Former BJP MP Returns To Teaching: રાજકારણમાં સક્રિયતા ઘટ્યા બાદ પૂર્વ સાંસદો સામાન્ય રીતે અન્ય રાજકીય માર્ગો શોધતા હોય છે, પરંતુ ત્રિપુરાના ભાજપના પૂર્વ સાંસદ રેબતી ત્રિપુરાએ(Rebati Tripura) એક અનોખો રાહ પકડી છે. તેમણે રાજકારણથી અંતર જાળવીને પોતાના મૂળ વ્યવસાય એવા શિક્ષણ ક્ષેત્રે પુનરાગમન કર્યું છે અને ફરીથી સરકારી શાળામાં શિક્ષક તરીકે સેવાઓ આપવાનું શરૂ કર્યું છે.

Rebati Tripura ની શિક્ષકથી સંસદ સુધીની સફર

ત્રિપુરાના ધલાઈ જિલ્લાના અંતરિયાળ ગામના રહેવાસી રેબતી ત્રિપુરાએ પોલિટિકલ સાયન્સમાં પોસ્ટ ગ્રેજ્યુએશન (PG) પૂર્ણ કર્યા બાદ વર્ષ 2001માં અગરતલાની મહાત્મા ગાંધી મેમોરિયલ સ્કૂલમાં શિક્ષક તરીકે પોતાની કારકિર્દીની શરૂઆત કરી હતી.

વર્ષ 2014માં તેઓ ભાજપમાં જોડાયા હતા અને 2019ની લોકસભા ચૂંટણીમાં પક્ષે તેમને પૂર્વ ત્રિપુરા સંસદીય બેઠક પરથી ટિકિટ આપી હતી, જેમાં વિજય મેળવીને તેઓ સંસદમાં પહોંચ્યા હતા.

રાજકારણથી દૂર થવાનું કારણ અને પુનરાગમન

ગત લોકસભા ચૂંટણીમાં ભાજપે તેમની જગ્યાએ ત્રિપુરા રાજપરિવારના સભ્ય અને ટીપ્રા મોથાના પ્રમુખ પ્રદ્યોત કિશોર દેબબર્માના બહેન કૃતિ દેવી દેબબર્મને ઉમેદવાર બનાવ્યા હતા. જોકે તેઓ પક્ષની કોર કમિટીના સભ્ય રહ્યા, પરંતુ છેલ્લા અઢી વર્ષથી પક્ષની પ્રવૃત્તિઓમાં તેમની સક્રિયતા નહિવત્ રહી હતી અને તાજેતરની હોદ્દેદારોની યાદીમાં પણ તેમનું નામ નહોતું.

કોઈ મોટી રાજકીય જવાબદારી ન હોવાને કારણે તેમણે 20મી જુલાઈથી પોતાની જૂની સરકારી શાળામાં પોસ્ટ ગ્રેજ્યુએટ ટીચર તરીકે ફરીથી ચાર્જ સંભાળી લીધો છે.

પૂર્વ સાંસદનું નિવેદન અને આર્થિક સુરક્ષા

રેબતી ત્રિપુરાએ(Rebati Tripura) જણાવ્યું કે આ નિર્ણયથી તેમને જીવનમાં એક નવો હેતુ મળ્યો છે અને નિવૃત્તિ પછીના લાભો જેવા કે અંદાજે 50,000 રૂપિયાનું માસિક પેન્શન પણ નિશ્ચિત થશે, જે ભવિષ્યની આર્થિક સુરક્ષા માટે ખૂબ મહત્વનું છે.

શાળાના કાર્યકારી પ્રિન્સિપાલ ટીટુ સાહાના જણાવ્યા અનુસાર, પૂર્વ સાંસદ (Rebati Tripura) શાળામાં નિયમિત આવીને પૂરી નિષ્ઠા અને સમર્પણ સાથે વિદ્યાર્થીઓને ભણાવી રહ્યા છે અને સાથી કર્મચારીઓ સાથે ઉત્તમ તાલમેલ જાળવી રહ્યા છે.

આ પણ વાંચો: હરિયાણા અને ત્રિપુરા સહિત 4 રાજ્યોને મળ્યા નવા ભાજપ પ્રદેશ પ્રમુખ, જુઓ સંપૂર્ણ યાદી

આ પણ વાંચો:રાજકોટ મનપાના નવા મેયર તરીકે ડો. નેહલ શુક્લની વરણી, ડેપ્યુટી મેયર બન્યા દક્ષા વસાણી

આ પણ વાંચો:આણંદ મનપાના નવા મેયર તરીકે દિપિકાબેન પટેલની વરણી, ડેપ્યુટી મેયર બન્યા કમલેશ ડાભી