ફીફા (FIFA)વર્લ્ડ કપ 2026 માં રોમાંચક મુકાબલાઓ વચ્ચે ઇંગ્લેન્ડે શાનદાર પ્રદર્શન કરીને સેમિફાઇનલમાં પોતાની જગ્યા પાકી કરી લીધી છે. મિયામી સ્ટેડિયમ ખાતે રમાયેલી રોમાંચક ક્વાર્ટર ફાઇનલ મેચમાં ઇંગ્લેન્ડે નોર્વેને 2-1 થી માત આપી હતી. ઇંગ્લેન્ડની આ જીતના અસલી હીરો સ્ટાર મિડફિલ્ડર જુડ બેલિંગહામ રહ્યા, જેમણે બે યાદગાર ગોલ કરીને આખી મેચનું પાસું પલટી નાખ્યું હતું. આ ઐતિહાસિક જીત સાથે ઇંગ્લેન્ડ ફૂટબોલ ઇતિહાસમાં ચોથી વખત વર્લ્ડ કપના સેમિફાઇનલમાં પ્રવેશ્યું છે.
પ્રથમ હાફમાં નોર્વેની લીડ બાદ બેલિંગહામનો વળતો પ્રહાર
મેચની શરૂઆત નોર્વે માટે શાનદાર રહી હતી. મેચની 36 મી મિનિટે નોર્વેના એન્ડ્રેસ શેલ્ડ્રેપે શાનદાર ગોલ કરીને પોતાની ટીમને 1-0 ની લીડ અપાવી હતી. આ ગોલ સાથે એન્ડ્રેસ વર્લ્ડ કપની ક્વાર્ટર ફાઇનલમાં ગોલ કરનાર નોર્વેનો પ્રથમ ખેલાડી બન્યો હતો. જોકે, નોર્વેની આ ખુશી લાંબો સમય ટકી શકી નહીં. પ્રથમ હાફ પૂરો થવાના બરાબર પહેલાં, એટલે કે 47મી મિનિટે (ઇન્જરી ટાઇમમાં) જુડ બેલિંગહામે શાનદાર ગોલ કરીને ઇંગ્લેન્ડને 1-1 ની બરાબરી પર લાવી દીધું હતું.
બીજા હાફના છેલ્લા સમયમાં બેલિંગહામે અપાવી ઐતિહાસિક જીત
પ્રથમ હાફ 1-1 ની બરાબરી પર રહ્યા બાદ બીજા હાફમાં બંને ટીમો વચ્ચે જોરદાર ટક્કર જોવા મળી હતી. નિર્ધારિત સમય સુધી કોઈ ટીમ ગોલ કરી શકી નહોતી અને મેચ ડ્રો તરફ વધી રહી હતી. પરંતુ બીજા હાફના વધારાના સમયની ત્રીજી મિનિટે જુડ બેલિંગહામે ફરી એકવાર પોતાની પ્રતિભાનો જાદુ ચલાવ્યો અને બીજો ગોલ કરીને ઇંગ્લેન્ડને 2-1 થી રોમાંચક વિજય અપાવ્યો હતો. આ ગોલ સાથે જ ઇંગ્લેન્ડની સેમિફાઇનલની ટિકિટ કન્ફર્મ થઈ ગઈ હતી.
મહાન ફૂટબોલર પેલેના ઐતિહાસિક રેકોર્ડની બરાબરી
નોર્વે સામેના આ બે ગોલની મદદથી 23 વર્ષીય જુડ બેલિંગહામે ફૂટબોલના મહાન જાદુગર પેલેના એક મોટા રેકોર્ડની બરાબરી કરી લીધી છે. ફીફા વર્લ્ડ કપના ઇતિહાસમાં 23 વર્ષ કે તેથી ઓછી ઉંમરમાં સૌથી વધુ ગોલ કરવાના મામલે હવે બેલિંગહામ અને પેલે બંને 7–7 ગોલ સાથે બરાબરી પર છે (આ યાદીમાં કાયલિયન એમબાપ્પે 12 ગોલ સાથે ટોચ પર છે). આ ઉપરાંત, પેલે પછી બેલિંગહામ વિશ્વનો બીજો સૌથી યુવા ખેલાડી બન્યો છે જેણે સતત બે વર્લ્ડ કપ નોકઆઉટ મેચોમાં બે કે તેથી વધુ ગોલ કર્યા હોય. આ સાથે જ તે ચાલુ વર્લ્ડ કપમાં 6 ગોલ કરીને ઇંગ્લેન્ડ તરફથી એક જ ટૂર્નામેન્ટમાં સૌથી વધુ ગોલ કરવાના મામલે ગેરી લિંકર અને હેરી કેનની ક્લબમાં સામેલ થઈ ગયો છે.
