અમદાવાદ,
પાટીદાર નેતા હાર્દિક પટેલની કથિત સેક્સ સીડી અંગે તેમના સાથીદાર અને પાસના કન્વીનર દિનેશ બાંભણિયાએ વળતો પ્રહાર કરતાં જણાવ્યું હતું કે હાર્દિકની સીડીએ ભાજપનું ષડયંત્ર હતું. દિનેશ બાંભણિયાએ ભાજપ પર સનસનાટીભર્યો આરોપ મુકતા કહ્યું કે ભાજપના નેતાઓએ ષડયંત્રના ભાગરૂપે વિદેશોમાં આવી 22 જેટલી સીડીઓ બનાવી છે. આ સીડી મોર્ફ કરવામાં આવી છે અને તે બનાવટી છે.
દિનેશ બાંભણિયાએ વિપુલ પટેલ અને બિમલ પટેલ નામની વ્યક્તિઓ પર આરોપ મુકતા કહ્યું કે આ બંને વ્યક્તિઓને ભાજપે આવી સીડીઓ બનાવવા માટે પૈસા ચુકવ્યા હતા.વિપુલ પટેલને નાણાંની જરૂરિયાત હતી અને તેણે ભાવનગરના કોઇ ફાર્મ હાઉસમાં મુખ્યમંત્રી વિજય રૂપાણી સાથે મીટીંગ કરી હતી..
દિનેશ બાંભણિયાએ કહ્યું કે વિપુલ પટેલે તેને મળેલા નાણાંમાંથી 60 લાખ રૂપિયાના દાગીના ખરીદ્યા છે અને 3 લાખ રૂપિયાના વસ્ત્રો ખરીદ્યા છે.બિમલ પટેલ પણ ભાજપનો કાર્યકર છે અને તેણે નરેન્દ્ર પટેલને ભાજપમાં જોડાવવા માટે 10 લાખ રૂપિયાની ઓફર કરી હતી.
હાર્દિક પટેલની સેક્સ સીડી અંગે દિનેશે કહ્યું કે આ સીડી બનાવવા માટે સુરતમાં લોહીનો વેપાર કરતા મનોજ નામની વ્યક્તિનો સંપર્ક કરવામાં આવ્યો હતો અને તેને 40 લાખ રૂપિયા ચુકવવામાં આવ્યા હતા આ સીડી બનવાવા માટે 1 પોલિસ કમિશનર અને 2 એસપી કક્ષાના અધિકારીઓની પણ મદદ લેવામાં આવી હતી.
દિનેશ બાંભણિયાએ એવો પણ ભય વ્યક્ત કર્યો કે આગામી દિવસોમાં હાર્દિક વિરૂધ્ધ કોઇ મહિલા યૌન શોષણનો કેસ દાખલ કરી શકે છે અને ભાજપ સરકાર તેને નારાયણ સાંઇની જેમ લાંબો સમય જેલમાં નાંખી શકે છે..