Ahmedabad News:ગુજરાત ATS દ્વારા પકડાયેલા ત્રણ આતંકવાદીઓના કેસમાં એક મોટો વળાંક આવ્યો છે.આતંકવાદીઓ પાસેથી ઘાતક રિસિન ઝેર અને શસ્ત્રો જપ્ત થયા બાદ અને પરિસ્થિતિની ગંભીરતાને ધ્યાનમાં લેતા, કેન્દ્રીય ગૃહ મંત્રાલયે રાષ્ટ્રીય તપાસ એજન્સી (NIA) ને તપાસ હાથ ધરવાનો આદેશ આપ્યો છે. NIAનું અમદાવાદ યુનિટ હવે આ આતંકવાદી નેટવર્કની સંપૂર્ણ તપાસ કરી રહ્યું છે.
ગુજરાત ATSએ ઝડપી પાડ્યા હતા આતંકીઓ
ગુજરાત ATSને ગુપ્ત માહિતી મળી હતી કે હૈદરાબાદનો ડો. અહેમદ સૈયદ ગુજરાતમાં આતંકી પ્રવૃત્તિ માટે આવી રહ્યો છે. તેના આધારે ATSની ટીમે અમદાવાદ-મહેસાણા હાઇવે પર આવેલા અડાલજ ટોલ પ્લાઝા પાસે એક સિલ્વર કલરની ફોર્ડ ફિગો કારની તલાશી લીધી. આ કારમાંથી ડો. સૈયદને ઝડપી પાડવામાં આવ્યો અને તેની પાસેથી બે ગ્લોક પિસ્તોલ, એક બેરેટા પિસ્તોલ, ૩૦ જીવતા કારતૂસ અને ૪ લિટર કેસ્ટર ઓઇલ મળી આવ્યું.પૂછપરછમાં ડો. સૈયદે જણાવ્યું કે તેણે હથિયારો ગાંધીનગરના કલોલ નજીકના એક કબ્રસ્તાનમાંથી લીધા હતા. આ માહિતીના આધારે ATSએ બનાસકાંઠા જિલ્લામાંથી આઝાદ શેખ અને મોહમ્મદ સુહેલને ઝડપી પાડ્યા. તપાસમાં ખુલ્યું કે આ બંનેએ રાજસ્થાનના હનુમાનગઢથી હથિયારો મેળવીને કલોલમાં છોડ્યા હતા.
તપાસમાં સૌથી ચોંકાવનારો ખુલાસો એ છે કે ડો. અહેમદ સૈયદ રાઇઝિન નામનું અત્યંત ઘાતક ઝેર તૈયાર કરી રહ્યો હતો. આ ઝેર કેસ્ટર બીન્સમાંથી કાઢવામાં આવે છે અને તે સાયનાઇડ કરતા પણ વધુ ખતરનાક છે. થોડા મિલિગ્રામ રાઇઝિન પણ માણસને મિનિટોમાં મારી શકે છે, અને તેનો કોઈ એન્ટિડોટ નથી.
ATSએ રાઈઝિન ઝેર અને હથિયારો કર્યા હતા કબજે
ડો. સૈયદે પોતાના હૈદરાબાદના ઘરમાં જ રાઇઝિન બનાવવા માટેની લેબોરેટરી બનાવી હતી. ATSએ તેના ઘર પર દરોડો પાડીને રો-મટીરિયલ અને સાધનો જપ્ત કર્યા છે. ત્રણેય આરોપીઓએ અમદાવાદ, દિલ્હી અને લખનઉમાં ભીડભાડવાળા સ્થળો, ફૂડ માર્કેટ અને અન્ય સંવેદનશીલ જગ્યાઓની રેકી કરી હતી. આરોપીઓની યોજના હતી કે ખોરાક કે પાણીમાં રાઇઝિન ભેળવીને મોટા પાયે જાનહાનિ કરવી.
ડો. અહેમદ મોહિયુદ્દીન ,આઝાદ સુલેમાન શેખ અને મોહમ્મદ સુહેલ મોહમ્મદ સલીમ ખાન ઇસ્લામિક સ્ટેટ ખોરાસાન પ્રોવિન્સ (ISKP)ના હેન્ડલર અબુ ખદીજા (અફઘાનિસ્તાનમાં રહેતો)ના સંપર્કમાં હતા. ડો. સૈયદ પાકિસ્તાની લોકો સાથે પણ જોડાયેલો હતો. હથિયારો પાકિસ્તાન તરફથી ડ્રોન દ્વારા મોકલાવવામાં આવ્યા હોવાની આશંકા છે.
