવાડવાનો પ્રયાસ કર્યો. પરંતુ દરેક ખેડૂત પાસે પૂરતું સિંચાઈનું પાણી, બોરવેલ કે આર્થિક ક્ષમતા હોય એવું નથી. પરિણામે એક ખેડૂત પાક બચાવવા પાણી અને વીજળી પાછળ ખર્ચ કરતો રહ્યો, તો બીજા ખેડૂતને પાક જ છોડવો પડ્યો.
હવે મેઘરાજા વરસ્યા છે તો જ્યાં પાક હજુ ઉભો છે ત્યાં ચોક્કસ રાહતની આશા છે. જમીનમાં ભેજ વધશે તો પાણીની તંગીથી મુશ્કેલીમાં મુકાયેલા પાકને નવજીવન મળી શકે છે. પરંતુ જે ખેડૂતે પાક પહેલેથી ઉખાડી નાખ્યો છે, તેના માટે આ વરસાદ મોડેથી આવેલી મહેર છે. વરસાદ ખેતરમાં પડ્યો છે, પરંતુ દરેક ખેડૂતના નુકસાન પર પડેલી મારને પાછી ખેંચી શકતો નથી. અને બીજી તરફ જો આગામી દિવસોમાં અતિભારે વરસાદ પડે તો પાણી ભરાવાથી ઉભા પાકને નુકસાન થવાનો નવો ખતરો પણ ઊભો થઈ શકે છે.
આ જ કારણે આગામી બે દિવસ ગુજરાતના ખેડૂતો માટે અત્યંત મહત્વના છે. રાજ્યમાં સરેરાશ વરસાદ 75 ટકાથી વધુ થયો હોવા છતાં વરસાદની અસમાનતા યથાવત છે અને કેટલાક જિલ્લાઓમાં મોટી ઘટ છે. સૌરાષ્ટ્ર અને કચ્છના અનેક વિસ્તારો હજુ પણ વરસાદની રાહ જોઈ રહ્યા છે, જ્યારે દક્ષિણ ગુજરાતમાં ભારે વરસાદની આગાહી છે. એટલે હવે સવાલ “ગુજરાતમાં કેટલો વરસાદ પડ્યો?”નો નહીં, પરંતુ “ખેડૂતના ખેતરમાં કેટલો પાક બચ્યો?”નો છે. મેઘરાજા આવ્યા છે… હવે જોવાનું એ છે કે આ વરસાદ ખેડૂતો માટે સાચી રાહત બને છે કે પછી ઘણું મોડું થઈ ગયેલી મહેર સાબિત થાય છે.
આ પણ વાંચો: અમરેલીમાં મેઘમહેર, વડિયા-બાબરા-લાઠી-લીલીયામાં વરસાદથી ખેડૂતોને મોટી રાહત
આ પણ વાંચો: દેશના 19 રાજ્યોમાં ભારે વરસાદ આંધીનું એલર્ટ, 70 કિમીની ઝડપે પવનની આગાહી
આ પણ વાંચો: ગુજરાતમાં મેઘતાંડવઃ 193 તાલુકામાં વરસાદ, દક્ષિણ ગુજરાતમાં જળબંબાકારની સ્થિતિ
