લગભગ છેલ્લા ત્રણ દાયકાથી ગુજરાતમાં સત્તા વિહોણી કોંગ્રેસ નાણાં ભીડમાં સપડાઈ હોવાનું જાણવા મળી રહ્યું છે. ત્યારે ચૂંટણી લડવા માટે કોંગ્રેસે મોંઘવારીથી પીડિત પ્રજા પાસેથી પૈસા ઉઘરાવવાનો નિર્ણય કર્યો છે.
હાઇકમાન્ડે ગુજરાત કોંગ્રેસને લોકસભાની ચૂંટણી માટે 25 કરોડ રૂપિયા એકઠા કરવાની સૂચના આપી છે. ગાંધી જયંતીના દિવસથી ગુજરાત કોંગ્રેસ દ્વારા જનસંપર્ક સાથે ધનસંગ્રહ અભિયાન પણ શરુ કરવામાં આવશે.
આ અભિયાનમાં 50 હજાર બૂથો પર જઈને કોંગ્રેસના આગેવાનો કોંગ્રેસની પત્રિકા સાથે નાણાં ઉઘરાવવાની 100 રૂપિયાથી લઈને 1000 રૂપિયા સુધીની કુપનો વેચશે.
કોંગ્રેસના ખજાનચી એહમદ પટેલે તમામ રાજ્યોના પ્રદેશ પ્રમુખોને બૂથ દીઠ 5000 રૂપિયા ઉઘરાવવાનો આદેશ કર્યો છે. ગુજરાતમાં 50,424 બૂથ આવેલા છે. જે મુજબ ગુજરાત કોંગ્રેસે 25 કરોડ 21 લાખ 20 હજાર રૂપિયા એકત્રિત કરવાના રહેશે.
જણાવી દઈએ કે ગુજરાત કોંગ્રેસ દેવાના ડુંગર તળે દબાયેલી છે. 2017ની વિધાનસભાની ચૂંટણીમાં 7 કરોડ રૂપિયાનું દેવું થયું હોવાની ચર્ચા છે. આ દેવું પણ હજુ ભરપાઈ થઇ શક્યું નથી.