Rajkot News: શ્રી ખોડલધામ ટ્રસ્ટ-કાગવડ અને શ્રી સરદાર પટેલ કલ્ચરલ ફાઉન્ડેશન- રાજકોટની યુવા પાંખ શ્રી ખોડલધામ વિદ્યાર્થી સમિતિમાંથી તાલીમ મેળવીને તાજેતરમાં સરકારી નોકરીની સ્પર્ધાત્મક પરીક્ષામાં સફળ થયેલા વિદ્યાર્થીઓના સન્માન સમારોહ અને લેઉવા પટેલ સમાજના અધિકારીઓ/કર્મચારીઓના ભવ્યાતિભવ્ય સ્નેહમિલન સમારોહનું આયોજન તારીખ 8 માર્ચ 2026 ને રવિવારના રોજ કાગવડ સ્થિત સુપ્રસિદ્ધ શ્રી ખોડલધામ મંદિર ખાતે કરવામાં આવ્યું હતું.
ચેરમેન નરેશ પટેલની અધ્યક્ષતામાં યોજાયેલા આ કાર્યક્રમમાં સંસ્થામાંથી તાલીમ મેળવી સરકારી નોકરીમાં સફળતા મેળવનાર વિદ્યાર્થીઓનું સન્માન કરાયું હતું. આ કાર્યક્રમમાં આશરે 1 હજારથી વધુ ક્લાસ 1,2,3,4ના અધિકારીઓ/કર્મચારીઓ સહપરિવાર ઉપસ્થિત રહ્યા હતા.
કાર્યક્રમમાં ઉપસ્થિત લેઉવા પટેલ સમાજના આશરે 50 જેટલા ક્લાસ-1 અધિકારીઓને શિલ્ડ આપીને નરેશ પટેલ અને અન્ય ટ્રસ્ટીઓ દ્વારા સન્માનિત કરાયા હતા. ત્યારબાદ 130થી વધુ ક્લાસ-2 અધિકારીઓ, 400થી વધુ ક્લાસ-3 કર્મચારીઓનું પણ શિલ્ડ આપીને સન્માન કરાયું હતું.
ઉપસ્થિત સરકારી કર્મચારીઓને સંબોધતા નરેશ પટેલે જણાવ્યું હતું કે, કર્મચારીમાંથી કર્મયોગી કેમ બનવું તે ખૂબ મહત્વની બાબત છે. આપ સૌ કર્મચારીમાંથી કર્મયોગી બની સમાજ અને રાષ્ટ્રની સેવા કરતાં રહો તેવી મા ખોડલને પ્રાર્થના કરું છું. શ્રી ખોડલધામ ટ્રસ્ટે શરૂઆતથી સમાજને નવીન આપવાનું કાર્ય કર્યું છે. ગિનિસ બુક ઓફ વર્લ્ડ રેકોર્ડ સહિતના અનેક વૈશ્વિક રેકોર્ડ ખોડલધામે પ્રસ્થાપિત કર્યા છે. આજે મહિલા દિવસ પણ છે ત્યારે ખૂબ મોટી સંખ્યામાં દીકરીઓ પણ સન્માનિત થઈ છે ત્યારે સૌ મહિલાઓને પણ શુભેચ્છા પાઠવું છું.
ધારાસભ્યરમેશ ટીલાળાએ સંબોધનમાં જણાવ્યું હતું કે, સરકારી અધિકારી કે કર્મચારી બનવામાં ખૂબ જ મહેનત અને નિષ્ઠાની જરૂર પડતી હોય છે. નરેશ પટેલનો ઉદ્દેશ્ય છે કે શ્રી ખોડલધામ ટ્રસ્ટના માધ્યમથી નાનામાં નાના વ્યક્તિને મદદરૂપ થવું. ત્યારે આટલી મોટી સંખ્યામાં સરકારી અધિકારીઓઓ અને કર્મચારીઓ વિવિધ વિભાગોમાં પ્રસ્થાપિત થયા છે ત્યારે શ્રી ખોડલધામનો આ ઉદ્દેશ્ય સાકાર થયો છે. આજના આ કાર્યક્રમ થકી સમાજના અધિકારીઓ અને કર્મચારીઓ વચ્ચે પરસ્પર એકતા અને સંબંધ ગાઢ બનશે. લાગણી અને ભાવ સાથે સમાજ સાથે હંમેશા જોડાયેલા રહીને કામ કરતાં રહો તેવી આશા વ્યક્ત કરું છું.
આ કાર્યક્રમમાં ઉપસ્થિત અને શ્રી ખોડલધામ વિદ્યાર્થી સમિતિમાંથી તાલીમ મેળવીને સફળ થનાર યુવતીઓએ ભગવાનશ્રી રામની પ્રતિમા આપીને નરેશ પટેલનું સન્માન કર્યું હતું. જ્યારે સન્માન સમારોહની આયોજક ટીમે આકર્ષક પેઈન્ટિંગ નરેશ પટેલને અર્પણ કરી તેઓનું સન્માન કર્યું હતું. આ પ્રસંગે ધોરણ 6 થી જ બાળકો યુપીએસસી-જીપીએસસી જેવી સ્પર્ધાત્મક પરીક્ષાની તૈયારી કરી શકે તે માટે ખાસ કોર્ષનું લોન્ચિંગ પણ કરાયું હતું.
આ પ્રસંગે શ્રી સરદાર પટેલ કલ્ચરલ ફાઉન્ડેશન- રાજકોટમાંથી તાલીમ મેળવાનાર ભૂતપૂર્વ વિદ્યાર્થી અને તાજેતરમાં ડેપ્યુટી કલેક્ટર તરીકે પ્રમોશન મેળવનાર ડો. ભાવિન કથિરીયાએ પોતાનો પ્રથમ પગાર માતૃ સંસ્થા શ્રી સરદાર પટેલ કલ્ચરલ ફાઉન્ડેશન- રાજકોટને અર્પણ કર્યો હતો.
કાર્યક્રમની આભારવિધિ શ્રી સરદાર પટેલ કલ્ચરલ ફાઉન્ડેશન- રાજકોટના મંત્રી જી.એલ.રામાણી દ્વારા કરવામાં આવી હતી. સમૂહ રાષ્ટ્રગાન બાદ કાર્યક્રમની પૂર્ણાહૂતિ કરવામાં આવી હતી. કાર્યક્રમ બાદ સૌ સાથે ભોજન લઈ છુટ્ટા પડ્યા હતા.
આ પણ વાંચો: ખોડલધામના મંચ પર ક્યારેય રાજકારણ કરવું નથી : નરેશ પટેલ
આ પણ વાંચો: કેમિકલ માફિયા બેફામ! રાજકોટની ભાદર નદીમાં ઝેરી પાણી ઠાલવી સરકારને આપી ‘ખુલ્લી ચેલેન્જ’
આ પણ વાંચો: રાજકોટ કોંગ્રેસના દિગ્ગજ ઇન્દ્રનીલ રાજ્યગુરુની નિવૃત્તિથી ખળભળાટ
