મોહસીન દાલ, પંચમહાલ @ મંતવ્ય ન્યૂઝ
ગુજરાતમાં ચુસ્ત દારૂબંધીના અમલમાં સખ્ત પોલીસ તંત્રની નજરોમાંથી સલામત રહેવા માંગતા બુટલેગરોના અવનવા કિમીયાઓ સામે એક પ્રકરણમાં કાલોલ તાલુકાના ડેરોલ ગામના અનિલ ઉર્ફે અન્ના સોનીએ હરિયાણા રાજ્યમાંથી ૫ પેટીઓ વિદેશી શરાબનો જથ્થો ટ્રાન્સપોર્ટ મારફતે મંગાવ્યો હોવાના ચોંકાવનારા આ કરતુતોનો ગોધરા એલ.સી.બી. શાખાના પી.આઈ.ડી.એન.ચુડાસમા એ પર્દાફાશ કરતા બુટલેગરોની અંધારી આલમમાં ખળભળાટ પ્રસરી જવા પામ્યો છે.
ગોધરા એલ.સી.બી. શાખાના પી.આઈ.ડી.એન.ચુડાસમાને ગુપ્તરાહે બાતમી મળી હતી કે કાલોલ તાલુકાના ડેરોલ ગામના બુટલેગર અનિલ ઉર્ફે અન્નો શિવકુમાર સોનીએ હરિયાણા રાજ્યના ફરીદાબાદ ખાતેથી ખોટી બીલ્ટીના આધારે ૫ કાર્ટુનોમાં વિદેશી શરાબનો જથ્થો મંગાવ્યો હોવાના આધારે એલ.સી.બી.શાખા દ્વારા સર્ચ ઓપરેશન હાથ ધરવામાં આવ્યું હતું.
ગુપ્તરાહના આ સર્ચ ઓપરેશનમાં હાલોલ ગાયત્રી નગર સોસાયટી સામે બાયપાસ રોડ ઉપર આવેલ ટી.સી.આઈ.એક્સપ્રેસ ટ્રાન્સપોર્ટ ઓફિસના ગોડાઉનમાં તપાસ ધરી હતી, ત્યાં એલોવેરા જેલના નામે પ્લાસ્ટિક થર્મોકોલમાં પેકિંગ સાથે આવેલા ૫ કાર્ટુનો માંથી બ્લેક એન્ડ વ્હાઈટ સ્કોચ વ્હીસ્કીની અંદાઝે ૮૪ હજારની ૬૦ બોટલો ઝડપી પાડીને કાયદેસર કાર્યવાહી હાથ ધરતા બુટલેગરોના આ ચોંકાવનારા કરતુતોનો પર્દાફાશ કર્યો હતો.!!