ગુજરાત,
વિધાનસભાગૃહમાં થયેલી મારામારીમાં સસ્પેન્ડ થયેલા ધારાસભ્યનો મામલો આખરે ગુજરાત હાઇકોર્ટમાં પહોંચ્યો છે. વિપક્ષે ગુજરાત હાઇકોર્ટમાં માંગ કરી છે કે અરજન્ટ હિયરીંગ કરવામાં આવે જો કે આ મામલે હાઇકોર્ટ આજે બપોરે અથવા આવતીકાલે સવારે અરજન્ટ હિયરીંગ કરે તેવી શક્યતા દેખાઇ રહી છે.
વિધાનસભા ગૃહમાં પ્રશ્ન પૂછવા માટે સમય ન આપવા બદલે ભારે હોબાળો મચાવ્યો હતો અને છુટ્ટા હાથથી મારામારી કરી હતી. જો કે ત્યારબાદ ગૃહના કાર્યમાં ખલેલ પહોંચાડવા બદલ વિધાનસભાના અધ્યક્ષ રાજેન્દ્ર ત્રિવેદીએ કોંગ્રેસના ધારાસભ્યોને સસ્પેન્ડ કર્યા છે
તો વળી વિધાનસભાના અધ્યક્ષ પણ ગૃહમાં એકતરફી વલણ દાખવે છે તેવી પણ વિપક્ષે હાઇકોર્ટમાં ફરિયાદ કરી છે. ઉલ્લેખનીય છે કે બજેટ સત્ર સમયે ગૃહમાં મારામારીના શર્મસાર દ્રશ્યો સર્જાયા હતા. આ મામલે અધ્યક્ષે કોંગ્રેસના ધારાસભ્ય પ્રતાપ દૂધાત, અમરીશ ડેર અને બળદેવજી ઠાકોરને સસ્પેન્ડ કર્યા હતા. પ્રતાપ દૂધાત અને અમરીશ ડેરને 3 વર્ષ માટે જ્યારે બળદેવજી ઠાકોરને 1 વર્ષ માટે સસ્પેન્ડ કર્યા હતા.
બાદમાં વિપક્ષે આક્ષેપ કર્યો હતો કે ગૃહના અધ્યક્ષ રાજેન્દ્ર ત્રિવેદી ફક્ત સત્તાધારી પક્ષના હિતમાં જ વલણ દાખવે છે. જેથી ન્યાય મળે તે માટે હાઇકોર્ટમાં અરજી કરવામાં આવી છે. તો બીજી તરફ આ મામલે વિપક્ષ આજે રાજયપાલ સાથે પણ મુલાકાત કરવાના છે..સાંજે 5.30 કલાકે વિપક્ષ રાજ્યપાલ ઓ.પી.કોહલી સાથે મુલાકાત કરશે અને સમગ્ર ઘટના અંગે વાતચીત કરશે.
વિધાનસભાના અધ્યક્ષના નિર્ણય બાદ સસ્પેન્ડ કરવામાં આવેલા કોંગ્રેસના ત્રણ વર્ષ સુધી વિધાનસભા ગૃહના સત્ર તેમજ તેની કાર્યવાહીમાં ભાગ લઇ શકશે નહીં. મહત્વનું છે કે, બુધવારે ગુજરાત રાજ્યની વિધાનસભામાં રાજ્ય સરકારમાં કૃષિ મંત્રી આર સી ફળદુ જયારે પોતાનું સંબોધન કરી રહ્યા હતા ત્યારે ગૃહમાં વિપક્ષી ધારાસભ્યોએ ભારે હંગામો મચાવ્યો હતો. આ દરમિયાન કોંગ્રેસના સાવરકુંડલા વિધાનસભા બેઠકના ધારાસભ્ય પ્રતાપ દૂધાતે પોતાનો આવેશ ગુમાવ્યો હતો અને ભાજપના નિકોલના ધારાસભ્ય જગદીશ પંચાલ પર પોતાનું માઈક તોડીને હુમલો કર્યો હતો.
